• 30 август — Конституция күни
• 30 Тамыз, 2016

Президентлар бизнесқа йол ачти

Президент Нурсултан Назарбаев Польша Җумһурийитиниң Президенти Анджей Дуданиң тәкливигә бенаән, мошу мәмликәттә икки күнлүк дөләт сәпиридә болди.Польша Президенти Сарийи алдидики мәйданда Қазақстан Президентини жуқури дәриҗилик рәсмий шәхсләр қарши алғандин кейин Президентларниң учришиши Польша Президенти Сарийиниң Ақ залида давамлишип, икки мәмликәт лидери өзара мунасивәтләрниң асаслиқ мәсилилирини муһакимә қилди. Җүмлидин сода-ихтисадий, инвестициялик, йеза егилиги, транзит-транспорт вә мәдәний-гуманитарлиқ саһалардики һәмкарлиқни күчәйтиш тоғрилиқ сөз болди. Андин кейин кәңәйтилгән тәркиптики музакириләргә Қазақстан делегациясиниң әзалири вә уларниң польшалиқ кәсипдашлири қошулди.

Қазақстан вә Польша оттурисида өзара мунасивәтләрниң кәң даириси моҗут. Дөләтләр чарәк әсиргә йеқин вақит мабайнида сәясий вә ихтисадий мунасивәтләрниң жуқури дәриҗисини сақлап келиватиду. Һазир мәмликәтлиримиз оттурисида 18 хәлиқара, җүмлидин 15 һөкүмәтләрара шәртнамә ишләватиду. Регионларара һәмкарлиқ тоғрилиқ келишимни қошуп һесаплиғанда, йәнә 16 иккитәрәплимилик һөҗҗәт лайиһиси қариливатиду. Бу қетимқи сәпәр давамида кәңәйтилгән тәркиптики музакириләр аяқлишиши билән Қазақстан Җумһурийити вә Польша Җумһурийити оттурисидики Ихтисадий һәмкарлиқ тоғрилиқ декларация, Қазақстан Җумһурийитиниң Һөкүмити вә Польша Җумһурийитиниң Һөкүмити оттурисида Шәхсләрниң реадмиссияси тоғрилиқ келишим, Қазақстан Җумһурийитиниң Һөкүмити вә Польша Җумһурийити Һөкүмити оттурисида Йеза егилиги саһасидики һәмкарлиқ тоғрилиқ келишим вә «Қазақстан Тәрәққият банки» акционерлиқ җәмийити вә Польша Миллий ихтисат банки оттурисида Асаслиқ келишим охшаш төрт муһим һөҗҗәт имзаланди. Һөҗҗәтләрни имзалаш мәрасими аяқлашқандин кейин Президентлар икки мәмликәт бизнесиниң интенсив һәмкарлиғиға йол ачқанлиғи тоғрилиқ гувалиқ қилидиған билдүрүш билән сөзгә чиқти. Нурсултан Назарбаев өзиниң Варшавиға үчинчи қетим келиватқанлиғини әслитип өтти. — Дөләтлиримизни умумий тарихий өтмүш бағлаштуриду. Польша Қазақстанниң Европидики әң йеқин вә муһим шериклириниң бири болуп һесаплиниду. Мәмликәтлиримиз оттурисида, биринчи новәттә, ихтисадий саһадики өзара пайдилиқ һәмкарлиқниң көплигән истиқбаллиқ йөнилишлири бар, — дәп тәкитлиди Президент вә Қазақстандин бизнес-форумға йүздин ошуқ бизнесменниң кәлгәнлигини, буниң болса, икки мәмликәт тиҗарәтчилириниң өзара мәнпийәтдарлиғиниң ипадиси екәнлигини әслитип өтти. Өз новитидә Польша Президенти Анджей Дуда Нурсултан Назарбаевқа сәпәр билән кәлгәнлиги үчүн миннәтдарлиқ билдүрүп, униң муһим әһмийәткә егә екәнлигини вә һазирниң өзидила пайда бериватқанлиғини тәкитлиди. Шу күни Нурсултан Назарбаев Польша Җумһурийити сенатиниң маршали Станислав Карчевский билән учрашти. Музакириләр давамида Парламентларара өзара һәрикәт мәсилилири муһакимә қилинди. Тәрәпләр иккитәрәплимә мунасивәтләрниң жуқури дәриҗидә тәрәққий етиватқанлиғини, дөләтләрара һәмкарлиқниң асасий йөнилишлирини вә сәпәр даирисидә қолға кәлтүрүлгән келишимләрни әмәлгә ашуруш үчүн нәтиҗидарлиқ һоқуқ мәйданини вуҗутқа кәлтүрүш бойичә ишләшниң зөрүр екәнлигини тәкитлиди. Дөләт рәһбири шундақла Польшаниң алий оқуш орунлирида билим еливатқан қазақстанлиқ студентлар билән учрашти. Президент уларни әла оқушқа вә алған билимини өз мәмликитиниң пайдисиға сәрип қилишқа чақирди. Қазақстан Президенти Польшаға қилған сәпириниң иккинчи күни Қазақстан-Польша бизнес-форумиға қатнишип, сөзгә чиқти. Икки мәмликәт бизнесменлириниң 400дин ошуқ вәкили иштрак қилған форумда дөләтләр оттурисидики инвестициялик вә сода-ихтисадий саһалардики һәмкарлиқни техиму кәңәйтиш йоллири муһакимә қилинди. Форумдин кейин Президент Қазақстан журналистлири үчүн мәтбуат конференциясини өткүзүп, сәпәр йәкүниниң вә бизнесменлар билән болған диалогниң тәпсилатлириға тохталди. Шу күни у  Польша Җумһурийитиниң Премьер-Министри Беата Шидло  билән учрашти. Иккитәрәплимә һәмкарлиқниң асасий йөнилишлири муһакимә қилинған баш қошушта тәрәпләр өзара мунасивәтләрниң жуқури дәриҗидә тәрәққий етиватқанлиғини тилға елип, дөләтләрара һәмкарлиқниң асасий йөнилишлирини вә сәпәр даирисидә қолға кәлтүрүлгән келишимләрни әмәлгә ашуруш үчүн нәтиҗидардиқ һоқуқ мәйданини вуҗутқа кәлтүрүшниң зөрүр екәнлигини тәкитлиди. Польшадин қайтиш алдида Президент Намәлум солдат қәбригә гүлчәмбәр қойди. *** Шу күни Қазақстан Президенти рәсмий сәпәр билән Сербия Җумһурийитигә кәлди. Белград аэропортида Қазақстан Лидерини мошу мәмликәтниң Президенти Томислав Николич қарши алди.