• Қәлб нидаси
  • 02 Қыркүйек, 2016

Қанитимиз қайрилди

Бу дунияда патқан күнни тәң узитип, атқан таңни биллә күтүвалидиған әң йеқин адимиңдин айрилиштәк еғир җудалиқ болмиса керәк. Әйнә  шундақ  җудалиқ  бизниң  бешимизға  кәлди.  Көйүмчан анимиз Маһирәм бари-йоқи  49 йешида, меһриван кичик анимиз Пәридәм болса, 44 йешида күтүлмигән йәрдин йол һалакитигә учрап, бақилиқ болди. Бу паҗиәлик өлүм һәммимизниң жүрәк-бағрини езип ташлиди. Һәр иккилисиниң толиму яш кәткәнлигигә бәк ечиндуқ. Қачанду-бир чағларда тәсәввур қилғинимиздәк, бәхитлик күнлиримизниң алдимизда әмәс, кәйнимиздә қалғанлиғини ойлисақ, жүрәк-бағримиз парә-парә болуп кетиду...

 Анимиз техи түнүгүнла өйүмизни шох күлкиси билән ават қилип, тилидин бал темип, йеқинлирини түгимәс-пүтмәс шатлиқ-хошаллиққа бөләп жүрәтти. Әпсус, у бүгүн аримизда йоқ, дәртлиримизгә дәрт қошуп, көзүмиздин мәңгүгә учуп кәтти. Анимиз бар чағда һәрбир күнимиз нурлуқ, қәлбимиз шат, күлкимиз җараңлиқ еди. У дайим биз, балилириниң, келәчигини ойлатти. Арманлири әндила әмәлгә ешиведи. Кечилири сүт уйқисини бөлүп, қанатлиққа  қақтурмай пәпиләп өстүргән үч пәрзәнди  қатарға қошулуп, алий оқуш орунлирида оқувататти. Әндила раһәт  көридиған пәйтидә, туюқсиз кәлгән әҗәл бизни бозлитип қоюп, анимизни аримиздин мәңгүгә елип кәтти. Анимизниң йоқлуғи бизгә интайин еғир билинмәктә.  Кичик анимиз Пәридәмму силиқ-сипайә, меһриван инсан еди. Ят адәмни өз қилатти. Көйүмчан, қолидин кәлсә, һәммигә тәң қанат яйғуси келидиған қәлби сехи аял еди. Җудалиқ дәрди анисиз житим қалған төрт  пәрзәндиниң  жүригини моҗуп, көңлини  ғәш қилмақта... Мана 40 күн болди, қәдирданлиримиздин бевақит айрилип, қанитимизниң қайрилғиниға... Тәғдирниң язмиши шундақ екән.  Қолумиздин келидиғини,  анимиз билән кичик анимизниң ятқан йериниң юмшақ, роһиниң җәннәттә болуши үчүн қуръан тилавәт қилип, дуа-тәгбир оқуш екән. Биз қәдирданлиримизниң мубарәк исимлирини қәлбимизниң қетида сақлап, Алладин  чин етиқатимиз  билән шуни тиләймиз.

Саҗидәм  ӘХМӘТҖАНОВА.

Алмута шәһири.

308 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы