- Хәйрихаһлиқ
- 02 Қыркүйек, 2016
Заһидәмдин көпчилик миннәтдар
Яркәнт шәһириниң турғуни Заһидәм Илиева һәр жили август-сентябрь айлирида җумһурийәт даирисидә өтүватқан «Мәктәпкә йол» акцияси башлиниши билән наһийә мәктәплирини арилап чиқиду. Алди билән мәктәп мудирлиридин ким қандақ ярдәмгә муһтаҗлиғидин хәвәр тапидудә, кейин шу балиларниң көңлидин чиқишқа тиришиду. Бу қетимму шундақ болди. Дәсләп Билал Назим намидики оттура мәктәпниң үч оқуғучисиға мәктәп формилири билән аяқ кийими, Чулуқай йезисидики Җамалидин Босақов намидики мәктәпниң бир оқуғучисини мәктәпкә һаҗәтлик кийим-кечәк, оқуш қураллири билән тәминлиди.
Һә, тапқан-тәргининиң мәлум қисмини һаҗәтмәнләргә сәрип қилип, көпчиликниң алқишиға бөлиниватқан у йеқинда йәнә бир соваплиқ ишниң тәшәббускари болди. Көптин бери өй селиш үчүн йәр алалмай жүргән ялғуз ана Күлдәрхан Қурманбековаға шәһәрниң жуқарқи қисмидин новәтсиз йәр елишқа маддий ярдимини көрсәтти. Мундақ хәйрихаһлиқ ишниң һөддисидин чиқиватқан Заһидәм Илиеваға наһийә һакими Бердавлет Абдулдаев миннәтдарлиғини изһар қилип, ишлириға муваппәқийәтләр тилиди. Һәр кимниң қолидин келивәрмәйдиған соваплиқ ишларниң бешида жүргән Заһидәм Илиеваға бизму «Бәргән қолиңиз һечқачан соғулмисун» дегән тиләкни билдүримиз.Гөһәрбүви ИСМАЙИЛҖАНОВА.
Панфилов наһийәси.736 рет
көрсетілді0
пікір