• Йеңилиқлар
• 08 Қыркүйек, 2016

Ана тилимизда билим еливатқанларға соға

Бийилқи оқуш жилини Талғир наһийәсиниң Бесағаш йезисидики 29-мәктәптә ана тилимизда билим еливатқан қаракөзлиримиз бирмунчә хошаллиқлар билән башлиди. Мәсилән, ушбу билим дәргаһида қириқ жилға йеқин вақит ишлигән пешқәдәм устаз Алимбүви Азатова бир синипни өз һесавиға толуқ җөндәштин өткүзүп бәрсә, жутниң жигитбеши Әхмәтҗан Ахмоллаев, ЖУЭМниң Бесағаш йезилиқ шөбисиниң рәиси Азат Аблизов вә «Уйғур мәктивини қоллап-қувәтләш» фондиниң рәиси, филология пәнлириниң доктори Алимҗан Тиливалди жут-җамаәтчилик нами­дин мәктәпкә заманивий тикинчилик машинисини соға қилди. Бу, әлвәттә, Дөләт рәһбириниң «100 ениқ қәдәм» Милләт планиға мувапиқ һал-турмуши төвән аилиләрниң пәрзәнтлири мәктәп даирисидә кәсип егиләш хаһишини әмәлгә ашурулушиға түрткә болмақ. Өз новитидә, мәктәп мудири Жанна Сағындықова билим бериш саһасиға йеқиндин ярдәмлишиватқан инсанларға муәллимләр коллективи намидин миннәтдарлиғини билдүрди. Шундақла у Бесағаш жутида истиқамәт қиливатқан уйғурларниң мәктәпкә дайим яр-йөләк болуватқанлиғини қәйт қилип, уларниң ишиға утуқ тилиди. Әнди һаятиниң көп қисмини мошу дәргаһта әмгәк қилиш билән өткүзгән Алимбүви Махмут қизиниң (сүрәттә) сахавәтлик ишидин хәвәр тепип, у яқни сөһбәткә тартқинимизда, бу униң узундин буян көңлигә пүкүп жүргән армини екәнлигини изһар қалди вә бу ярдиминиң көпчиликкә җар салғидәк иш әмәслигини ейтип, бу һәққидә көп сөзлимиди. Шундақ болсиму, биз бир-икки соаллимизға җавап алдуқ: — Алимбүви һәдә, һазир адәмләр һәрбир тийинини ихтисат қиливатқан заманда сиз бир мунчә пул сәрип қилип, бир синипниң җөндәш ишлирини һөддиңизгә алғиниңизниң сәвәви немидә? — Башта ейтқинимдәк, ана мәктивимгә азирақ ярдәм қилиш оюмниң илгири болғини раст. Униң үстигә йеқинда мәктәп мудири билән учрашқинимда, у уйғур синипида билим еливатқан оқуғучилар оқуватқан синипларниң әһвали һәққидә гәп қозғап қалди. «Арминимниң рояпқа чиқидиған вақти кәпту» дедимдә, бу ишни қолға алдим. Буниңдин ташқири, башқиларға сәл-пәл үлгә болуп, пәрзәнтлирини уйғур синиплириға беридиғанлар сани өсүп қаламдекин, дегән нийитимму йоқ әмәс. — Бу синипқа сизниң исмиңизни берипту... — Дәсләп исмимни беришкә қәтъий қарши болдум. Бирақ бу йәрдикиләр унумиди. Мән унчивала чоң иш қилғиним йоқ. Пәқәт қаракөзлиримиз йоруқ, пакизә һәм сәрәмҗан синипларда билим алса, мениң үчүн шу чоң хошаллиқтур. Пурсәттин пайдилинип шуни ейтмақчимәнки, бийил бизниң мәктәптә бари-йоқи бир уйғур синипи ечилди. Бу әпсуслинарлиқ әһвал. Әгәр жутдашлиримиз һәққиқәтәнму пәрзәнтлириниң вә миллитимизниң келәчигини ойлиған болса, бир әмәс, үч синип ечиш имканийитимиз бар еди. *** Расти шуки, бу йезида ана тилимизда билим алғучилар санини көпәйтиш йолида ат чепиватқан инсанлар көпләп санилиду. Мәсилән, Бәхтияр Зайиров исимлиқ жигит бийилқи оқуш жилиға алтә балини толуқ мәктәп формиси билән тәминлигән болса, Билалдин Һошуров, Ришат Мәмәтохтиев, Абдуллин Өмәров, Султан Қәмәев вә Әхмәткамал Җумахун оғли қатарлиқ мәрт-мәрданә жигитләр дайим ярдәм қолини сунуп келиватиду. Әлвәттә, жут турғунлириниң уларға ейтар миннәтдарлиғи чәксиз. Мәшүр САСИҚОВ.   Талғир наһийәси.