- Дидар ғенимәт
- 08 Қыркүйек, 2016
Көңлимиз хошаллиққа толди
Бүгүн җәнубий пайтәхтниң Илияс Жансүгүров намидики кочиға җайлашқан «Исмайил» кафесиға келиватқан адәмләрниң кәйпияти бөләкчә. Чүнки улар буниңдин 50 жил илгири Уйғур наһийәсиниң Ғалҗат йезисидики оттура мәктәпни тамамлиған синипдашлар еди. Мошу дәмләрдики иллиқ сезимлар билән сеғиниш отлирини бир дәм болсиму басидиған дәқиқиләрни тил билән ейтип йәткүзгүсиз.
Һәммимизгә чәксиз хошаллиқларни беғишлиған учришишимиз мәктәптики чағлиримиздила өзлириниң паалийәтчанлиғи билән пәриқлинидиған Зивангүл Арипова, Әхмәтҗан Азнибақиев, Абләһәт Розахунов, Зияпәт Савутова, Савутҗан Зулияров вә башқиму исми аталмиған синипдашлиримизниң күч чиқириши билән өтти. Учришишимизни башлаштин илгири, әлвәттә, биз, дуниядин өткән устазлиримиз билән синипдашлиримиз роһиға дуа қилип, бир минутлиқ сүкүт сақлидуқ. Андин кейин мәктәптики һаятимизни әсләп, нурғунлиған қизиқарлиқ вақиәләрни әсләштуқ.
Көпчилигимиздә алаһидә тәсират қалдурған бу учришиш ана жутумизда өтмисиму, уюштурғучиларниң тәшкилатчанлиғи түпәйли, худди туғулған жутумиз Ғалҗат йезисиниң сап һавасида жүргинимиздәк һис қилдуқ өзимизни. Чүнки биз бу мәрасимда миллий саз-нәғмә билән нахша-сазларға ғәриқ болуп, турмуш-тирикчилик һәләкчилигини бир күн болсиму ядимиздин чиқарғандәк болдуқ. Әлвәттә, биз уларниң бу тиришчанлиғи үчүн чәксиз миннәтдарлиғимизни билдүримиз.
Тәкитләш керәкки, биз қазақ-уйғур балилири арилаш бир синипта билим алдуқ. Шуңлашқа бу күни учришишимизда икки милләт нахша-сазлири давамлиқ яңрап, бизниң достлуғимизниң шу заманлардин башлинип, һелиму давамлишиватқанлиғи ярқин ипадиләнди.
Саһибәм ИМАМЗӘРОВА.
372 рет
көрсетілді0
пікір