• Йеңилиқлар
  • 22 Қыркүйек, 2016

Йеңи мечит пайдилинишқа берилди

Йеқинда Яркәнт тәвәсидики Ават йезисиниң жут-җамаәтчилиги үчүн чоң хошаллиқ вақиә йүз бәрди. Аватлиқлар  көптин  бери күткән йеңи мечит бенасиниң ечилиш мәрасими болуп өтти. Тәнтәнә Қурван һейтиниң үчинчи күнигә тоғра кәлгәчкә, бу күни униңға жирақ-йеқиндин қәдәм тәшрип қилғучилар интайин көп болди.  Униңда  дәсләп  сөз новитини алған Панфилов наһийәси һакиминиң орунбасари Шөһрәт Қурбанов, наһийәниң баш имами Мусабек Таған, жут намидин Әғзәм Мәрүпов, Шәмшимәһәмәт Ниязов, Дүйсенбек Шахарбаев вә башқилар көпчиликни  йеңи мечит бенасиниң пайдилинишқа берилиш мунасивити   билән тәбриклиди.

Ават мечитиниң имами Айдарбек Турапбаев қуръан тилавәт қилғандин кейин, униң рәмзлик лентиси қийилип, көпчилик мечитниң ичини көздин кәчүрди. Андин әрвалар роһиға атап нәзир берилди. Тәкитләш керәкки, Ават йезисида мечит селиш  керәклиги турғунларни хелидин бери ойландуруп жүрди. Чүнки жутта мечит болмиғачқа, улар Роза, Қурван һейт намазлирини кона мәктәп бенасида   өтәвататти. Баш қошушларда бу мәсилә пат-пат оттуриға қоюлуп, ахири   жут чоңлири билән келишилгән һалда, мәхсус җай таллавелинди. Улуқ Ипәк йоли бойиға мечитниң қозуғи қеқилип, дәрһал қурулуш ишлири қолға елинди. Йеза турғунлириму дәрһал ианә топлашқа киришти. Қурулуш ишлириға җавапкәр мәрт-мәрданә, сахавәтлик инсанлар бу ишниң һөддисидин шәрәп билән чиқти вә көп өтмәй  бир вақитта 250 адәм намаз өтәш имканийитигә егә йеңи мечит бенаси пайдилинишқа берилди. Мечит  һойлисида гүлзарлиқлар бәрпа болуп, 20 түп қариғай  аә башқиму мәнзирилик дәл-дәрәқләр  көчәтлири тикилди. Тәкитләш керәкки,  бийилқи жилниң өзидила  Яркәнт тәвәсидә   икки мечит селинип, пайдилинишқа берилди.  Яшлиримизни иман-инсаплиққа тәрбийиләйдиған мечитларниң кәйни-кәйнидин ечилиши — яхшилиқниң нишанидур.

Гөһәрбүви ИСМАЙИЛҖАНОВА,  Панфилов наһийәси.

Жумағази БЕЙСЕБЕК чүшәргән сүрәт.  

531 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы