• Йеңилиқлар
  • 29 Қыркүйек, 2016

Кәспий мәйримиңлар мубарәк, әзиз муәллимләр!

Ершат ӘСМӘТОВ, «Уйғур авази». a.ershat@mail.ru/ Һелиму ядимда, оқуғучилиқ дәвримиздә, йәни өткән әсирниң 70 — 80-жиллири, мәрипәт бағвәнлиригә нисбәтән көзқараш бөләкчә еди. «Муәллим келиватиду!» десә, қачарға җай тапалмай қалаттуқ. Улардин пәқәт бизла әмәс, ата-анилиримизму кәдимкидәкла әйминәтти. Өзлиридин кичик болсиму, айрим мәсилиләрдә үз келәлмәтти. Мабада, әйивимизгә бола, муәллим тиллиса яки урса (бу сөзләр һазирқи әвлатқа ғәлити аңлиниши мүмкин), ата-анимизға ейтматтуқ. Әксичә, «бу һәққидә билип қалса, әдивимизни бериду» дәп чөчәттуқ. Кинониң кәчки сеанслириға, мәктәп түгитип кәткәнләрниң зияпәтлиригә ата-анимиздин бурун, муәллимдин қорққачқила барматтуқ. Мабада мошу хилдики «қилмишлиримиз» үчүн мәсилимиз комсомол, пионер жиғинлирида яки линейкида көпчиликниң оттуриға селинса, у биз үчүн «өлүм» билән баравәр еди. Ата-ана мәктәпкә чақиртилса, оқуғучи үчүн униңдин дәһшәтлик һечнәрсә йоқтәк билинәтти. Тәнәпус пәйтлиридә фойеда яки дәлиздә алдимизға муәллим чиқип қалса, өзимизни чәткә тартип, бөкүмизни қолумизға елип, саламлишаттуқ. Мәйли мәктәптә, кочида яки җәмийәтлик орунларда болсун, жил-он икки ай муәллим бизниң асасий тәрбийичимиз вә йол көрсәткүчимиз болидиған. Һә һазирчу?

Җәмийитимиздики өзгириш-йеңилиқларға мунасивәтлик билим бериш системисидиму хелила  йеңилиқларниң пәйда болғанлиғи һәммимизгә мәлум. Муәллимләргә, оқуғучиларға қоюлидиған тәләп-еһтияҗларму башқичә. Бу — тәрәққиятниң нишани. Йәни билим бериш системисини дуниявий стандартқа йеқинлаштуридиған ислаһатлар жүргүзүлүватиду. Бүгүнки муәллимниң зиммисидики «жүкниң» күндин-күнгә еғирлишиватқиниму әйнә шуниңдин. Уларға «әркинликни көпирәк һис қилишқа» адәтләнгән заманивий оқуғучилар билән ишләшму асанға чүшүватқини йоқ. Униң үстигә ата-аниларму илгәркидәк әмәс. Көпчилиги «Қарға балам — аппиғим» дәп, пәрзәндиниң арисиға кирип, ақ-қарини ениқлимай турупла, муәллимгә яки мудирға «һуҗумға» өтүшкә тәйяр. Йошуридиғини йоқки, бәзидә айрим пулдарларниң муәллимләрни камситидиған пәйтлириму болиду. Мана мошундақ шараитта барлиқ қийинчилиқларға бәрдашлиқ берип, яш әвлат қәлбигә мәрипәт уруғини чечиштәк муһим вәзипиниң һөддисидин чиқиватқанму, мәдәний чарә-тәдбирләрниң қайнимида жүргәнму, һәрхил тәшвиқат-тәрғибат ишлирини әмәлгә ашуруватқанму, китап яки театрға билет сетиш, миллий нәширлиримизгә муштири топлаш мәсилилиридә алдинқа сәптә болуватқанму — муәллимләр. Шуңлашқиму уларниң әмгигини баһалап, қәдирлигән тоғра. Умумән, пәрзәнтлиримизниң заман тәливигә лайиқ инсанлардин болуп йетилиши һәққидә ойлисақ, әң алди билән муәллимниң аброй-инавитини көтиришимиз керәк. Өз новитидә, муәллимму намиға лайиқ билимлик, салаһийәтлик, тәләпчан, һәртәрәплимә сәвийәлик болғини әвзәл. Һә, буниңсиз көпчиликниң һөрмитигә еришиш бәк қийин. Шуңлашқиму пәрзәнтлиримизниң, нәврилиримизниң келәчигини ойлисақ, мәктәп, җәмийәт вә  аилә мунасивитини мустәһкәмләп, чоңқур ойлинип,  һәмкарлиқта иш елип барғинимиз әқилгә мувапиқтур. Шу чағда көзлигән нишанимизға йетәләймиз. Кәспий мәйримиңлар мубарәк, әзиз муәллимләр!

623 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы