• Йеңилиқлар
• 29 Қыркүйек, 2016

Қазақстан кәспий боксиниң тәнтәниси

Әгәр спортниң йәк­му-йәк түр­лириниң ишқи­ваз­лиридин «Ке­йинки күн­­­ләрдә сизни қандақ ва­қиәләр хошал қилип, һая­җанлиққа бөлиди?» дәп сорап қалғидәк болсиңиз, уларниң өткән шәнбә күни Алмутидики Балуан Шолақ намидики Спорт сарийида өткән кәспий бокс кечини тилға алидиғанлиғи талашсиз. Қазақстан хәлқи Ассамблеяси, җумһурийәтлик Уйғур этномәдәнийәт мәр­­кизи «Нур Отан» пар­тиясиниң, Алмута шә­һәрлик һакимийәтниң вә Қазақстан Кәспий бокс федерациясиниң қоллап-қувәтлишидә өткүзгән мәзкүр турнир һәқиқәтәнму бокс ишқивазлириға хе­лә вақит әстә қалғидәк дәқиқиләрни һәдийә қилди.

Қазақстан Мустәқил­лигиниң 25 жиллиғиға һәм көркәм шәһәр Ал­мутиниң 1000 жиллиғиға беғишланған мәзкүр тур­нирға елимиздин вә Өз­бәкстан, Украина, Грузия, Сербия охшаш мәм­ликәтләрдин кәспий боксчилар қатнашти. Спорт сарийиға жиғилған иш­қивазлар кәскин күрәш шараитида өткән йәттә рейтинглиқ вә дуния чемпиони унвани үчүн бир җәңни тамашә қилди. Биринчи болуп рингқа 66 килограммдин ошуқ салмақ категориясидики қазақстанлиқ Берикбай Нурымбетов билән кәспийләр арисида сабиқ Европа чемпиони Украина боксчиси Валентин Кутц чиқти. Тәкитләш керәкки, қарағандилиқ боксчи биринчи раундтин башлапла тәшәббусни қолға елип, рәқивини һодуқтурмақчи болған еди. Бирақ Украина вәкили һодуқидиғанлардин әмәс екән. Уму Берикбайниң зәрбисигә зәрбә билән җавап берип турди. Нәтиҗидә иккисиниң оттурисида тәң дегидәк дәриҗидә  өт­кән җәңдә алтә раундта топланған пай сани бойичә бизниң боксчи ғалип чиқти. Әнди иккинчи йәкму-йәктә қазиларға пай са­нашниң һаҗити болмиди. 79,4 килограммлиқ салмақ категориясидә рингқа чиқ­қан қазақстанлиқ Али Ахмедов учришишниң 39 секундидила рәқиви, грузиялик боксчи Миндиа Нозадзени беғириға қаттиқ зәрбә берип, нокаутқа әвәтти. Алиниң башланмисини йәнә бир боксчимиз – 61 килограммдин ошуқ салмақ категориясидә күч синашқан Айдар Шарибаев давамлаштурди. Униң рәқиви, Грузия вәкили Заза Амирадзе рингта өз вәтәндишидин бир минут ошуқ чидалиди. У Айдарниң зәрбисидин кейин җәңни тохтитишқа мәҗбур болди. Қисқиси, техникилиқ нокаут. Кәспий бокс кечиниң программисини ММА палванлири – өзбәкстанлиқ файтер Амаль Хасанов билән бизниң Нурсултан Итанов оттурисида өткән нарәсмий җәң бираз бейитти. Етирап қилиш керәкки, мошу қаидисиз җәңдә меһман бирдинла һуҗум қилип, Нурсултанни бесивалған еди. Бирақ у бизниң палван қолланған әҗайип усул нәтиҗисидә 1 минут 34 секундтин кейин йеңилгәнлигини етирап қилишқа мәҗбур болди. Бу йәкму-йәктә Нурсултан Итанов Қазақстан ММА мәктивиниң жуқури дәриҗидә екәнлигини намайиш қилди. Шуниңдин кейин новәт қизларға кәлди. Рингқа Қазақстанниң тунҗа кәспий боксчи қизи Фируза Шарипова билән сербиялик боксчи Милена Матович чиқти. Меһман қиз дәсләпки қетим кәспий бокс рингиға чиққиниға қаримай, өзини хелә актив көрситип, үч раунд давамида маһирлиқ билән қоғдинишқа тиришти. Әлвәттә, һуҗумғиму өтүп турди. Бирақ күчләрниң баравәр әмәслиги оңайла билинип қалди. Нәтиҗидә үчинчи раунд башлинип, 1 минут 50 секунд өткәндә униң мәшиқләндүргүчиси рингқа ақ лөңгә ташлап, шагиртиниң йеңил­гәнлигини етирап қилди. Бу жутдаш қизимизниң биринчи қетим техникилиқ нокаут билән ғалибийәт қазиниши. Улардин кейин WBS Youth Intercontinental унвани үчүн Ернар Ешенов билән грузин Георгий Чжиндзарадзе күч синашти. Буниңдиму биринчи раундниң өзидила бирнәччә қетим сезиләрлик зәрбә йегән Грузия вәкили 2 минут 35 секундтин  кейин җәңни давам қилиштин баш тартти. Шундақ қилип, бизниң йәнә бир палвинимиз техникилиқ нокаут билән йеңивалди. Бу униң кәспий бокстики бәшинчи қетим ғалип чиқиши. Бокс кечидики новәт­тики йәкму-йәктиму қазақстанлиқ боксчи ғалип чиқти. Бирақ бу қетим Маджит Бектемиров билән грузиялик боксчи Гари Абаджян түгәл алтә раунд мушлашти. Нәтиҗидә қазилар пай сани бойичә бизниң боксчиниң ғалип чиққанлиғини елан қилди. Амма Грузия боксчиси тамашибинларниң алаһидә алқиш-һөрмитигә еришти. У алтә раунд давамида һуҗум қилиштин қечип, маһирлиқ билән қоғдинипла қоймай, ғәлити қилиқ-һәрикәтлири билән учришишни шоуға айландуруп, ишқивазларни өзигә мәһлия қиливалди. Шуниңдин кейин Кәспий бокс кечидики асасий йәкму-йәккә новәт кәлди. Униңда IBO тәхмини бойичә биринчи еғир салмақта интерконтинентал чемпион, Global Boxing Couneil тәхмини бойичә дуния чемпиони қазақстанлиқ Иса Акбербаев билән мошундақ атаққа үмүткар немис Майк Курцвейл учрашти. Қазақстанлиқ боксчи ишни узаққа созмай биринчи раундтила җәң тәғдирини өзиниң пайдисиға һәл қилди: Германияниң «нокаут машиниси» икки қетим оң көзигә зәрбә йәп, 55-секундтила нокаутқа учриди. Қисқиси, у бир күн илгири «Исани тиз пүктүримән» дегән сөзидә туралмиди. Мәзкүр кәчтики ахирқи җәң бизниң Александр Журавский билән Таиланд боксчиси Патамсюк Патомпотонг оттурисида болди. Буниңдиму жутдишимиз иккинчи раунд башлинип бир минут 53 секунд өткәндә рәқивини тиз пүктүрди. Таиланд вәкили, аддий тил билән ейтқанда, қазақстанлиқниң кәйни-кәйнидин бәргән зәрбилиригә чидалмиди. Кәспий бокс кечиниң давамида униң промоутери, Астана шәһәрлик Уйғур этномәдәнийәт мәркизиниң рәиси Рустәм Абдусаламов, шундақла пәхрий меһман сүпитидә тәклип қилинған исми ривайәткә айланған боксчи Абдурешит Абдурахманов, атақлиқ жутдишимиз, Олимпиада чемпиони, IBF тәхмини бойичә дуния чемпиони Василий Жиров, икки қетим олимпиада вице-чемпиони Болат Жумадилов сөзгә чиқти. Биз дайим Амери­кида, Европида өтүватқан җәңләрни көрүватимиз. Бирақ немишкиду өзимиздә шун­дақ қизғин вә кәскин йәкму-йәк учришишларни көрмәймиз. Бу қетим бизму Қазақстан боксиниң дуниявий дәриҗидә бола­лайдиғанлиғини көрси­тишкә тириштуқ. Шундақла биз боксни аммибаплаштуруш, вәтәнпәрвәрлик роһни күчәйтиш вәзипилирини мәхсәт қилдуқ. Нәқ шуң­лашқиму бүгүнки хә­лиқара чарә-тәдбир Қа­зақстан Мустәқиллигиниң 25 жиллиғиға вә Алмута шәһириниң 1000 жиллиғиға беғишланди, —  деди өз сөзидә Рустәм Абдусаламов. У шундақла ҚХА кати­ватиниң мудири Ералы Тоғжановниң тәбрик хетини оқуп бәрди вә Абдурешит Абдурахмановни 70 яшлиқ тәвәллуди билән тәбрикләп, маддий соғисини тапшурди. Бу йәрдә шуниму қошумчә қилиш керәкки, асасий җәң алдида җумһурийәт бай­риғи елип кирилгәндә «Нава» ансамблиниң солисти, Қазақстанниң хиз­мәт көрсәткән артисти Марат Мәмәтбақиев Дө­­ләт гимнини иҗра қил­са, кәчтә өткүзүлгән җәңләрдә башқилар қа­тарида миллитимизниң вәкили Қазақстан Җумһу­рийитиниң хизмәт көрсәткән мәшиқләндүргүчиси, бокс бойичә СССР спорт маһири, Қазақстан Җум­һурийитиниң пәхрий спорт әрбаби, хәлиқара дәриҗидики судья Җалал Җамалов қазилиқ қилди. «Нава» ансамблиниң қиз­­­лири дилраба вә әв­ришим уссуллири билән жиғилғанларниң көңлидин чиқти. Кәчкә пәхрий меһман сүпитидә шундақла Қа­зақстан Җумһурийити Пар­ламенти Мәҗлисиниң депутати Шаһимәрдан Нурумов, Қазақстан Бокс федерациясиниң пәхрий президенти Бекет Махмудов, Алмута шәһәрлик Бокс федерациясиниң президенти Бауыржан Оспанов, Олимпиада чемпиони Серик Сәпиев, Рио-де-Жанейро Олимпиадисида күмүч медальға еришкән Василий Левит қатнашти. Мәзкүр бокс мәйри­мидин чүшкән барлиқ ахча «Дом» җәмийәтлик фондиға тапшурулди.

Сүрәтләрдә: 1.Р.Аб­ду­саламов А.Абду­­рах­ма­новни тәбрикләватиду. 2. И.Ак­бербаев.

Шөһрәт МӘСИМОВ.