• Йеңилиқлар
• 29 Қыркүйек, 2016

Партия «пикирләр фабрикисиға» егә болди

«Нур Отан» партияси йенида Сәясий тәһлил вә стратегиялик тәтқиқатлар  мәркизи қурулди.  Партия Рәисиниң биринчи орунбасари Мухтар Қул-Мухаммедниң мәркәзни тонуштуруш мәрасимида тәкитлигинидәк, йеңи «пикирләр фабрикиси» Дөләт рәһбириниң тапшурмиси бойичә ечилди.— «Нур Отан» партияси Сәясий кеңишиниң бийил 6-майда болуп өткән мәҗлисидә Нурсултан Назарбаев партияниң йетәкчи күч сүпитидә идеяләр уютқуси болуши керәклигини, буниң үчүн униңға күчлүк аналитикилиқ мәркәз қуруши зөрүрлүгини тәкитлигән еди. Бүгүн биз Лидеримизниң тапшурмисини утуқлуқ орунлидуқ, дәп мәғрурланған һалда елан қилалаймиз, — деди Мухтар Қул-Мухаммед.

Мәркәзгә социология пәнлириниң намзити Юлия Кучинская рәһбәрлик қилиду. — Сәясий партияләр өз стратегиясини тәйярлиғанда, сәясий қарарларни қобул қилғанда өзлириниң тәтқиқат топлириниң аналитикилиқ материаллириға вә тәхминлиригә асаслиниду. Әнди АҚШ, Бүйүк Британия, Россия, Хитай, Япония вә Европа иттипақиниң йетәкчи сәясий партиялири охшаш биздиму өзимизниң «пикирләр фабрикиси» бар, — дәп тәкитлиди мәркәзни тонуштуруш мәрасимида униң мудири. Стратегиялик тәтқиқатлар мәркизиниң асасий йөнилишлири төвәндикичә: Қазақстан аләмшумул җәриянларда, йеңи шараиттики «әқиллик ихтисат», әхбарат бехәтәрлиги, дөләт вә партия программилириниң нәтиҗидарлиғини тәһлил қилиш, партиявий системини тәрәққий әткүзүш, җәмийәтлик пикир мониторинги вә уни тәхмин қилиш шундақла моҗут проблемиларни  чоңқур тәһлил қилипла қоймай, бәлки уларни һәл қилиш бойичә тәклипләрни бериш. Юлия Кучинская мәркәз стратегиясиниң очуқлуқ, илмий җәһәттин асаслиқ, объективлиқ принциплириға асаслинидиғанлиғини тәкитлиди. Униң пикричә, йеңи қурулум «Нур Отан» партияси үчүн сүпәтлик аналитикилиқ әхбарат, «әқиллик билимләр» вә инновациялик яндишишлар мәнбәси болушқа тиришиду. Шу нәрсә диққәткә сазавәрки, мәркәзни тонуштуруш мәрасиминиң мошу дүшәнбә  күни өткинигә қаримай, униң хадимлири хелидин буян паал иш елип бериватиду. Мәсилән, һазирниң өзидә мәмликәттики иҗтимаий-сәясий әһвални үгинишниң йеңи методологиясини тәйярлаш ишлири жүргүзүлүватиду. Мәркәз Астана шәһиригә орунлишиду, бирақ «Нур Отан» партиясиниң барлиқ инфрақурулуми вә ресурслири униң ихтиярида болиду. Йеңи мәркәзни тонуштуруш мәрасимида шундақла Қазақстан Гражданлиқ альянсниң президенти Нурлан Еримбетов, Қазақстан Стратегиялик тәтқиқатлар институтиниң мудири Ерлан Қарин, «Туран» университетиниң ректори Рахман Алшанов, Евразия аналитикилиқ мәркизиниң рәһбири Никита Мендкович, Парламент Сенатиниң депутати Ахан Бижанов, мәркәзниң эксперти, хәлиқара сәясәт бакалаври Есет Шәкенов сөзгә чиқти.