• Хуш хәвәр
  • 29 Қыркүйек, 2016

Апирин, саңа Раушан!

Рио-де-Жанейро шәһиридә язлиқ Олимпиада оюнлири аяқлашқандин кейин, бу йәрдә мүмкинчилиги чәкләнгәнләрниң Паралимпиада оюнлири өтти. Уйғур наһийәсидин Раушан исимлиқ қизимизму бу мусабиқигә йолланма алған еди. Көпчиликниң тилиги вә нийити әмәлгә ешип, Раушан Қойшыбаева (сүрәттә солда) пауэрлифтинг бойичә салмиғи 113 килограмм штангини беқиндуруп, күмүч медальға еришти. Раушанниң бойидики ирадиси, спортқа болған муһәббити вә Елимиз рәһбириниң ишәнчиси униң егиз чоққилардин көрүнүшигә түрткә болди.

Өткән һәптиниң жүмә күни Раушан Уйғур наһийәсигә қайтти. Уни тақәтсизлик билән күткән жутдашлири мәркизий мәйданға лиқ толди. Уларниң арисида мәһкимиләр хадимлири, устазлар вә оқуғучилар, йеза вә мәһәллиләрдин кәлгән яшлар билән ақсақаллар хелә нурғун болди. Мәйданға Раушанниң сүрити вә мәдһийилигән сөзләр йезилған шиарлар илинди. Һәтта Чонҗидики 4-мәктәпниң әллик оқуғучиси Раушанниң рәсими чүширилгән футболкиларни кийивапту. Раушан Қойшыбаева бала-чақилири билән көрүшүп, сеғиниш отини басқандин кейин Улуқ Вәтән уруши қурванлириға орнитилған ядикарлиққа гүлчәмбәр қойди. Андин кейин һәрбий оркестр наһийәниң шәнини һәшләргә көтәргән қизни мәркизий мәйданғичә узитип кәлди. Раушанни көргән жутдашларниң хошаллиғида чәк болмиди. Уни сәһнигә йетиләп чиққан наһийә һакиминиң чеһридинму миннәтдарлиқ изналирини сезивелиш тәс әмәс еди. «Ярайсән, Раушан. Сән һәқиқий қәһриман!» дегән авазлар әтрапни чаң кәлтүрди. Айрим көңли юмшақ жутдашлар хошаллиғидин көзлиригә яш алди. Сәһнигә көтирилгән риясәтчиләр Рио-до-Жанейро шәһиридә өткән Паралимпиада оюнлирини шеирий мисралар билән йәткүзүп, Раушанға һөрмәт билдүрди. Тәбрик сөзгә чиққан наһийә һакими Алимҗан Тохтасунов Раушанға сәмимий тиләклирини билдүрүп, униң  йолдишиға вә қейинанисиға чапан япти. Омаққинә үч қизиға әсләтмә сүпитидә соғилар тапшурди. Һаким, шундақла Раушанға «Уйғур наһийәсиниң Пәхрий граждини» бәлгүсини тапшурди. Спортниң қудритиму яки һаятқа болған хуштарлиқму, әйтәвир, Раушанниң бойида бир тилсим күч бар. Йеши әлликтин ешип қалсиму, күч-ирадиси толуп-ташқан. Чонҗидики 1-мәктәп оқуғучилири тәйярлиған флешмоб мәрасимни техиму җанландуруп, пауэрлифтингниң қир-сиридин учур бәрди. Чарә-тәдбир давамида жутдашлар Раушанни тәбриклишип, әсләтмә үчүн сүрәткә чүшти. Шахризада САБИТОВА, Уйғур наһйәси.

447 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы