• Йеңилиқлар
  • 06 Қазан, 2016

Униң орни бөләк еди

Досттин айрилиштәк еғир җудалиқ йоқ екән. Чүнки бу һаятта вақтиң көпинчә шу қәдинаслар билән өтидекән. Ахирқи жигирмә жилда Маликҗан Исмайилов иккимиз һеч айрилмиған едуқ. Булту күзниң мошундақ иссиқ күнлириниң биридә ағиниләрниң биридин: «Маликҗан һаяттин өтүпту» дегән шум хәвәр кәлди. «Техи йеңила иккимиз сөзләшкән едуққу» дәп зарлап қалдим. Әгәр у һаят болса, мошу күнләрдә 70 яшқа толатти...

Маликҗан иккимиз буниңдин жигирмә жил илгири Алмутиниң Султанқорған мәһәллисидә тонушқан едуқ. Бу һаятта бәзибир адәмләр баркән, улар билән  биринчи учришиштин кейинла, худди кона тонушлардәк, қәдинас болуп кетисән. Биз шундақлардин едуқ. Униң билән һәрқандақ мавзуға узақ, зерикмәй сөзлишишкә болатти. Ағинәмниң билими, әқил-парасити, дунияға көзқариши, адәмләргә болған мунасивити мени қайил қилатти. У һәзил чақчақиму майил еди. Өткәндила иккимиз елимизда йүз бериватқан ихтисадий боһран һәққидә хелә узақ муңдашқан едуқ. Бәш қол бирдәк болмиғинидәк, адәмләрниңму мүҗәз-хулқи һәрхил. У һәрқандақ ишқа ойлинип, еғир-бесиқлиқ билән тутуш қилатти. Техи йеқиндила униң идарисидә олтирип, бир чинә чай әтрапида сөһбәтләшкән едуқ. Өткәндила униң қизиниң тойини ойниведуқ. Биринчи нәврисиниң туғулған күниму техи түнүгүнла нишанливеди. Ейтмақчи, ағинәм наһайити балиҗан болидиған. Вақтиниң қислиғиға қаримай, бала тәрбийисигиму көп көңүл бөлди. Нәврилириниму өзи тәрбийиләвататти. Мана һәш-пәш дегичә, ағинәмдин айрилғинимға аридин бир жил өтүпту. Мән Маликҗан билән арилишиш җәриянида, униң ата-аниси һәққидиму көп мәлуматларға егә болдум. Атиси Әлқәм ака колхоз рәиси, парторг охшаш җавапкәр хизмәтләрдә болған. Аниси Пәнзәт – көп балини тәрбийиләп қатарға қошқан Қәһриман ана. Маликҗан 1946-жили Әмгәкчиқазақ наһийәсиниң Ават йезисида дунияға келиду. Оттура мәктәптин кейин у алий оқуш орниға чүшүп, инженер-механик кәспини егиләп чиқиду вә әмгәк паалийитини аддий слесарьдин башлап, ахири автоколонна башлиғи дәриҗисигә йетиду. Кейинирәк Маликҗан Әвезов наһийәлик турушлуқ өй башқармиси башлиғиниң орунбасари хизмитини атқуриду. У өзиниң әмгәксөйгүчлүги түпәйли көплигән мукапатларни елишқа муйәссәр болди. Маликҗанниң сүрити та һөрмәтлик дәм елишқа чиққичә һөрмәт тахтисидин чүшмәй кәлди. Пенсиягә чиққандин кейин мәзкүр наһийә турғунлириниң бирләшкән кооперативиға рәһбәрлик қилди. Бир нәччә қетим сайлам участкилирини башқурди. Шуниң билән биллә у җәмийәтлик ишларниң паал иштрақчиси еди. У жумһурийәтлик Уйғур этномәдәнийәт мәркизиниң паалийитигә йеқиндин арилашқан миллитимиз вәкиллириниң бири. Хуласиләп ейтқанда, у вақитни ғенимәт пайдилинишни биләтти. Униң һаяти пәқәт әмгәк билән өткән десәм, хаталашмаймән. Маликҗан өмүрлүк җүпти Гүлбанум билән икки пәрзәнт тепип қатарға қошти. Ейтмақчи, Гүлбанум Алмута шәһириниң гүллинишигә өзиниң салмақлиқ һәссисини қошуватқан, тонулған лайиһичи һәм қурулушчи. Уларниң қизи Диләрәм жирик қурулуш ширкитиниң биридә баш инженер болуп ишләватса, оғли Нариман җумһурийәттики чоң қурулуш ширкитиниң баш мудири. Һазир Маликҗанниң йоқлуғи мениң һәрбир қәдимимдә билинмәктә. Ағинәмниң орни бөләк еди... Ғәйрәт МӘМӘТӘЛИЕВ,Султанқорған мәһәллисиниң баш жигитбеши. Алмута шәһири.

437 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы