• Яднамә
  • 06 Қазан, 2016

Исми жутдашлириниң қәлбидә қалди

Буниңдин қириқ күн муқәддәм исми-шәрипи яркәнтликләргә яхши мәлум болған Үсүпҗан Баратов жутдашлирини қарилиққа  қалдуруп, бақилиқ болуп кәтти. Мәрһумни ахирқи сәпәргә узитиш мәрасимиға иштрак қилғучиларниң адәттин ташқири көп болғанлиғи һәм қарилиқ митингисида сөзгә чиққучиларниң қәлб қетидин орғуп чиққан видалишиш  сөзлири Үсүпҗан Баратовниң  жутта қанчилик    иззәт-һөрмәткә, аброй-инавәткә егә болуп өткәнлигидин рошән дерәк берип туратти.

 Һәқиқәтәнму, мәрһум  өзиниң қәйәрдила болмисун адил хизмәт қилғанлиғи, қолидин келишичә адәмләргә яхшилиқ қилишқа  тиришип өткәнлиги чоң-кичик яркәнтликләргә яхши мәлум еди. Шуңлашқиму у жут әһлиниң  сәмимий һөрмәт-илтипатиға бөлинип  өтүведи. Әдлийә саһасиниң    салаһийәтлик хадими сүпити билән һәрқандақ мәсилини адиланә, принципиаллиқ   түрдә   һәл қилишқа  тиришатти. Үсүпҗан Баратов 1943-жили тарихий Вәтинимизниң Или вилайитидики Чинпәңзә шәһиридә муәллим аилисидә дунияға  кәлгән. Он икки яшқа толғанда, қелиплашқан вәзийәткә бола, ата-аниси билән Қазақстанға көчүп чиқишқа мәҗбур болиду. Дәсләп Көкшетав вилайитидики Чкалов  наһийәсигә  қарашлиқ «Коммунизм» колхозиға орунлишиду.    Аридин бираз вақит өтүп, Қирғизстанға көчүп  бариду.  Буниңға у йәрдики    уруқ-туққанларға уқақ тартқанлиқ сәвәп болған еди. Мана мошундақ көчүп-қонушлар  Үсүпҗанниң оқуп, билим елишиға сәлбий тәсирини тәккүзмәй қоймиди. Нәтиҗидә мәктәпкә, тәңтушлириға нисбәтән, бир-икки жил кечикип барди. Хәлиқ арисида «Исһақ әпәнди» дәп атилип кәткән өз дәвригә нисбәтән көзи очуқ атисиниң тәсири болуши керәк, униңда оқушқа  дегән иштияқ әшу балилиқ чағлиридинла күчлүк еди. 1958-жили бу аилә Яркәнткә келип орунлишиду. Мошу шәһәрдә оттура мәктәпни тамамлиған Үсүпҗан 1966-жили,  һәрбий хизмитини ада қилип кәлгәндин кейин, «Октябрьниң 40 жиллиғи»  колхози комсомол тәшкилатиниң  кативи болуп паалийәт елип бариду.  Егилик чоң болғанлиқтин, тәшкилатта  һесапта турған комсомол-яшларму сан жәһитидин алдинқи орунда еди. Униң үстигә егиликни һәрқандақ адәмни ишчанлиғиға қарап баһалашқа адәтләнгән, наһайити тәләпчанлиғи билән  пәриқлинидиған Н.Головацкий башқуратти. Үсүпҗан Баратовниң  тәшкилий қабилийити, адәмләр билән ишләшни билидиғанлиғи инавәткә елинип, кейинки жиллири наһийәлик кеңәш иҗраий    комитети тәшкилий бөлүминиң башлиғи, Яркәнт  шәһәрлик кеңишиниң    кативи, андин иҗраий комитет рәисиниң орунбасари, наһийәлик аһалини иҗтимаий һимайә қилиш бөлүминиң  башлиғи, наһийәлик әмгәк билән тәминләш бөлүминиң баш мутәхәссиси қатарлиқ лавазимлиқ хизмәтләргә тайинланди. Билим елишқа болған тәшналиғи түпәйли ишләп жүрүп, С.Киров  намидики Қазақ дөләт  университетиниң қанун факультетини    сирттин оқуп, тамамлиди. Әшу күнки  дәпин  қилиш мәрасимида сөзлигән жутдашлири    Үсүпҗан Исһақ оғлиниң исми яркәнтликләр қәлбидә һәрқачан сақлинидиғанлиғини алаһидә тәкитләп өтти. Дәрһәқиқәт, аңлиқ һаятини    жут әһлиниң мәнпийити йолида адил хизмәт қилиш билән өткүзгән мәрһумниң исми унтулмайдиғанлиғиға ишәнчимиз камил. Нурәхмәт ӘХМӘТОВ.

181 рет

көрсетілді

0

пікір
Алдыңғы мақала Устаз әҗри
Келесі мақала Қериндашниң оти бөләк...

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

18 Қараша, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы