• Йеңилиқлар
• 06 Қазан, 2016

Сайлиғучилири билән учрашти

Пәқәт Қазақстандила әмәс, шундақла Оттура Азиядә тәңдиши йоқ «Яркәнт крахмал-ширнә заводи» җавапкәрлиги чәкләнгән йолдашлиғиниң мудири Закирҗан Қузиев (сүрәттә солдин иккинчи) бийилқи йәрлик мәслиһәтләр сайлимида Алмута вилайәтлик мәслиһәтниң депутати болуп сайланған еди. Йеқинда новәттики қетим өзиниң сайлиғучилири билән учрашти.Алди билән Закирҗан Қузиев «Нур Отан» партияси наһийәлик шөбисиниң қобулханисида җамаәтчилик вәкиллирини қобул қилди. Бу күни депутатқа шәхсий мәсилиси бойичә алдин-ала тоққуз адәм йезилипту. Партия шөбиси рәисиниң биринчи орунбасари Қанат Досмайилов, наһийәлик мәслиһәтниң кативи Ермек Нурахметов, наһийәниң Ренат Ғожамбәрдиев, Айнагүл Смаилова, Ғалия Сақиева, Равил Дуганов охшаш турғунларниң турушлуқ өй селиши үчүн йәр елишиға, мүмкинчилиги чәкләнгән балилар мәркизини қурушқа ярдәмлишиш охшаш һәрхил тәләп-еһтияҗлири вә илтимаслири билән тәпсилий тонушуп, һәрбир мәсилиниң иҗабий һәл қилишиға тиришидиғанлиғини тәкитлиди.

Бу қобул қилиштин кейин депутат «Яркәнт крахмал-ширнә заводиға» кәлди. Заводниң мәҗлисләр залида уни Панфилов наһийәлик җәмийәтлик кеңәш әзалири билән завод ишчилири елимиз Мустәқиллигиниң 25 жиллиғиға мунасивәтлик уюштурулуватқан «дүгләк үстәл» әтрапидики баш қошушқа тәклип қилди. Бу йәрдә Социалистик Әмгәк Қәһримани Күләш Айтжанова башлиған әмгәк мәрданилири, Яркәнт шәһириниң һакими вә униң орунбасарлири, наһийәниң Пәхрий гражданлири жиғилипту. «Дүгләк үстәлни» шәһәр һакиминиң орунбасари Айдин Келемсейит ечип мундақ деди: — Бизниң әҗдатлиримиз арман қилған мустәқилликкә еришкинимизгә 25 жил болди. Әсиргә бәргүсиз жигирмә бәш жил ичидә елимизни пүткүл дуния тониди. Президентимизниң ички сәясәттики даналиғи, әтини пәмләшни билидиған парасити түпәйли хәлиқ мәнпийити үчүн иҗтимаий-ихтисадий ислаһатлар әмәлгә ашурулди. Уларниң бир нәтиҗисини бүгүн Закирҗан Пирмәһәмәт оғли башқурған мошу заводтин көрүватисиләр. Андин натиқ сөзини әмгәк ветерани, наһийәниң Пәхрий граждини Галина Молчановаға бәрди. У тәвәниң бүгүнки турмуш-тирикчилиги һәққидә ейтип, иҗтимаий-ихтисадий саһаларда елип бериливатқан чарә-тәдбирләргә, елимиз Президентиниң мәктүплиридә алға сүрүлгән вәзипиләр билән тапшурмиларға тохтилип, бүгүн җумһурийитимиздә тәңдиши йоқ заводни селип, дөләт программилириға әмәлий җавап бериватқан, яшларни турақлиқ иш билән тәминләватқан Закирҗан Қузиевқа миннәтдарлиғини изһар қилди. Баш қошушта Қазақстан хәлқи Ассамблеясиниң әзаси Реһимҗан Тохтахунов, пешқәдәм устаз, «Яркәнтниң җанкөйәри» җәмийәтлик фондиниң рәиси Санийәм Зулиярова, наһийәлик Уйғур этномәдәнийәт мәркизиниң рәиси Дилшат Насиров, Славян этномәдәнийәт мәркизиниң рәиси Галина Борисова, Туңган мәдәнийәт мәркизиниң рәиси Исмаз Лосанов вә башқилар наһийәдики милләтлар достлуғиниң сақлинип, мустәһкәмлиниватқанлиғини тилға алди. Андин сөз новитини алған вилайәтлик мәслиһәтниң депутати Закирҗан Кузиев өзи рәһбәрлик қиливатқан заводта ишләватқан ишчиларниң 84 пайизиниң яшлар екәнлигини, улар илғар технологияләрдин утуқлуқ пайдилиниватқанлиғини, ишләпчиқириш җәрияни 80 пайиз автоматлаштурулған заводниң мустәқилликниң мевиси екәнлигини тилға алди. Шуниңдин кейин Закирҗан Қузиев Яркәнт шәһиридики «Мейірім» қерилар өйигә берип, у йәрдики 320 муһтаҗ җанға 1 миллион 600 миң тәңгилик һаҗәтликләрни ианә қилди. Чүштин кейин Закирҗан Пирмәһәммәт оғли Пәнҗим йезисидики деханлар билән учрашти. Хаманда ашлиқ хиллап, уни қурутуватқан деханларни ойландуруватқан соалларға ениқ вә қанаәтлинәрлик җавап бәрди.

Гөһәрбүви ИСМАЙИЛҖАНОВА,

 Панфилов наһийәси.