• Билим беғиниң бағвәнлири
• 17 Қазан, 2016

Мәктәп – кемә, билим – деңиз, устаз – дәрәқ, шагирт – мевә

Өткән һәптидә уйғур наһийәсиниң мәркизи Чонҗа йезисиниң Мәдәнийәт өйидә устазлар мәрикиси тәнтәнилик рәвиштә нишанлинип өтти. Мәдәнийәт өйиниң ичи бу қетим алаһидә безәндүрүлүпту. Чарә-тәдбиргә әтигән кәлгән тамашибинлар сәһниниң икки қанитиға илинған билбордтики устазларниң мувап­пәқийәтлиридин бәһри­ман болушти. Сәһнидики һәр­хил шариклардин ясалған күзлүк йопурмақлар билим мәвсүминиң башланғанлиғидин дерәк бәргәндәк. Бәлгүләнгән вақитта риясәтчиләр бу күнниң алаһидилигигә тохталди. Устазларниң тинимсиз әмгигигә баш әккән шагиртлар тамашибинлар қатарида олтарған устазлар әһлигә гүлдәстиләрни тәғдим қилди. Устазларни тәбрикләш үчүн наһийә һакиминиң орунбасари Қуралбек Бекмухамбетов минбәргә көтирилип, өзиниң иллиқ тиләк һәм нийәтлирини билдүрди. Андин натиқ билим саһасида тинимсиз әмгәк етиватқан устазларға наһийә һакиминиң Пәхрий ярлиқлирини тапшурди.

Бу күни бар изгү тиләкләр, нахша-сазлар билим бағвәнлиригила беғиш­ланди. 1-Чонҗа оттура мәк­тивиниң оқуғучилири бү­гүнки һаяттин көрүнүш кәби флешмоб тәйярлап, тәдбир иштракчилириниң гүлдүрлидигән чаваклириға еришти. Балилар бағчилириниң тили һәсәлдәк татлиқ тәрбийиләнгүчилири қазақ хәлқиниң батурлири сүпитидә кийинип чиқип, устазларға тиләклирини билдүрди вә «Батурлар» уссулини иҗра қилди. Билим чириғини яққан устазларға хуш кәйпият вә арамбәхш жәмләрни һәдийә қилған мәйрәмлик жиғин «Устазим» нахшиси билән тамамланди. Шахризада САБИТОВА. Уйғур наһийәси.