• Спорт
• 31 Қазан, 2016

«Олимпиакостинму» йеңилип қалди

Өткән пәйшәнбә күни Грекияниң Пирей шәһиридә йәрлик «Олимпиакос» Европа лигисиниң топлуқ турнирида «Астана» клубини 4:1 һесави билән тиз пүктүрди. Растини ейтиш керәкки, грекларниң өз мәйданида Қазақстан командисиға пай «соға» қилидиғанлиғиға ишәнмисәкму, жутдашлиримизниң чоң һесап пәрқи билән йеңилидиғанлиғини ойлимиған едуқ.

Бу күни астаналиқлар оюнниң 25 минутиғичила рәқивиниң қисимиға қаршилиқ көрситәлиди. Матчниң бу қисмида мәйдан егилири кәйни-кәйнидин дегидәк үч поңзәк киргүзүп, учришиш тәғдирини өзлириниң пайдисиға һәл қилип болди. Оюнниң 54-минутида «Астана» командисиниң оюнчиси Жуниор Кабананга бир поңзәк киргүзүп, пәриқни бираз қисқартқандәк болди. Бирақ көтирәңгү кәйпиятимиз узаққа созулмиди. Учришишниң 58-минутида бизниң Рохер Каньяс иккинчи әскәртиш қәғизигә «сазавәр болуп», мәйдандин қоғланди. Аридин йәттә минут өтә-өтмәйла «Олимпиакосниң» тәркивидики бразилиялик легионер Себа мошу матчтики иккинчи поңзигини киргүзүп, һесапни 4:1 йәткүзди вә оюнға үзүл-кесил чекит қойди. Бу күни «В» топидики йәнә бир матчта «Янг Бойз» Кипрниң АПОЭЛ клубини 3:1 һесави билән йәңди. Шундақ қилип, «Астана» Европа лигисиниң плей-офф қисмиға йолланма алаламду яки йоқму? Нәзәрийәвий җәһәттин елип қариғанда, командиниң имканийити бар. Униң үчүн қалған үч матчта кам дегәндә йәттә пайға егә болуши керәк. Әнди әмәлияттичу?.. Новәттики турда 3-ноябрь күни «Астана» «Олимпиакосни» қобул қилиду. Шөһрәт МӘСИМОВ.