• Әдәбият гүлзари
• 03 Қараша, 2016

Шеирийәт беғиниң булбули

Йеқинда Ақтам оттура мәктивиниң мудири Октябрь Һезмахуновниң тәшәббуси билән атақлиқ шаир Илия Бәхтияниң иҗадийитигә беғишланған әдәбий кәч болуп өтти. «Бейбітшілік әлемі» хәлиқара иҗадий бирләшмиси тәрипидин қоллап-қувәтлинип өткән бу кәчкә униңға мәзкүр бирләшминиң вице-президенти, җумһурийәтлик Уйғур этномәдәнийәт мәркизиниң башқарма әзаси Турсун Розиев, хәлиқара Язғучилар иттипақиниң әзаси, шаир Абдулһәй Дөләтов вә Илия Бәхтияниң җийәни, истипадики подполковник Шаһам Молотов қатнашти. Кәчтә қазақ вә уйғур тили пәнлириниң муәллимлири Сәнә­бәрхан Сонурованиң рәһбәр­лигидә оқуғучилар шаир иҗадийитидин шеирларни ядқа ейтти. Шундақла Илия Бәхтияниң балилар әдәбиятидики орни, шаирниң сатира жанридики әмгәклири вә лирикиси бойичә мошу қурларниң муәллипи доклад оқуди. Андин шаирниң сөзигә йезилған «Уйғурларни тонуштуруш» нахшиси билән кәчни давам қилди. Тәкитләш керәкки, 11-синип оқуғучиси Бекарыс Ыдырысовниң «Жаным қазақ», «Солдат аниси» нахшиси, 9-синип оқуғучилири орунлиған сәһнилик көрүнүшләр, 2-синипниң оқуғучилириниң «Учуп кәтти қақирлар» нахшиси вә «Гүлтавақ» усули һәм кәчниң ахирида иҗра қилинған «Атамекен» нахшилири Ақтам оттура мәктивидики хәлиқләр достлуғиниң алий дәриҗидә екәнлигидин вә өзгә милләтләр мәдәнийитигә болған һөрмәтниң жуқури екәнлигидин далаләт бәрди. 1 — 11-синип оқуғучилири қатнашқан бу кәчниң йәнә бир алаһидилиги шуки, шаирниң шеирийитини пәқәт уйғур балилирила әмәс, бәлки  қазақ шаири Мамытқан Қудайбергеновниң тәрҗимисидә дөләт тилидиму яңриди.  Мәсилән, 11-синип оқуғучилири Әлия Булалованиң «Ол менің көктемім», 9-синип оқуғучиси Айнур Ауғанбаеваниң «Өмір тамшылары» шеирлирини ядқа ейтиши тамашибинларда алаһидә тәсират қалдурди. Ахирида шаир Абдулһәй Дөләтов қатнашқучиларни тәбрикләп, мәктәп мудири Октябрь Турған оғлиниң маарип саһасидики әмгигини жуқури баһалап, униңға «Бейбітшілік әлемі» иҗадий бирләшмисиниң «Лидер образования» медалини, музыка пәни муәллими Абдурсул Сасиковқа «Хәлиқләр достлуғи» бәлгүсини, қазақ тили пәни муәллимлири Ахылқаса  Кегенбаева, Гульнара Мусақулова вә уйғур тили пәни муәллимлири Адиләм Мурадилова билән Сәнәбәрхан Сонуроваға Пәхрий ярлиқ тапшурди. Аршалим ДӘВЛӘТОВ, Ақтам оттура мәктивиниң педагог-уюштурғучиси. Уйғур наһийәси.