• Йеңилиқлар
• 03 Қараша, 2016

Президент һозурида

Нурсултан Назарбаев «Самруқ-Қазына» акционерлиқ җәмийити башқармисиниң рәиси Өмирзақ Шөкеевни қобул қилди. Учришиш давамида Өмирзақ Шөкеев Дөләт рәһбиригә «Самруқ-Қазына» акционерлиқ җәмийитиниң мошу жилниң тоққуз ейидики паалийитиниң йәкүнлири, шундақла өзгәртиш һәм хусусийлаштуруш программилирини әмәлгә ашурушниң кетип бериши тоғрилиқ доклад қилди. Фондниң мошу вақит ичидики малийә вә ишләпчиқириш көрсәткүчлириниң өскәнлиги тәкитләнди. Җүмлидин фонд алған пайда өткән жил билән селиштурғанда 115 пайиз өсти. Хусусийлаштуруш программиси даирисидә фонд топиниң 216 объектини риқабәтчи муһитқа чиқириш планланди. Бүгүнки күнгә қәдәр ихтисатни йеңилаш мәсилилири бойичә дөләт комиссияси билән 133 активни сетиш усули келишип, умумий баһаси 7,4 миллиард тәңгә болған 39 актив сетилди. Нурсултан Назарбаев «Самруқ-Қазына» акционерлиқ җәмийитини нәтиҗидарлиқ өзгәртишни ашурушниң вә ениқ нәтиҗиләрни қолға кәлтүрүшниң зөрүр екәнлигигә диққәт ағдурди. Учришиш йәкүни бойичә Дөләт рәһбири бирқатар ениқ тапшурмиларни бәрди. *** Дөләт рәһбири миллий ихтисат министри Қуандық Бишимбаевни қобул қилди. Учришишта Қуандық Бишимбаев Дөләт рәһбиригә Қазақстанниң мошу жилниң тоққуз ейидики иҗтимаий-ихтисадий тәрәққиятиниң йәкүнлири, шундақла транспорт инфрақурулумини тәрәққий әткүзүшниң вә ихтисатни қоллап-қувәтләшниң асасий васитиси болған «Нұрлы жол» программисини орунлашниң кетип бериши тоғрилиқ доклад қилди. Президент ихтисадий тәрәққият сүръитини техиму чапсанлитишниң, аһалиниң иҗтимаий паравәнлигини ашурушниң, ихтисатни қоллап-қувәтләш һәм асасий дөләт программилирини әмәлгә ашуруш үчүн бөлүнүватқан бюджет вә Миллий фонд мәблиғини теҗәмлик һәм нәтиҗидарлиқ пайдилинишниң зөрүр екәнлигигә диққәт ағдурди. Миллий ихтисат министри өз докладида 2016-жилниң тоққуз ейида умумий ички мәһсулатниң 0,4 пайиз көпәйгәнлигини тәкитлиди. — Қурулуш вә транспорт саһалири, мәһсулат ишләш санаити вә йеза егилиги ихтисатниң өсүшиниң асасий һәрикәткә кәлтүргүчи күч болуп һесаплиниду. Мәсилән, қурулуш саһасида көләм 6,9, йеза егилигидә — 4,9, транспорт саһасида –  4, мәһсулат ишләш санаитидә 0,6 пайиз көпәйгән. Шуниң билән бирқатарда металлургия вә фармацевтика мәһсулатини, озуқ-түлүк вә нефтьни қайта ишләш мәһсулатлирини чиқиришниң өсүватқанлиғи байқалмақта, — деди Қуандық Бишимбаев. Униңдин ташқири Президентқа «100 қәдәм» Милләт плани даирисидә «Индустрияләштүрүш вә ихтисадий өсүш» үчинчи институционал ислаһатни орунлашниң кетип бериши тоғрилиқ әхбарат берилди. Учришиш йәкүни бойичә Нурсултан Назарбаев бирқатар ениқ тапшурмиларни бәрди. *** Нурсултан Назарбаев ташқи ишлар министри Ерлан Идрисовни қобул қилди. Учришиш давамида Ерлан Идрисов Дөләт рәһбиригә Қазақстанниң БДТ Бехәтәрлик Кеңишиниң әзаси сүпитидә 2017-жили январьдин тартип башлинидиған ишиға тәйярлиқ көрүшниң кетип бериши тоғрилиқ доклад қилди. Президент ташқи сәясий паалийәтни әмәлгә ашурғанда җумһурийәт Мустәқиллигиниң 25 жиллиғиға диққәт ағдурушниң зөрүр екәнлигини тәкитлиди. Бизниң әлчиләр чәт әл җамаәтчилигигә мәмликәтниң өткән 25 жилдики утуқлирини, җүмлидин мәмликәтниң хәлиқара абройини ашуруш мәхситидә Қазақстанниң җумһурийәтниң сиртида течлиқ вә хатирҗәмликни сақлашқа қошқан һәссисини көрситиши керәк, — деди Нурсултан Назарбаев. Шуниң билән биллә Дөләт рәһбири чәт әлләр рәсмий делегациялириниң мәмли­кити­мизни зиярәт қили­шиниң муһим екәнлигини атап көрсәтти. Президент шундақла БДТ Бехәтәрлик Кеңишиниң әзаси сүпитидә жүргүзүлидиған му­һим чарә-тәдбирләрни атап көрситип, мундақ миссияниң дуниявий бирләшминиң алаһидә ишәнчисиниң көрүнүши болуп һесаплинидиғанлиғини қәйт қилди. Ташқи ишлар министри Бехәтәрлик Кеңишидики паа­ли­йәткә актив тәйярлиқ көрүлү­ватқанлиғи, турақлиқ комитетлар рәһбәрлигини тәхсим қилишниң әмәлгә ашурулуватқанлиғи  тоғ­рилиқ әхбарат  бәрди. Униңдин ташқири Ерлан Ибрисов җумһурийәт Мустәқиллигиниң 25 жиллиқ даирисидә чоң хәлиқара конференцияни өткүзүшниң план­линиватқанлиғи  тоғрилиқ доклад қилди. Ташқи сәясәт идарисиниң рәһбири Президентқа алдимиздики хәлиқара чарә-тәдбирләр, җүмлидин «ЭКСПО-2017» Хә­лиқ­ара көргәзмисини өткүзүш тоғрилиқ әхбарат бәрди. Учришиш йәкүни бойичә Дөләт рәһбири бирқатар ениқ тапшурмиларни бәрди. *** Нурсултан Назарбаев малийә министри Бақыт Султановни қобул қилди. Учришиш давамида Бақыт Султанов Президентқа Малийә министрлигиниң мошу жилниң тоққуз ейидики паалийитиниң йәкүнлири, җумһурийәтлик вә йәрлик бюджетларниң орунлиниши, шундақла 2016-жили 9-сентябрьдә Дөләт рәһбириниң рәислигидә өткән Һөкүмәтниң кәңәйтилгән мәҗлисидә берилгән тапшурмиларниң әмәлгә ашурулуши тоғрилиқ доклад қилди. Нурсултан Назарбаев бюджет җәриянлириниң нәтиҗидарлиғини техиму ашурушқа, ихтисатниң өсүшини рәғбәтләндүрүш бойичә дөләт программилириға нишан қилип, бюджетни шәкилләндүрүштә әқиллик яндишишни қоллинишқа, шундақла хусусийлаштурушниң иккинчи долқунини әмәлгә ашуруш бойичә чариләрни көрүшниң зөрүрлүгигә диққәт ағдурди. — Һәм елимиз, һәм чәтәллик инвесторларға мүлүк сүпитидә дөләт объектлирини бериштә толуқ очуқлуқ вә нәтиҗидарлиқни тәминләш зөрүр, — деди Нурсултан Назарбаев. Униңдин ташқири Дөләт рәһбири мүлүкни қанунлаштуруш акциясиниң аяқлишиватқан басқучиға бағлиқ вәзипиләрни қойди. Җүмлидин акцияни жүргүзгәндә очуқ шараит яритиш, униң муһимлиғи тоғрилиқ сөз болди. — Қанунлаштуруш буниңдин кейин селиқлар һесавиға бюджетни толуқтуруп, ихтисатқа ишләйдиған активларни ениқлаш имканийитини бериду. Бу — селиқ системисиниң асасий вәзипилириниң бири, — дәп тәкитлиди Нурсултан Назарбаев. Малийә министри бийил бюджет кириминиң турақлашқанлиғини вә қанунниң өзгириши һәм нәтиҗидарлиқ ихтисадий сәясәт вә «Нұрлы жол» дөләт программисиниң әмәлгә ашурулуши нәтиҗисидә селиқ һәм бажхана башқурушиниң яхшилиши һесавиға 7,4 пайиз өскәнлигини тәкитлиди. Учришиш йәкүни бойичә Дөләт рәһбири бирқатар ениқ тапшурмиларни бәрди. *** Нурсултан Назарбаев «НАК «Казатомпром» акционерлиқ җәмийитиниң рәиси Асқар Жумағалиевни қобул қилди. Учришиш давамида Асқар Жумағалиев Дөләт рәһбиригә миллий атом компаниясиниң 2016-жилниң 9 ейидики паалийитиниң йәкүнлири тоғрилиқ доклад қилди. Қазақстан Президенти саһа мәһсулатиниң дуниявий базардики үлүш салмиғиниң жуқури екәнлигини тилға алди. – Бизниң вәзипимиз – толуқ ядро йеқилғуси циклиниң барлиқ җәриянлириға қатнишиш. Мошу саһада башқа мәмликәтләр билән өзара һәрикәт дәриҗисини ашуруш зөрүр, – деди Нурсултан Назарбаев. Дөләт рәһбири шундақла диққәтни саһаға мунасивәтлик әмәс активларни чиқириш вә өзгәртиш программисини әмәлгә ашуруш мәсилилиригә җәлип қилди. Миллий атом компаниясиниң башқарма рәиси Қазақстан Президентини Үлби металлургия заводиниң территориясидә завод қурулушиниң техникилиқ-ихтисадий асаслирини тәйярлашниң аяқлашқанлиғидин хәвәрдар қилди. Униңдин ташқири Асқар Жумағалиев бийил имзаланған келишимләр вә чәтәллик шерикләр билән түзүлгән шәртнамиләр, шундақла компания тәркивидин саһаға мунасивәтлик әмәс 26 активниң чиқирилғанлиғи тоғрилиқ ейтип өтти. Учришиш йәкүни бойичә Дөләт рәһбири бирқатар ениқ тапшурмиларни бәрди.