• Әхбаратлар еқими
• 18 Қараша, 2016

Тәбрик телеграммилирини әвәтти

Нурсултан Назарбаев Дональд Трампқа Америки Қошма Штатлириниң 45-Президенти лавазимиға сайлиниши мунасивити билән тәбрик телеграммисини әвәтти. Дөләт рәһбири Қазақстан хәлқиниң вә шәхсән өзиниң намидин тәбрик телеграммисини йоллап, бийил икки мәмликәт оттурисида дипломатик мунасивәтләрниң орнитилғанлиғиға 25 жил толуватқанлиғини тәкитлиди. «Сизниң рәһбәрлигиңиздә Америка Қошма Штатлириниң пүткүл дунияда турақлиқни, бехәтәрликни вә гүллинишни сақлаш мәсилилиридә таянч болуп қалидиғанлиғиға ишинимән», дейилиду телеграммида. Дөләт рәһбири Қазақстанниң 2017 — 2018-жилларда БДТ Бехәтәрлик Кеңишигә турақлиқ әмәс әза болушиниң шериклигимиздики муһим пәйт болидиғанлиғиға ишәнчә билдүрди. «Биз Кеңәшниң ишиға салмақлиқ һәссә қошушқа вә АҚШ билән барлиқ муһим мәсилиләр бойичә қоюқ өзара һәрикәткә тәйяр», дейилиду телеграммида. Ахирида Нурсултан Назарбаев Дональд Трампқа муваппәқийәт тилиди вә Қазақстанға сәпәр билән келишкә тәклип қилди. *** Нурсултан Назарбаев Румен Радевқа Болғария Җумһу­ри­йитиниң Президенти лавазимиға сайлиниши мунасивити билән тәбрик телеграммисини әвәтти. Дөләт рәһбири өз тәбригидә Қазақстан вә Болғария хәлиқлириниң гүллиниши үчүн иккитәрәплимә һәмкарлиқниң күчийидиғанлиғиға ишәнчә билдүрди. Нурсултан Назарбаев шундақла Румен Радевқа саламәтлик вә үнүмлүк иш, болғар хәлқигә бирлик вә паравәнлик тилиди.