• Муштири топлаш — 2017
• 09 Желтоқсан, 2016

Жигитбашлири: муштириларниң сани жигирмә миңдин кам болмаслиғи керәк

Уйғурлар һаятида жигитбашлири әзәлдинла чоң роль ойнайду. Пәқәт биздила һәрбир жуттики той-төкүн, нәзир-чирақ, жуттики тәртип-интизам вә башқиму мәсилиләр әйнә шу жут атилири тәрипидин  назарәт қилиниду. Пәнҗим — Яркәнт тәвәсидики әң чоң жутларниң бири. Улуқ Ипәк йоли бойиға җайлашқан Пәнҗимдиму ата-бовилиримиздин келиватқан урпи-адәт, рәсим-қаидиләрни рәтләштә жигитбашлириниң атқуруватқан иши чоң. Қисқиси, жутниң отидин кирип, сүйидин чиқиватқан шулар. Пәнҗим йеза округиниң тәркивигә Қорғас, Нуркент, Төвәнки Пәнҗим вә Ават йезилири  кириду. Аһалисини асасән уйғурлар билән қазақлар тәшкил қилиду. Бу икки милләт әзәлдин бир-биригә қиз берип, оғул өйләп, иҗил-инақ яшап кәлмәктә. Мәзкүр йеза округида 9500 адәм истиқамәт қилиду. Уларниң 4 миңдин ошуғини уйғурлар тәшкил қилиду, йәни 650 уйғур аилиси бар. Мошу жили муштири топлаш мәвсүми башланғанда ҖУЭМ йенидики Жигитбашлири кеңишиниң рәиси Абдурешит Мәхсүтов «Уйғур авази» гезити муштирилириниң санини жигирмә миңға йәткүзимиз» дегән тәшәббусни көтәрди.  Бу тәшәббусни биз, пәнҗимликләрму, қоллап-қувәтләймиз. Өткән жилларда бу миллий нәшримизгә 400 адәм муштири болған еди. Бу жили биз муштирилар санини 500дин ашурушқа күч селиватимиз. Миллий мәдәнийитимизниң җанкөйәрлири болған жигитбашлири, жут активистлири, ақсақаллар, анилар, яшлар кеңәшлири бу күнләрдә қизғин иш елип бериватиду. Һәрқандақ жутта «уйғур» десә җенини тикидиған милләтпәрвәр инсанлар көпләп санилиду. Бизму әйнә шундақ адәмләрниң күчигә тайиниватимиз. Демәк, келәр жили уйғурниң авази жигирмә миң уйғурниң аилисидә яңрайду. Адилҗан ҒОҖАМБӘРДИЕВ, Пәнҗим йезисиниң баш жигитбеши. Панфилов наһийәси.