• Мукапат мубарәк!
• 16 Желтоқсан, 2016

Конкурс ғалиплири мукапатланди

Йеқинда Астанада ҚХАниң Мустәқилликниң 25 жиллиғиға беғишланған җумһурийәтлик мәдәний-ақартиш лайиһиси даирисидә уюштурулған конкурс ғалиплирини мукапатлаш мәрасими болуп өтти. Қазақстан хәлқи Ассамблеясиниң «Мың бала» лайиһиси даирисидә 109 миң қазақстанлиқ бала дөләт тилини өзләштүрүш дәриҗисини ашурди. Мәрасимға Қазақстан хәлқи Ассамблеяси Рәисиниң орунбасари – Президент Мәмурийити ҚХА кативатиниң рәһбири Ералы Тоғжанов, Парламент Мәҗлисиниң депутатлири, ҚХА әзалири, дөләт органлириниң вәкиллири, иҗадий вә илмий зиялилар қатнашти. Ғалиплар үч номинация: «Тәуелсіздік – тірегім» («Мустәқиллик – таянчим»), «Асыл сөз» («Қиммәт сөз»), «Мемлекеттік тіл – Тәуелсіздіктің тірегі» («Дөләт тили – Мустәқиллик таянчиси») – номинациялири бойичә мукапатланди. – Милләт Лидери Нурсултан Назарбаев мустәқилликниң дәсләпки күнлиридин тартипла дөләт сәяситиниң асаси сүпитидә милләтләрара разимәнлик мәсилисигә чоң диққәт бөлүп келиватиду, – деди ғалиплар алдида сөзгә чиққан Ералы Тоғжанов. – Сөзсизки, көпмилләтлик Қазақстан хәлқиниң бирлиги дөләтчилигимизниң пухта асаси болуп һесаплиниду. Нәқ мустәқиллик түпәйли Қазақстан хәлқиниң әнъәнилири билән урпи-адәтлириниң тәрәққий етиватқанлиғини, менталитетиниң сақлиниватқанлиғини, дөләт тилиниң бейип, риваҗлиниватқанлиғини чүшиниш муһимдур. Қазақстанниң түрлүк регионлириниң «Мың бала» лайиһисигә қатнишип, эссе, инша йезиш вә натиқлиқ маһарәт конкурслириниң ғалиплири аталғанлар – рус, уйғур, немис, корей, беларусь, чечен, татар вә Қазақстан территориясидә яшаватқан башқа милләтләрниң вәкиллири Миллий китапхана залида өз һүнирини намайиш қилди. Миллий кийимләрни кийгән жуқарқи синип оқуғучилири қазақ тилида язған өз иҗадидин шеирларни оқуди, терме, заманивий эстрада нахшилирини иҗра қилди, дөләт тилини қанчилик дәриҗидә өзләштүргәнлигини намайиш қилди. Бийил ҚХА мукапитиға пүткүл Қазақстандин 47 бала сазавәр болди. Лайиһини уюштурғучилар дөләт тилини үгинишниң яшлар арисида аммибаплиққа айлиниватқанлиғини алаһидә тәкитләйду. *** Мукапатланғанларниң арисида уйғур қизлири Дилназ Абдувалиева вә Гүлзабар Абдурешитоваму бар. Уларға мукапатни Қазақстан Җумһурийити Парламенти Мәҗлисиниң депутати Шаһимәрдан Нурумов (сүрәттә) тапшурди. Һәр иккилиси Уйғур наһийәсидин. Дилназ Долата оттура мәктивиниң 11-синип оқуғучиси. Гүлзабар һазир Алмута медицина колледжида оқуватиду. Бу икки қиз «Мың бала» конкурсиға қатнишиш үчүн өзлириниң Қазақстан Мустәқиллигиниң 25 жиллиғиға беғишлап язған эсселирини әвәткән екән. Дилназ билән Гүлзабарниң иҗадий ишлири наһийә вә вилайәт дәриҗисидә өткән конкурсларда ғалип чиқип, җумһурийәтлик конкурсқа йолланма алған еди. Мукапат мубарәк болсун, Дилназ вә Гүлзабар!