• Йеңилиқлар
• 23 Желтоқсан, 2016

Тарихимизниң йеңи дәври

Нурсултан Назарбаев мәмликәтниң барлиқ гражданлирини Қазақстан Җумһурийити Мустәқиллигиниң 25 жиллиғи билән тәбриклиди.Астанада Мустәқиллик җумһурийәт Мустәқиллигиниң 25 жиллиғини нишанлаш мунасивити билән өткүзүлгән тәнтәнилик жиғинға мәмликитимизниң җай-җайлиридин йүзлигән адәм жиғилди. — Мустәқилликниң 25 жиллиғи – бу әвладимизниң вақит һөкүмигә беқинмайдиған мисли көрүлмигән җасарити. Шу нәрсә диққәткә сазавәрки, юбилейлиқ жилда Қазақстан БДТ Бехәтәрлик Кеңишиниң әзаси болуп сайланди. Парламент қобул қилған Мустәқилликниң 25 жиллиғи деларацияси бизниң улуқ утуқлиримиз билән ғалибийәтлиримиз әкис әткән муһим сәясий-һоқуқий һөҗҗәт болди, — дәп тәкитлиди Президент. Нурсултан Назарбаев өз сөзидә Мустәқиллик дәвирдики муһим утуқларға тохталди. Дунияниң әң тәрәққий әткән 30 мәмликитиниң қатариға киришимизни тәминләйдиған чариләр тоғрилиқ сөзләп бәрди. Президент Қазақстанниң оттура синип үлүши көп болған мәмликәткә айлинидиғанлиғиға ишиниду. Кичик вә оттура тиҗарәт умумий ички мәһсулатниң кам дегәндә, 50 пайизини ишләп чиқириду. Әнди умумий ички мәһсулатниң өзи җан бешиға чеқип һесаплиғанда 4,5 һәссә өсүп, 40 — 60 миң долларға йетиду. Миллий  ихтисатниң өсүши әмгәк үнүминиң көпийиши билән тәминлиниду, әмгәк үнүми өз новитидә 5 һәссә — һәрбир хадимға чаққанда 120 миң долларғичә өсиду. Тәрәққиятниң инновациялик үлгисигә көчүш тәминлиниду. Қазақстан ихтисади илим-пәнни көп тәләп қилидиған мәмликәтләр дәриҗисигә йеқинлишиду. Шәһәрләр билән йезиларни сүпәтлик йоллар, транспортниң барлиқ түрлири қатнайдиған чапсан вә бехәтәр маршрутлар бағлаштуриду. Қазақстан билим сүпитиниң рейтинги әң жуқури мәмликәт болиду. Әнди аһали паравәнлигиниң өсүши болса, қазақстанлиқларниң һаят кәчүрүш узақлиғини 82 яшқичә көпәйтиш имканийитини бериду. Аһали сани 25 миллион адәмни тәшкил қилип, униңда 11 миллион адәм ихтисадий җәһәттин актив болиду. Астана 3 миллиондин ошуқ аһалиси бар Евразия мегаполисиға айлиниду. — Мән мәмликитимизни әйнә шундақ тәрәққий әткән, өзини өзи тәминләйдиған вә аңлиқ мәмликәт сүпитидә тәсәввур қиливатимән. Дуния бизни регионал һәм аләмшумул җәриянларниң актив һәм җавапкәр қатнашқучиси сүпитидә баһалайдиған болиду. Бизниң пүткүл қазақстанлиқ йолумиз, әгәр биздә мәхсәт болса, һәрқачан көзлигән йәргә йетидиғанлиғимизни көрсәтти. 2050-жилниң әвлади бизниң улуқ ишлиримизни үгиниду вә мәмликәтни қандақ қуруш керәклигини, боһранларни йеңип, бирликни күчәйтишни үгиниду, — дәп тәкитлиди Дөләт рәһбири. Мәлумки, пүткүл дуния дөләтлириниң рәһбәрлири Қазақстанни Мустәқиллигиниң 25 жиллиғи билән тәбриклиди. Парламент Сенатиниң рәиси Қасым-Жомарт Тоқаев уларни атап өтүп, Президент намиға тәбрик хәтләрни һелиму келиватқанлиғини тәкитлиди. Шундақла тәнтәнилик жиғинда сөзгә чиққан Алий сот рәиси Қайрат Мәми  җумһурийәтниң Мустәқиллик жиллиридики утуқлириға тохталди. — Қазақстанниң бүгүнки қудрити өткән әсирниң 90-жиллири билән селиштурғанда 20 һәссә жуқури, — деди у. – Һөрмәтлик Нурсултан Әбиш оғли, мошу барлиқ утуқлар Сизниң җүръәтлик қарарлириңиз вә дана сәяситиңиз түпәйли қолға кәлтүрүлди. Сиз тарихий истиқбалда бир дәқиқигә баравәр қисқа қәрәлдә қанунниң үстүнлүги һөкүмранлиқ қилидиған демократик һоқуқ дөлитини қурдиңиз, униң турақлиқ тәрәққияти үчүн шараит яраттиңиз. Сиз йеңи пайтәхтимиз — Астана шәһирини Евразия кәңлигидики ярқин юлтузға, Вәтинимизниң жүригигә айландурдиңиз, — деди Алий сот рәиси. — Европидики Бехәтәрлик вә Һәмкарлиқ тәшкилатиға, Ислам һәмкарлиқ тәшкилатиға рәислик қилиш пәқәт Шәриқ билән Ғәрипни бирләштүрүпла қоймай, яш дөлитимизниң абройини мисли көрүлмигән дәриҗигә көтәрди, — деди тәнтәнилик жиғинда сөзгә чиққан «Нур Отан» партияси Рәисиниң биринчи орунбасари Мухтар Қул-Мухаммед. – Сиз ШҺТниң тәшәббускари, Евразия иттипақиниң асасий бирләштүргүчиси болдиңиз вә АӨҺИЧКни қурдиңиз. Бу тәшәббуслар мәмликитимизни дуниядики җиддий, абройлуқ геосәясий оюнчи сүпитидә тонутти. Тәрәққий әткән Европа дөләтлири арисида 2017-жили өткүзүлидиған ЭКСПО конкурсида ғалип чиқиш Қазақстанниң вә униң Лидериниң улуқ имканийәтлирини ярқин намайиш қилди. Тәнтәнилик жиғинда шундақла Парламент Мәҗлиси рәисиниң орунбасари Владимир Божко, Ақтөбә вилайитиниң һакими Бердибек Сапарбаев, Премьер-Министрниң орунбасари Иманғали Тасмағамбетов, «Усть-Каменогорский титаномагниевый комбинат» акционерлиқ җәмийитиниң президенти Әсем Мамытова, Парламент Сенатиниң депутати Ахан Бижанов, Қазақстан Кәспий Иттипақлар федерацияси рәисиниң орунбасари Виктор Рогалев, KAZENERGY ассоциацияси рәисиниң орунбасари, Қазақстанниң Еңбек Ері Узақбай Қарабалин, Рио-де-Жанейро Олимпиадисиниң чемпионлири Данияр Елеусинов вә Дмитрий Баландин сөзгә чиқип, нәқ хәлиқ бирлиги вә җипсилиғиниң, ихтисатниң турақлиқ тәрәққий етишиниң, шундақла дөләттики течлиқ вә тәртипниң мәмликәт мустәқиллигиниң асасий һули вә униң баш қәдрийити екәнлигини тәкитлиди. ...Нурсултан Назарбаев тәнтәнилик жиғинни тамамлап, өз намиға иллиқ сөзләрни ейтқанларниң һәммисигә миннәтдарлиқ билдүрди. Шуниң билән бир вақитта у мәмликәт муваппәқийитиниң Қазақстанни гүлләндүргән хәлиқниң муваппәқийити екәнлигигә диққәт ағдурди. Президент қазақстанлиқларға, мошу жилларда биллә ишлигән барлиқ сәпдашлириға миннәтдарлиқ билдүрди вә Мустәқиллик күни билән тәбриклиди. — Әтидин башлап мәмликитимизниң иккинчи 25 жиллиғи башлиниду, у аяқлашқанда Қазақстан өз Мустәқиллигиниң 50 жиллиғини нишанлайду. Мән мошу вақит арилиғиниң әң алди билән пәқәт биз үчүнла әмәс, бәлки бизниң хошнилиримиз, барлиқ мәмликәтләр үчүн течлиқ дәври болушини халиған болар едим. Мошу муһим шәртсиз айрим дөләттә һәммә нәрсә яхши болиду дәп планлаш вә ойлаш мүмкин әмәс, — дәп тәкитлиди Президент. Нурсултан Назарбаев шундақла бийил мошундақ чоң мәйрәмни көплигән яш дөләтләрниң нишанлаватқанлиғини әслитип өтти вә Қазақстан хәлқиниң намидин уларни тәбрикләп, чоң утуқ һәм паравәнлик тилиди. Дөләт рәһбири Қазақстан Җумһурийити Мустәқиллигиниң 25 жиллиғиға беғишлинип, мәмликитимизниң сәнъәт маһирлириниң қатнишиши билән «Астана Опера» опера вә балет театрида өткән мәйрәмлик концертқа қатнашти.