• Йеңилиқлар
• 09 Қаңтар, 2017

Йеңи жилға ишәшлик қәдәм ташлиди

Өз вақтида Қазақстан Җумһурийитиниң Президенти Нурсултан Назарбаев: «Алмута вилайитидә Әмгәкчиқазақ дегән наһийә бар. Шу чоң регионда бирқатар чоң лайиһиләрни әмәлгә ашурушқа мүмкинчиликләр мол. Болупму, йеза егилиги мәһсулатлирини ишләпчиқириш мәркизигә айландурушқа бәк лайиқ. Наһийәдә йәл-йемишниң түр-түри өсиду. Мал беқиш үчүн йери наһайити қолайлиқ», дәп атап өткән еди. Мана шу бәрикәтлик Әмгәкчиқазақ наһийәси 2016-жилни утуқлуқ аяқлап, 2017-жилға ишәшлик қәдәм ташлиди. Һәқиқәтәнму, наһийәниң аграрлиқ мүмкинчиликлири зор, хәлқиму әмгәксөйгүч. 54 милләтниң вәкили иҗил-инақ яшаватқан наһийәниң ихтисадий тәрәққият қәдәмлириму алаһидә. Мәсилән, Әмгәкчиқазақ наһийәси вилайәттә йеза егилигидики үлүши бойичә – биринчи, ишләпчиқиришта – бәшинчи, инвестиция җәлип қилиш, селиқ төләш бойичә – үчинчи, саламәтликни сақлаш саһаси бойичә – биринчи орунларни егилиди. Билим бериш саһаси бойичә нурғун жиллар мабайнида вилайәт наһийәлириниң ахирида қелип қалған болса, мана бирнәччә жилдин бери әң илғар бәш наһийәниң қатаридин орун елип келиватиду. Мустәқилликниң 25 жиллиғи – өткән жилниң әң шанлиқ күни болғанлиғи һәқиқәт. Бу мәйрәмни әмгәкчиқазақлиқлар дағдуғилиқ нишанлиди. Наһийә тәрәққияти үчүн тәр төккән йүзлигән инсанларниң әмгиги мунасип баһалинип, мукапатларға еришти. Җүмлидин җумһурийәтлик Уйғур этномәдәнийәт мәркизи рәисиниң орунбасари, Әмгәкчиқазақ наһийәлик Уйғур этномәдәнийәт мәркизиниң рәиси Сулайман Мәхсүтов, наһийәлик мәслиһәтниң депутати Аблеким Сәйдуллаев, Тәшкәнсаз йеза округиниң һакими Мәһәммәтҗан Султанияров, йеза егилигиниң ветерани Кәрим Худайбәрдиев, Садир намидики оттура мәктәпниң мудири Тохтахун Садиқов, әмгәк ветеранлири Малик Илиев, Адаләт Ғазиева тәвәллудлуқ медальлар билән, Достлуқ йезисиниң турғуни, жутниң инавәтлик мөтивәри Тохтахун Исламбақиев наһийә һакиминиң Пәхрий ярлиғи билән мукапатланса, шаирә, «Азия бүгүн» гезитиниң баш муһәррири Ташгүл Һезиярова һәм тәвәллудлуқ медальға, һәм «Әмгәкчиқазақ наһийәсиниң Пәхрий граждини» намиға сазавәр болди. Әмгәкчиқазақлиқларниң әмгиги җумһурийәтлик Уйғур этномәдәнийәт мәркизи тәрипидин жуқури баһаланди. Мәсилән, көрнәклик шаир Җәмшит Розахунов ҖУЭМ тәсис қилған «Илия Бәхтия намидики», шаир һәм мәрипәтчи Әкрәм Садиров, Тәшкәнсаз йеза округиниң һакими Мәһәммәтҗан Султанияров, әмгәк ветерани Абдуғени Абубәкриев вә Садир намидики оттура мәктәпниң устази Гүлбәһрәм Тайирова «Сахавәт» медальлири, муәллимә, җәмийәтлик ишларниң активисти Арзигүл Абдримова Қазақстан хәлқи Ассамблеясиниң Тәшәккүрнамиси билән мукапатланди. Рашидәм РӘҺМАНОВА, «Уйғур авази».