• Йеңилиқлар
• 09 Қаңтар, 2017

Дуниявий Универсиада йеқинлашмақта

Санақлиқ күнләрдин кейин Алмутида 28-Дуниявий қишлиқ Универсиада башлиниду. 29-январьдин 8-февральғичә давамлишидиған қишлиқ Студентлар оюнлириға дунияниң 55тин ошуқ мәмликитидин 2 миңға йеқин спортчи қатнишиду. Қишлиқ оюнлар спортниң 12 –  тағ чаңғуси, биатлон, чаңғуда чепишиш, спортниң икки түри бойичә чаңғу мусабиқиси, чаңғуда трамплиндин сәкрәш, сноуборд, фристайл, муз үстидә фигурилиқ тейилиш, шорт-трек, коньки спорти, шайбилиқ хоккей (жигитләр вә қизлар), керлинг – охшаш түрлири бойичә өткүзүлүп, спортчилар 86 медаль комплекти үчүн күч синишиду. Мусабиқиләрни уюштурушқа һәм чәт әлләрдин, һәм Қазақстанниң регионлиридин болуп үч миң пидаий җәлип қилиниду. Универсиадиға 30 миң елимиз вә чәт әл туристиниң келидиғанлиғи күтүлмәктә. Қишлиқ Универсиада мусабиқилирини һәр күни дунияниң 80 мәмликитидә  бир миллиардтин ошуқ телетамашибин көриду. Оюнларни өткүзүшкә 127 хәлиқара судья вә 600гә йеқин техникилиқ мутәхәссис җәлип қилиниду. Мусабиқиләр «Шымбулақ» тағ чаңғуси курорти, «Медев» егиз тағлиқ спорт комплекси, «Суңқар» Хәлиқара чаңғу трамплинлири комплекси, Б.Шолақ намидики Спорт вә мәдәнийәт сарийи, «Алатау» чаңғу вә биатлон стадионлири комплекси, «Табаған» спорт-оюн-тамашә комплекси, «Алматы Арена» вә «Халық Арена» Муз сарайлири охшаш сәккиз спорт объектида өткүзүлиду.