• Йеңилиқлар
• 20 Қаңтар, 2017

Йәнә вақитлиқ тиркәш һәққидә

Йолдаш МОЛОТОВ, «Уйғур авази»/ Йеңи жил кириши билән җәмийитимиздә көп бәс-муназириләрни пәйда қилған «вақитлиқ тиркәш» җәрияни әң нурғун муһакимә қилиниватқан мәсилигә айланмақта, болупму Интернетта әң аммибап мавзу болуп қалмақта. Мәлумки, өткәндә Или наһийәсигә қарашлиқ Өтеген батыр йезисида вә Алмутидики Алатав наһийәлик хәлиққә хизмәт көрситиш мәркизидә вақитлиқ тиркәшкә новәттә турған икки адәм вапат болди. Бу фактлар болса, вақитлиқ тиркәшкә мунасивәтлик наразилиқларниң күчийишигә елип кәлмәктә. Шуңлашқа һазир мошу мәсилигә мунасивәтлик дөләт органлириниң чүшәндүрүш ишлири давамлишиватиду. Өткән дүшәнбә күни Астанада Paparlab муназириләр клубида Әхбарат вә коммуникацияләр министри Дәурен Абаев йеңилиқлар билән бөлүшти. — Бүгүн, пурсәттин пайдилинип, Алмутида хәлиққә хизмәт көрситиш мәркәзлиридә вапат болғанларниң уруқ-туққанлириға тәзийә  билдүримән, — деди министр. – Вақитлиқ тиркәш җәрияни башланғандин кейин мәркәзләрдә медицина хадимлири новәтчилик қиливатиду. Һазир хәлиққә хизмәт көрситиш мәркәзлириниң күн тәртиви узартилди. Мәркәзләрдики новәтләрму азаймақта. Аһалиға йеникчиликләрни яритиш мәхситидә мошу һәптиниң ахириғичә онлайн-тиркәш җәрияни ишқа қошулиду. «Миллий әхбаратлиқ технологияләр» акционерлиқ җәмийити бу җәриянни техникилиқ тәминләшни 80 пайиз орунлап болди. Әнди вақитлиқ тиркәш җәрияниниң вақти икки һәссигә қисқирайду. Бу әхбарат тәйярлиниватқан пәйттә, «Миллий әхбаратлиқ технологияләр акционерлиқ җәмийити Қазақстан электрон һөкүмитидә онлайн вақитлиқ тиркәш хизмити ишқа қошулғанлиғи тоғрилиқ хәвәр қилди. Әнди онлайн-режимда вақитлиқ тиркәш үчүн өй егисиниң вә шу йәргә вақитлиқ тиркәшкә олтиридиған шәхсниң электронлуқ рәқәмлик имза елиш вә сайтта тиркилиши һаҗәт. Шундақла онлайн режимда хизмәт үчүн дөләт баж һәққини төлиши һәм электронлуқ рәқәмлик имза арқилиқ әризигә қол қоюши керәк. Әгәр өйниң егиси үчинчи бир шәхс болса, әризә бәргүчи өй егисиниң ИИНни, қозғалмайдиған мүлүкниң адреслиқ вақитлиқ тиркәш қәрәлини көрситип буйрутма әвәтиши лазим. Бу буйрутма өй егисиниң Интернеттики «шәхсий кабинетиға» келип чүшиду. У өз рухситини бәргәндин кейин әризә Ички ишлар министрлигиниң системисиға кириду вә 10 минуттин кейин вақитлиқ тиркәш әмәлгә ашқанлиғи тоғрилиқ мәлумат келиду. Қошумчә мәлуматларни тәвлүк бойи ишләйдиған 1414 номери арқилиқ елишқа болиду.