• Билип қоюң
  • 26 Қаңтар, 2017

АҚШниң бүгүнки президенти түнүгүн ким болған?

Өткән һәптидә АҚШниң 45-президенти Дональд Трамп хизмитигә рәсмий киришти. Шуниңға мунасивәтлик гезитханларни униң билән қисқичә тонуштуруп өтмәкчимиз. Дональд Трамп – тонулған америкилиқ қурулуш магнати. «Tramp Organization» ширкитиниң президенти. Исми Америкиғила әмәс, униң сиртиғиму тонулған шәхс. Онлиған аммибап бизнес-китапларниң муәллипи, «Намзат» риалити-шоуниң риясәтчиси, «Каинат мәликиси» конкурсиниң ғоҗайини. Бу бүгүнки АҚШ президентиниң мошу күнгичә шуғуллинип кәлгән паалийитиниң толуқ әмәс тизими. Д.Трамп 1946-жили 14-июньда Нью-Йоркта миллионерлар аилисидә дунияға кәлгән. Дадиси униңға пәқәт тәйяр пул-дуниясинила әмәс, бәлки уларни тепиш маһаритиниму қалдуруп кәткән. У бала тәрбийисигә наһайити җиддий көңүл бөлгән. Дональд аилидә шох, тәрса, әркинликни халайдиған балилардин болуп өсти. Аилидики төртинчи пәрзәнттин атиси чоң үмүт күтәтти. Шуңлашқиму униң тәртип-интизамини тәләпкә лайиқ дәриҗигә кәлтүрүш мәхситидә уни 13 яш вақтида Нью-Йорк һәрбий академиясигә оқушқа киргүзиду. Бу билим дәргаһи һәқиқәтәнму әркә бала үчүн һаят мәктиви болиду. Дональд бу йәрдә спорт билән давамлиқ шуғуллиниду, академияниң футбол вә баскетбол командилирида паалийәтчанлиқ көрситиду. Кейинкисидә һәтта команда капитани вәзиписини атқуриду. Әң әвзили, бойида пәқәт өзигила ишиниш һәм риқабәтчиликкә дадил туруш хислити шәкиллиниду. Дональд Трамп һәрбий академияни тамамлап, Фордем университетиға чүшиду. У йәрдә икки жил оқуп, өзигә пайдилиқ билим алалмайдиғанлиғини сезиду вә Уортон бизнес мәктивигә авушиду. Бу йәрдин ихтисат-малийә бойичә бакалавр дипломини елип, дадисиниң рәһбәрлигидики ширкәткә ишқа орунлишиду. У өз паалийитини оттура һал херидарлар үчүн қозғалмайдиған мүлүк саһасидин башлайду. Огойо штатидики Цинциннати шәһиридики Swifton Village комплекси – Дональдниң дадиси билән һәмкарлиқта қурған дәсләпки лайиһилириниң бири. Трамплар бу 1200 пәтирлик комплексқа 6 миллион доллар сәрип қилип, уни 12 миллион долларға сетиветиду. Йәни ата-балиға биргә бир пайда қалиду. Дадиси миллионни көзлисә, оғли миллиардни арман қилатти. Шуңлашқиму кичик Трамп аддий америкилиқлар мәнпийитидики бюджетлиқ қурулуш билән шуғуллиништин ваз кечип, көпирәк пул тепиш мәхситидә байлар үчүн өй-җай селиш ойиға келиду. Шу мәхсәттә 1971-жили Нью-Йоркниң тарихий нуқтиси — Манхэттенға көчүп келиду. У чағда бу йәрдә БМТниң штаб-пәтири, Empire State Building, Chrysler Building охшаш мегаполисниң асасий қәдрийәтлири һесаплинидиған һашамәтлик беналар селинип үлгәргән еди. Бу җайға көчүп кәлгәндин кейин Дональд көп вақтини сәйлигә сәрип қилип, мәркәзниң мемарчилиғини чоңқур тәтқиқ қилиду вә бүйүк армининиң мошу җайда әмәлгә ашидиғиниға көз йәткүзиду. «Арман алға башлайду» демәкчи, 30 жилдин кейин БМТниң 39 қәвәтлик штаб-пәтириниң қариму-қарши тәрипидә Дональд Трампниң 72 қәвәтлик Tramp World Tower асман-пеләк бенаси қәд көтириду. Шуниңдин кейин кичик Трамп техиму чоң утуқларни қолға кәлтүрүшкә башлайду. 77 қәвәтлик Chrysler Building (һәр һәптидә төрт қәвити көтирилиду), чедири булутқа тақишидиған 102 қәвәтлик Empire State Building (410 күндә селинип пүткән), 70 қәвәтлик Wall Street (һазир «Tramp Building» дәп атилиду) охшаш һашамәтлик имарәтләр шулар җүмлисидиндур. Буниңдин ташқири көплигән адәмни һәйран қалдуридиған виллилар барлиққа келиду. Бүгүнки күндә Трамп Манхэттендики 2 миллион квадрат метрлиқ қозғалмас мүлүкниң егиси һәм өзи Нью-Йоркниң сөлитигә сөләт қошқан магнатлириниң бири. Элитилиқ өйләрни сетиш үчүн Трампқа шуларға мунасип адәмләр билән қоюқ мунасивәт бағлаш лазим еди. Шуңлашқиму у әйнә шундақ шәхсләр пат-пат баш қошидиған йепиқ клубниң ғоҗайини билән тонушиду. Шу арқилиқ у  аста-аста өз херидарлирини, қурулушини мәбләғ билән тәминләйдиған шәхсләрни тапиду. Әйнә шуниңдин кейин униң паалийити техиму җанлинишқа башлайду. 1974-жили Дональд Трамп тендер арқилиқ мурәккәп җөндәшкә муһтаҗ «Commodore» меһманханисини сетивалиду. Уни өзгәртип, қайтидин әслигә кәлтүрүш үчүн банкилардин 70 миллион доллар несийә алиду. Әң әвзили, шәһәрлик һакимийәттики тонушлири арқилиқ 40 жил давамида төвәнлитилгән селиқ төләш бәхтигә муйәссәр болиду. Нәтиҗидә 1980-жили кона «Commodoreниң» орниға заманивий, элитилиқ «Grand Hyatt» меһманханиси бәрпа болиду. Бу Трампқа аммибаплиқ елип кәлсә, шуниңдин кейин қәд көтәргән 68 қәвәтлик «Tramp Tower» асман-пеләк бенаси униң исмини пүткүл Нью-Йоркқа тонутиду. 1979-жили қурулуши башланған бу имарәт Нью-Йорк тарихидики әң мурәккәп мемарчилиқ лайиһиләрниң бири болуп һесаплиниду. Мәзкүр бенаниң қурулуши 1983-жили аяқлишиду. Шу пәйттә риқабәтчилири уни «олтарғузуш» мәхситидә өзара келишивелип, шәһәрдә қозғалмайдиған мүлүк баһасини чүшириветиду. Амма бу һәрикәттин Трампниң ошуғи пәқәт «алчисиға» чүшиду. Йәни униңға пулдин көрә, аброй-атақ муһимирақ байвәччиләр җәлип қилинишқа башлайду. 2006-жили мәзкүр бенаниң хуни 300 миллион долларға баһалиниду. Униңға «Tramp Tower» дегән намни бериш – Дональд үчүн тунҗа рекламилиқ қәдәм еди. Әйнә шуниңдин кейин, барлиқ лайиһилирини өз фамилиясигә бағлаштуруп, «Tramp  World Tower», «Tramp Palace», «Tramp Plaza», «Tramp International Hotel & Tower» дәп аташқа бәл бағлайду. Нәтиҗидә «Tramp» нами брендқа айлиниду. Униң намидики кийим-кечәк, ресторан, журнал һәтта һарақлар («Tramp Super Premium») миллионлиған доллар кирим кәлтүрүшкә башлайду. Трампниң асасий камчилиқлириниң бири – ишни реҗиләштики аҗизлиғи еди. Бу әһвал униң бизнесини касатлиққа елип келиду. Базардики турақсизлиқ пуллуқ инвестицияниң өсүшини тәләп қилатти. Нәқ мундақ әһвалда Трамп миллиардлиған қәризгә петип, банклардики несийәлирини төләш қудритидин айрилған еди. Униң бу әһвалини аммивий әхбарат васитилири, уни тонуйдиған кәң җамаәтчилик муһакимә қилишқа башлайду. Журналистлар һәтта Трампниң илгәрки әһвалиға қайтип келиш имканийитини йоққа чиқириветиду. Тиришчан бизнесмен банкирларни өзигә ахирқи мүмкинчиликни беришкә қайил кәлтүриду. Һә, банкларға илгәрки қәризлирини толуқ қайтуруп үлгәрмигән херидариниң бу тәкливигә келишиштин башқа илаҗиси йоқ еди. Банклар һәтта Трампқа өзлири малийә мудирини қошуп бериду һәм салаһийәтлик мутәхәссисләр алп магнатни муңқәризликтин қутулдуруп чиқиду. «Мүшкүл әһвалдин қандақ қутулуп чиқтиң?» дегәнләргә Трамп: «Бәхитсизликкә дуч кәлсәң, күлдәк күлданда олтириверишниң һаҗити йоқ. Униңдин савақ алдә, ишиңни давам қил!» дәп җавап бериду. Өткән әсирниң 90-жиллириниң ахирида Трампниң бизнестики әһвали турақлишишқа башлайду. 2001-жили униң ширкити БМТ штаб-квартириниң қариму-қарши тәрипидә 72 қәвәтлик Tramp World Tower асман-пеләк бенасиниң қурулушини аяқлаштуриду. 2008-жили қурулуш магнатиниң «Tрамп һечқачан берилмәйду. Мән өзәмниң әң чоң проблемилиримни қандақ қилип утуққа айландурдум» дегән китави йоруқ көриду. Униңда муәллип һаятидики «қара күнләрни» қандақ арқида қалдурғанлиғи һәққидә баян қилиду. «Һечким өзигә болған ишәнчә билән туғулмайду. Һаяттики әң яман дүшмән – қорқунуч», «Бешиңға кәлгән һәрқандақ әски ойни баш көтәргүзмәй уҗуқтуруш керәк» дәп язиду у. Йәнә бир тәкитләйдиған йери, Трамп – өз ишиға җан дили билән берилгән әмгәксөйгүч инсан. «Миллиардер үчүн иш билән ләззәтлиниш – умумий чүшәнчә. Һечқачан әмгәк дәм елишини алмаңлар. Униң силәргә немә кериги бар? Әгәр ишиңлардин ләззәтләнмисәңлар, демәк, силәр һаяттин өз орнуңларни тапмидиңлар». Бу Дональдниң сөйүмлүк нәқили. Көрүп турғинимиздәк, Трампниң өмүр сүрүш рецепти аддийла – җүръәтлик болуш, тәр төкүп әмгәк қилиш вә һаятқа болған иҗабий көзқараш. Бүгүнки утуғиға у асасән мошу хисләтлири түпәйли йәтти десәк, хаталашмаймиз. Интернет сәһипилиридин елинди. Дональд Трампниң аилиси һәққидә Д.Трамп дәсләпки қетим 1977-жили чех фотомодели Ивана Зельничковаға өйлиниду. Униңдин икки оғул (Дональд – 1977-ж.  вә Эрик – 1984-ж.), бир қиз (Иванка – 1981-ж.) пәрзәнт көриду. Уларниң аиләвий һаятиға 15 жилдин кейин чекит қоюлиду. 1993-жили қурулуш магнати 30 яшлиқ америкилиқ актриса Марле Энн Мейплз билән аилә қуриду. Шу жили униңдин бир қиз сөйиду. Бу нека алтә жилдин кейин аяқлишиду. Трамп 2005-жили 34 яшлиқ словакиялик фотомодель Мелания Кнауссни өз илкигә алиду. Уларниң өйлиниш тойиға 45 миллион доллар хираҗәт қилиниду. 2006-жили Дональд бу аялидин бир оғул (Бэррон Уильям Трамп) пәрзәнт көриду. «Мениң аяллирим бизнесимға риқабәтчи болалмайду. Чүнки мән өз ишимни һәммидин артуқ көримән», дәйду Дональд Трамп.

297 рет

көрсетілді

0

пікір
Алдыңғы мақала Әң аммибап исимлар мәлум болди
Келесі мақала Сағламлиқ һәққидә һекайәтләр

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

16 Қыркүйек, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы