• Йеңилиқлар
• 26 Қаңтар, 2017

Қазақстан учришишниң нәтиҗидар аяқлишишини халайду

Өткән дүшәнбә күни Қазақстан Җумһурийитиниң Президенти Нурсултан Назарбаев БМТ Баш кативиниң Сирия бойичә мәхсус вәкили Стаффан де Мистура билән учрашти, дәп хәвәрлиди Президентниң мәтбуат хизмити. Учришиш давамида тәрәпләр Сириядики тоқунушни рәтләш бойичә музакириләр мәсилисини муһакимә қилди. Дөләт рәһбири Астананиң музакириләрни өткүзүшкә тәйяр екәнлигини ейтип, барлиқ қатнашқучилар үчүн шараитлар яритилғанлиғини тәкитлиди. — Мән Россия, Түркия вә Иран президентлириниң Астанада музакириләрни өткүзүш тоғрилиқ тәкливини қобул қилдим. Биз учришишниң нәтиҗидар аяқлишишини халаймиз. Қазақстан учришишқа қатнишидиған тәрәпләрниң һәммиси билән тәң вә ишәшлик мунасивәтләрдә болғанлиқтин, музакириләрниң яхши өтүши үчүн барлиқ шараитни яритиду дәп ойлаймән, — деди Қазақстан Президенти. Нурсултан Назарбаев Сирия мәсилиси бүгүнки таңда пәқәт Йеқин Шәриқнила әмәс, пүткүл дунияни тәшвишләндүрүватқанлиғини тәкитлиди. — Тәрәпләрниң болуватқан вақиәләргә бизгә охшаш тәшвиш билән қараватқанлиғини чүшинимән. Экспертларниң ейтишичә, тоқунуш башланғандин бери 300 миңдин ошуқ адәм қаза болған. Мошуниң һәммиси бу мәсилини течлиқ йоли биләнла һәл қилишқа чақириду, — деди Дөләт рәһбири. Қазақстан Президенти БМТниң мәхсус вәкилигә Астанадики учришиш Женевадики течлиқ музакириләргә тәйярлиқ җәрияниға иҗабий тәсир қилидиғанлиғини ейтти. Стаффан де Мистура Нурсултан Назарбаевқа Астанада музакириләрни өткүзүшкә шараит яратқини үчүн БМТ Баш кативи Антонио Гуттеришниң тәшәккүрини изһар қилди. — Сизниң дөлитиңиз хәлиқара мәйдандики әң җиддий мәсилини рәтләш ишида чоң тәҗрибисини намайиш қилип, үлгә болуп келиватиду. Қазақстанниң БМТ Бехәтәрлик Кеңишигә турақлиқ әмәс әза болуши Сириядики тоқунушни һәл қилишниң қошумчә мүмкинчилигигә айлиниватиду, — деди Стаффан де Мистура. Учришиш нәтиҗиси бойичә тәрәпләр қураллиқ тоқунушни буниңдин кейинму рәтләш чарилири бойичә пикир алмаштурди.