• Спорт
• 09 Ақпан, 2017

Дуния чемпионатиға йолланма алди

Миллий мәдәнийитимизниң җанкөйәрлири болған яркәнтлик тиҗарәтчиләр Әхмәтҗан Һаширов билән Турғанҗан Зайитов наһийәдә  өткүзүлүватқан һәр хил мәдәний чарә-тәдбирләргә қол учини берип, көпчиликниң алқишиға сазавәр болмақта. Болупму тиҗарәтчиләр яшлар арисида сағлам һаят тәризини тәрғип қилишқа көп күч салмақта.Өткән жили Яркәнт шәһиридә Джиу-джитсу спорт клуби ечилип, униңда Шәриқниң джиу-джитсу йәкму-йәк күриши бойичә дуния чемпиони Арманжан Розахуновниң рәһбәрлигидә  бир топ спорт маһирлири  яркәнтлик өсмүрләргә бир һәптә давамида маһарәт дәрислирини өткүзгән еди. Көп өтмәй 200дин ошуқ өсмүр спортниң бу түри билән шуғуллинишқа бәл бағлиди. Аридин алтә ай өтүп, яркәнтлик спортчилар вилайәтлик, җумһурийәтлик  вә хәлиқара турнирларға қатнишип, яхши нәтиҗиләргә қол йәткүзди. Җүмлидин Алмутида өткән күч синашқа 36 яш спортчи иштрак қилип, һәрхил салмақ дәриҗиси бойичә 8 алтун, 11 күмүч вә 10 бронза медальлирини елишқа муйәссәр болди. Өткән жилниң ахирида болса, 18 — 30 яш арилиғидики спортчилар арисидики хәлиқара турнирға 36 спортчи қатнишип, 33 медальға қол йәткүзүп, Яркәнтниң даңқини көтәрди. Мана шуларниң бири Илшат Һосманов Қазақстанниң «Альянс» талланма командиси тәркивидә Бирләшкән Әрәп Әмирликлириниң пайтәхти Абу-Дабида өткән хәлиқара турнирға қатнишиш мүмкинчилигигә еришкән еди. Бу мусабиқигә иштрак қилған Илшат баш мукапат — GRAND SLAMни  йеңивелип,  дуния чемпионатиға йолланма алди. Илшат һазир Алмутидики Қонаев намидики университетниң әдлийә факультетида  сирттин оқуйду. У 10 йешидин башлап спортниң каратэ, дзюдо  түрлири билән шуғуллинишқа башлиған еди. Һазир болса, джиу-джитсуға иштияқ бағлап,  униң билән җиддий мәшғул болуватиду. Яркәнттә спорт клубини тәшкил қилип, уни мәхсус спорт жабдуқлири билән тәминләштә Арманҗан Розахунов билән униң устази Олег Муллаевниң әмгигини алаһидә тәкитләш орунлуқтур. СҮРӘТТӘ: яш спортчи Илшат Һосманов һамийлар Әхмәтҗан Һаширов вә Турғанҗан Зайитов билән. Турсунмәһәмәт МӘШҮРОВ чүшәргән сүрәт.