• Йеңилиниш 3.0 / Конституциялик ислаһатлар программиси
• 09 Ақпан, 2017

Қ.Тоқаев Конституциялик ислаһатлар тоғрилиқ өз тәклиплирини тәвсийә қилди

Өткән һәптидә «Казахстанская правда» гезитида Қазақстан Җумһурийити Парламенти Сенатиниң Рәиси Қасым-Жомарт Тоқаевниң «Конституциялик ислаһат – Қазақстанниң демократиялик тәрәққиятидики йеңи басқучи» мавзусида мақалиси елан қилинди. Рәисниң пикричә, Президент Нурсултан Назарбаев тәклип қилған йеңилиниш – бизниң елимизниң сәясий тарихидики йеңи басқуч, сәвәви, Конституциягә киргүзүлидиған өзгиришләр дөләтчилигимизниң тәрәққиятиға иҗабий тәсир қилиду. Бу – дуниядики ховуп-хәтәрләргә мувапиқ җавап беридиған ислаһат, дәп һесаплайду Қ.Тоқаев. Сенат Рәиси дөләтниң нәтиҗидарлиғини ашуруш мәхситидә һакимийәт тармақлири арисидики җавапкәрликни қайта бөлүшкә беғишланған өзгиришләр тоғрилиқму өз пикрини изһар қилди. Рәисниң тәкитлишичә, тәрәққият – «Күчлүк Президент – абройлуқ Парламент – һесават беридиған Һөкүмәт» концепция даирисидә болуши керәк. Қ.Тоқаев Қазақстан җәмийитидики дөләтчилигимизниң асасий һули һесапланған Президент институти тоғрилиқму өзиниң пикрини ейтти. Мақалида ениқ тәкитләнгинидәк, президентлиқ башқуруш шәкли «өзиниң һаятийлиғини вә нәтиҗидарлиғини толуқ дәлиллиди». Шуниң билән биллә Рәис Президентни иҗтимаий-ихтисадий саһадики тәшкилий-техникилиқ вә назарәт вәзипилиридин бошитишниң өз вақтида көтирилгәнлигини қәйт қилди. Қазақстанниң сәясий системисиниң йеңи сүпитини тәһлил қилип, Қ.Тоқаев мәзкүр ислаһат Һөкүмәт вә иҗраий һакимийәт тармиғиниң барлиқ системиси җавапкәрлигиниң ашидиғанлиғини, уларниң Парламент алдида һесават беришини тәминләйдиғанлиғини ейтти. Бу җәһәттин Рәис «Һөкүмәт рәһбири Парламентниң төвәнки палатисида кам дегәндә үч айда бир қетим елимизниң иҗтимаий-ихтисадий тәрәққияти йөнилишидики өз ишлири тоғрилиқ партия фракциялириниң соаллириға җавап берәләтти», дегән тәкливини тәвсийә қиливатиду. Шуниң билән биллә бу ислаһат сәясий партияләрдин җавапкәрликни ашурушни вә кәспий маһарәтни көтиришни тәләп қилиду. Мақалида Қазақстан Җумһурийитини қуруш вә қелиплаштурушта, дөлитимизни утуқлуқ тәрәққий әткүзүштә Президент Н.Назарбаевниң һәл қилғучи роли алаһидә көрситилгән. «Дөләт рәһбири өзиниң зор әмгиги түпәйли дуния тарихидики көрнәклик сәясий әрбапларниң қатаридин мунасип орун алди», дәп язиду Сенат Рәиси. Шуңлашқа конституциялик ислаһатларни муһакимә қилиш даирисидә Қ.Тоқаев Конституцияниң мәтинигә, мүмкин, киришмисигә бизниң көпмилләтлик дөлитимиз – «Мәңгілік Елниң» мустәһкәм һули асаслири билән Қазақстан Җумһурийитини дуниядики тәрәққий әткән дөләтләрниң қатариға киргүзүшкә қаритилған Президент Н.Назарбаевниң Стратегиясиниң мустәһкәмлигини көрситидиған қаидиләрни киргүзүшни тәклип қилиду.