• Әхбаратлар еқими
• 09 Ақпан, 2017

Баш прокурорни қобул қилди

Дөләт рәһбири Нурсултан Назарбаев Баш прокурор Жақып Асановни қобул қилди, дәп хәвәрлиди Президентниң Мәтбуат хизмити. Учришиш давамида Ж.Асанов Президентқа һоқуқ қоғдаш органлириниң 2016-жилдики паалийитиниң нәтиҗилири вә келәчәктә атқурулидиған ишлар тоғрилиқ һесават бәрди.Қазақстан Президенти елимиздики җәмийәтлик бехәтәрликни тәминләшкә беғишланған ислаһатларниң әһмийитини тәкитлиди. —  Мошу жиллар ичидә биз барлиқ саһада ислаһатларни жүргүзүватимиз. Дөлитимиз мустәқиллигиниң 25 жиллиғиниң нәтиҗиси бойичә ихтисадий өсүмни вә хәлиқ турмушиниң яхшиланғанлиғини байқаймиз. Амма һоқуқ қоғдаш органлири паалийитиниң мәсилилири һечқачан әһмийитини йоқатмиған. Биз һаҗәт чарә-тәдбирләрни қобул қилип, қанунларға өзгиришләрни киргүзүватимиз, — деди Дөләт рәһбири. Дөләт рәһбири җинайәтләр сани униң алдидики жилдики көрсәткүчтин көп болуватқанлиғини, һоқуқ қоғдаш органлириниң җазалиниватқанлиғини тәкитлиди. — Җазадин қечип, мәлуматларни йошурған яки өзгәрткән әһвалларму учришиду. Әнди барлиқ фактлар мәҗбурий түрдә тиркилиши лазим, — деди Нурсултан Назарбаев. Ж.Асанов Президентқа Һөкүмәтниң кәңәйтилгән мәҗлисидә берилгән тапшурмиларни орунлаш җәриянида тиҗарәтчиләрни тәкшүрүшни азайтиш мәхсити билән қобул қилинған чарә-тәдбирләр тоғрилиқ ейтип бәрди. Униңдин ташқири, Баш прокурор һоқуқ қоғдаш саһасидики дөләтләрара мунасивәтләрни күчәйтиш, ихтисадий қанун бузуш әһваллири билән күришиш үчүн кадр тәйярлаш мәсилилирини тәкитлиди. Баш прокурорниң тәкитлишичә, Бәш институционал ислаһатни вә Қазақстан Президентиниң «Қазақстанниң Үчинчи йеңилиниши: дуниявий риқабәткә қабиллиғи» намлиқ Мәктүбини әмәлгә ашуруш җәриянида һазирқи вақитта прокуратура органлири алдиға қоюлған вәзипиләрни орунлаш, болупму мәмурий вә җинаий җәриянларни электронлуқ-рәқәмлик форматқа көчириш, шундақла айрим лайиһиләрни әмәлгә ашуруш үчүн барлиқ һаҗәт чарә-тәдбирләр қобул қилинмақта. Учришиш ахирида Президент мәмликитимизниң қанун нормилириниң орунлинишини назарәт қилидиған орган сүпитидә прокуратуриниң алаһидә ролини тәкитләп, Бәш институционал ислаһат вә Қазақстан хәлқигә йоллиған Мәктүпниң әмәлгә ешишини қаттиқ назарәткә елиш һаҗәтлигини ейтти. Дөләт рәһбири учришиш нәтиҗиси бойичә бирқанчә ениқ тапшурмиларни бәрди.