• Йеңилиқлар
• 16 Ақпан, 2017

Президент һозурида

Президент Нурсултан Назарбаев Билим вә пән министри Ерлан Сағадиевни қобул қилди, дәп хәвәрлиди Президентниң Мәтбуат хизмити. Учришиш давамида Дөләт рәһбиригә Билим вә пән министрлигиниң 2016-жилдики паалийитиниң нәтиҗилири тоғрилиқ һесават берилди.Нурсултан Назарбаев билим вә пән системисиниң келәчәктики ислаһатларни, Қазақстан Президентиниң «Қазақстанниң Үчинчи йеңилиниши: дуниявий риқабәткә қабиллиғи» намлиқ Мәктүбини әмәлгә ашуруштики муһим ролини тәкитлиди. — Биз дөлитимиздиму, чәт әлдики оқуш орунлиридиму кадр тәйярлаш бойичә кәң даирилик ишларни әмәлгә ашурдуқ. Үч тилда билим беришкә, рәқәмлик оқутуш услубиға көчүватимиз. Билим вә пән министрлиги алдида бу саһани буниңдин кейинму тәрәққий әткүзүшкә мунасивәтлик чоң вәзипиләр туриду. Һаҗәт адәм ресурслирисиз Мәктүптә алға қоюлған вәзипиләрни орунлаш, шуниң ичидә технологиялик йеңилинишни, «Рәқәмлик Қазақстан» дөләт программисини әмәлгә ашуруш мүмкин әмәс, — деди Қазақстан Президенти. Е.Сағадиев Дөләт рәһбиригә билим беришниң йеңиланған мәзмундики шәклини киргүзүшкә, бәш күнлүк оқуш һәптисигә көчүшкә, базилиқ дәрисликләрни тәйярлашқа мунасивәтлик министрлик тәрипидин жүргүзүлүватқан ислаһатлар тоғрилиқ ейтип бәрди. Учришиш ахирида Нурсултан Назарбаев билим бериш системисида әмәлгә ашурулуватқан өзгиришләрниң нәтиҗилирини тәкитләп, уларни әхбарат турғусидин қоллап-қувәтләш мәсилилиригә, шундақла қоюлған вәзипиләрниң әмәлгә ешишиниң муһимлиғиға диққәт бөлди. Учришиш нәтиҗиси бойичә Дөләт рәһбири бирқатар тапшурмиларни бәрди. *** Қазақстан Президенти Нурсултан Назарбаев Энергетика министри Қанат Бозымбаевни қобул қилди, дәп хәвәрлиди Президентниң Мәтбуат хизмити. Дөләт рәһбиригә энергетика саһасини тәрәққий әткүзүшниң асасий көрсәткүчлири вә мошу саһадики лайиһиләрни йүксәлдүрүш реҗилири тоғрилиқ һесават берилди. Учришиш давамида Президент энергетикилиқ хам әшия ишләпчиқириш вә қайта ишләш саһасидики лайиһиләрни әмәлгә ашурушниң муһимлиғиға диққәт бөлди. — Қашағанда нефть ишләпчиқириш ишлири башланди. Теңиз кан орниниң даирисини кәңәйтиш тоғрилиқ қарар қобул қилинди. Шуниң билән биллә Қарашығанақ мәсилиси һәл қилинди. Мошуниңға мунасивәтлик нефть ишләпчиқириш вә уни қайта ишләш көләмини ашуруш һаҗәт, — деди Нурсултан Назарбаев. Энергетика министри энергия ресурслирини ишләпчиқириш бойичә планниң айрим көрсәткүчлири ошуғи билән орунланғанлиғи, шундақла 2016-жилниң нәтиҗиси бойичә нефть экспорти ашқанлиғини тәкитлиди. Шуниң билән биллә энергетика министри Дөләт рәһбиригә ишләпчиқарғучилар вә трейдерлар арисидики шәртнамә нәтиҗисидә автожүргүзгүчиләр һаҗити үчүн чиқирилған суюқ газ көләмини ашуруш, электр энергиясини экспортқа чиқириш әһвали, геологиялик разведка ишлирини күчәйтиш бойичә планлар, шундақла истимал қилиш базиридики җиддий конъюктуриға мунасивәтлик уран ишләпчиқириш көләмини азайтиш истиқбали тоғрилиқ һесават бәрди. Президент учришиш нәтиҗиси бойичә бирқатар ениқ тапшурмиларни  бәрди. *** Дөләт рәһбири Нурсултан Назарбаев Мәдәнийәт вә спорт министри Арыстанбек Мухамедиулыни қобул қилди, дәп хәвәрлиди Президентниң Мәтбуат хизмити. Учришиш давамида Президентқа Алмутида өткән Дуниявий қишлиқ Универсиадини уюштуруш тоғрилиқ һесават берилди. — Қазақстан 2017-жили Универсиадини мунасип дәриҗидә өткүзди. Бу мусабиқиләрдә бизниң спортчилиримиз жуқури нәтиҗиләргә қол йәткүзүп, яш әвлатқа үлгә болди, — деди Нурсултан Назарбаев. Мәдәнийәт вә спорт министри Қазақстан Президентиға Универсиадиниң нәтиҗилири билән аммивий спортни тәрәққий әткүзүш йолида қобул қилиниватқан чарә-тәдбирләр  тоғрилиқ ейтип бәрди. — Һазирқи таңда министрлик Япониядә өтидиған қишлиқ Азиада вә 2018-жили Корея Җумһурийитидә өтидиған Олимпиада оюнлириға тәйярлиқ ишлирини башлавәтти, — деди министр. Шундақла Президент классикилиқ сәнъәтни, киноиндустрияни тәрәққий әткүзүшниң, яш талантларни қоллап-қувәтләшниң муһимлиғини тәкитлиди. Дөләт рәһбири учришиш нәтиҗиси бойичә бирқатар тапшурмиларни бәрди.