• Йеңилиқлар
  • 23 Ақпан, 2017

Тилларға һөрмәт

Мәлумки, 1999-жили ЮНЕСКОниң Баш конференцияси 21-февраль күнини Хәлиқара ана тили күни дәп бәлгүлигән еди. Әнди БМТ Баш Ассамблеясиниң қарари билән 2008-жил Хәлиқара ана тиллар жили дәп елан қилинди. Мана шуниңдин буян пүткүл дуния җамаәтчилиги 21-февраль күнини Хәлиқара ана тил күни сүпитидә нишанлап кәлмәктә.Өткән сешәнбидә Алмутидики Достлуқ өйидә ҚХА вә Қазақстан Җумһурийити Президенти йенидики «Қоғамдык келісім» җумһурийәтлик дөләтлик мәһкимисиниң уюштуруши билән Хәлиқара ана тили күнигә беғишланған тәнтәнә өтти. Униңға Қазақстан хәлқи Ассамблеясиниң әзалири, алимлар, язғучи-шаирлар, миллий мәдәнийәт мәркәзлириниң вәкиллири, студентлар вә мәктәп оқуғучилири қатнашти. Тәнтәнидә сөз алған ҚХА Рәисиниң орунбасари Леонид Питаленко, алим вә язғучилар Смағул Елубай, Уалихан Қалижан, Абылғази Қайырбеков вә башқилар ана тилиниң қәдри, Қазақстанда бу мәсилигә алаһидә көңүл бөлүнүватқанлиғини тәкитлиди. Һәқиқәтәнму елимизда яшаватқан барлиқ милләтләр үчүн өз тилини сақлап тәрәққий әткүзүшкә барлиқ шараитлар яритилған. Тәнтәнә давамида «Тіл бірлігі» мавзусида өткән чарә-тәдбирләрниң йәкүнлири чиқирилди. Мошу чарә-тәдбир даирисидә Қазақстан уйғур яшлири бирлиги тәрипидин уйғур яшлири арисида өткүзүлгән конкурсниң нәтиҗилири елан қилинди. ҚУЯБ рәиси Рустәм Хәйриевниң тәкитлишичә, буниңдин бираз илгири уйғур яшлири арисида Қазақстан Мустәқиллигиниң 25 жиллиғиға беғишланған шеирларға конкурс елан қилинған еди. Униңға Алмутидики 153-мәктәп-гимназиядә, 89, 156, 198-мәктәпләрдә билим еливатқан уйғур балилири қатнашти. Улар шеирлирини уйғур, қазақ вә рус тиллирида язған. Конкурс йәкүнлирини язғучи-драматург Әхмәтҗан Һашири вә шаирә Патигүл Мәхсәтова чиқарди. Шундақ қилип, конкурс нәтиҗиси бойичә Баш мукапат — Гран-прини А.Розибақиев намидики 153-мәктәп-гимназияниң оқуғучиси Малика Василова алди. Әнди 89-мәктәпниң оқуғучиси Юлтуз Өмәрҗан, 153-мәктәп-гимназия оқуғучиси Азадә Сетивалдиева вә 156-мәктәпниң оқуғучиси Айжан Мамуталиева мукапатлиқ орунларға еришти. Тәнтәнә ахирида Қазақстан хәлқи Ассамблеясиниң «Мың бала» җумһурийәтлик мәдәний-ақартиш лайиһисиниң башланғанлиғи тоғрилиқ елан қилинди. Йолдаш МОЛОТОВ,

229 рет

көрсетілді

0

пікір
Алдыңғы мақала «Алға қарап кетиватимән»
Келесі мақала Бехәтәрлик Кеңишиниң мәҗлиси өтти

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

23 Қыркүйек, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы