• Йеңилиқлар
• 23 Ақпан, 2017

Бехәтәрлик Кеңишиниң мәҗлиси өтти

Дөләт рәһбири Нурсултан Назарбаевниң рәислиги билән Бехәтәрлик Кеңишиниң мәҗлиси өтти, дәп хәвәрлиди Президентниң Мәтбуат хизмити. Мәҗлисни ачқан Нурсултан Назарбаев һәрбий мәшиқ пәйтидә вапат болған йәттә һәрбийниң аилисигә барлиқ Қазақстан хәлқиниң вә шәхсән өзиниң намидин тәзийә билдүрди.Җамбул вилайитидә қар көчкини ақивитидин болған паҗиәлик вақиә тоғрилиқ хәвәрни чоңқур қайғуруп қобул қилдим. Уларниң һәрқайсиси вәтининиң вәтәнпәрвири болуп, өз һәрбий борчини ахириғичә атқурди. Мудапиә министрлигигә вапат болғанларниң аилилиригә һәртәрәплимә ярдәм көрситишни тапшуримән. Дөләтлик комиссия болған вақиәниң сәвәплирини ениқлаватиду. Мошундақ паҗиәлик әһвалларниң тәкрарланмаслиғи үчүн барлиқ чарә-тәдбирләрни қоллинишимиз керәк, — деди Қазақстан Президенти. Бехәтәрлик Кеңиши мәҗлисиниң күн тәртивидә төвәндики мәсилиләр муһакимә қилинди: Қазақстан Җумһурийити миллий бехәтәрлигиниң 2012 – 2016-жилларға беғишланған стратегиясиниң әмәлгә ашурулушиниң йәкүнлири, йеңи стратегиядә бәлгүләнгән келәчәккә беғишланған асасий қәдәмләрниң тонуштурулуши; һәрбий-техникилиқ сәясәтниң айрим аспектлири; ЭКСПО-2017 Хәлиқара көргәзмисигә тәйярлиқ вә уни өткүзүш вақтида җәмийәтлик бехәтәрликни тәминләш чарә-тәдбирлири. Дуниявий ихтисаттики боһран әһвалида, вәтәнлик ихтисатниң қийинчилиқлириға қаримастин, макроихтисадий көрсәткүчләрни нәтиҗидар дәриҗидә тутуп туралидуқ. Ички, регионлуқ вә дуниявий җәриянларға мунасивәтлик жүргүзүлгән тәтқиқатлар келәчәктә елимизниң миллий бехәтәрлигигә ховуп туғдуридиған еһтимал хәтәрләрни ениқлашқа мүмкинчилик бәрди. Һазир елимиздә Қазақстан хәлқигә йоллиған Мәктүптә көрситилгән мәхсәтләр вә вәзипиләр, тәклип қилинған сәясий вә конституциялик ислаһатлар муһакимә қилиниватиду. Умумән, уларниң көпчилиги җумһурийәт аһалисини қоллап-қувәтлишигә егә болмақта, — деди Дөләт рәһбири. Шундақла Қазақстан Президенти бүгүнки таңда ховупи жуқури болуватқан экстремистик вә террористик һәрикәтләргә қарши туруш әң муһим вәзипә екәнлигини тәкитлиди. Йеңи стратегиядә мошу паалийәт йөнилишлириниң һәрқайсиси бойичә һаҗәт қурулумларниң һәрикәт қилиш чарилири қараштурулған, — дәп хуласилиди сөзини Нурсултан Назарбаев. Униңдин ташқири Дөләт рәһбири дөләт органлириға башқиму саһалар вә йөнилишләргә мунасивәтлик миллий бехәтәрликни тәминләш бойичә бирқатар тапшурмиларни бәрди.