• Спорт
• 17 Наурыз, 2017

Сабинаниң армини

Шахризада САБИТОВА,/«Уйғур авази»/ Һаяттин өз орнуңни тепип, жүрәк хаһиши билән меңиш һәрқандақ адәмниң қолидин келивәрмәйдекән. Бәзидә көзгә илмайдиған бир вақиәләр һаятиңни мутлақ өзгәртиветидекән, — дәйду Сабина Мәрвахунова биз билән болған сөһбәттә.Бийил Уйғур наһийәсиниң Чонҗа йезисидики 5-уйғур оттура мәктивини тамамлаш алдида турған Сабина спортниң йәкму-йәк түри бойичә вилайәт даирисидә чоң утуқ қазинип, санақлиқ күнләрдин кейин җумһурийәтлик мусабиқигә атлиниш алдида туриду. Чоң синақ алдида сиңлимизни қоллап-қувәтләш мәхситидә Сабина билән учришип, һәмсөһбәттә болған едуқ. Кичигидинла сағлам һаят тәрзини өзигә һәмра қилип кәлгән Сабина 7-синипта оқуватқан мәзгилидә тәнтәрбийә пәниниң муәллими Нуржан Ахунов мошу секциягә жигитләрни жиғиватқинидин хәвәр тапиду. Шу пәйттә спортниң йәкму-йәк түригә һәвәс бағлап, савақтин сирт мәзгилдә мәшиқлиниш үчүн тизимға йезилип қоюпту. Амма Сабинаниң аниси Феруза Анайәтова ялғуз қизиниң бу хаһишини анчила тоғра көрмәйду. Әксичә, қиз балиға яришидиған уссул, гимнастика охшаш спорт түри вә сәнъәткә йеқин болушини халайду. — Апамни бовам қайил кәлтүридиғиниға  ишинәттим. Бовам апам билән гәпләшкәндин кейинла, у йолумни торимай, әксичә, мени қоллап-қувәтләйдиған тәрипигә өтти. Мән вилайәт даирисидики мусабиқиләрдин икки мәртә биринчи орун, алтә қетим иккинчи орун, икки мәртә 3-орунни елишқа муйәссәр болдум. Булту май ейида вилайәтлик мусабиқигә иштрак қилип, 55 килограммилиқ салмақ дәриҗиси бойичә күч синашқа чиқип, биринчи орунға ериштим. Мана бийил, Алла буйриса, санақлиқ күнләрдин кейин җумһурийәтлик мусабиқидә өз күчүмни синимақчимән. Әпсус, мени қоллап-қувәтләватқан бовам вапат болуп кәтти. Бийил, һаят болса, 70-баһарини қарши алған болар едуқ. Шуңлашқа мән җумһурийәтлик мусабиқидә ғалибийәт қазансам, уни бовам Вексил Анайәтовниң роһиға беғишлаймән, — дәйду Сабина. Уйғур наһийәси.