• Яднамә
• 13 Сәуір, 2017

Қериндашниң оти бөләк...

Бу қисқа өмүрдә хошаллиқ билән ғәм-қайғу қатарлишип маңидекән. Булту, дәл мошу вақитта, биз акимиз Антей Абдулла оғли Һәмраевниң 70 яшлиқ тәвәллудини дағдуғилиқ нишанлап өтүведуқ. Шу һаяҗанлиқ дәмләрни көтирәлмәй қалдиму, аридин көп-өтмәйла қәдирдан қериндишимиз туюқсиз аләмдин өтти.Вақит өткәнсири униң йоқлуғи билинип, бурунқиларниң «қериндашниң оти бөләк» дегән әқиланә сөзиниң нәқәдәр һәққанийлиғиға көз йәткүзидекәнсән вә униң һаят йоли көз алдиңдин һеч кәтмәйдекән.. Мәктәптә оқуп жүргәндила акам өзиниң җисманий җәһәттин йетүклиги билән пәриқлинип туридиған. Биз атимиздин кичик айрилғачқа, дадам һулини қуруп, башлап қойған өйниң там қурулушини акилирим Артем билән Антей вә һәдилиримгә давамлаштурушқа тоғра кәлди. 1967-жили Ташкәнт физкультура институтини тамамлап келип, та һөрмәтлик дәм елишқа чиққичә, үзлүксиз Октябрь оттура мәктивидә ишлиди. Дәсләпки алий билимлик тәнтәрбийә муәллими болғачқа, кәсипдиши Марс Ерқараев билән бирликтә мәктәп йенида спорт мәйданини һәм гимнастика вә акробатика үчүн керәк васитиләрни бәрпа қилған еди. Есимда қалғини, өйгә иссиқлиқ системисини қоюшқа жиғип қойған трубиларни спорт мәйданчисиниң һаҗитигә ишлитиветип, апамдин «дәшнәм» йегән. Асасий мутәхәссислиги гимнастика болсиму, йеза балилири үчүн аммибап спорт түрлири — футбол, болупму волейбол оюнлирини үгитишкә алаһидә көңүл бөлди. Акам қош Ленин орденлиқ чопан Сәлим Шормақов намидики кубок үчүн волейболдин наһийәләрара мусабиқә уюштурушниң тәшәббускарлириниң бири болди. Кичикачиноқилиқлар һелиғичә наһийә вә вилайәт даирисидә өткән мусабиқиләргә қатнишип, мукапатлиқ орунларни елип  келиватиду. У шундақла синиптин сирт чарә-тәдбирләрни еринмәй өткүзидиған. Мәрһум акам әмгәкчанлиғи биләнму пәриқлинәтти. Язлиқ тәтилдә колхозда қурулуш бригадисини тәшкил қилип, нәччилигән мал қоралири билән малчилар өйлирини селишқа чоң һәссә қошти. Пенсиягә чиққандин кейин «Тәңритағ» дехан егилигини тәшкил қилип, һаятиниң ахирқи дәмлиригичә йеза егилиги мәһсулатлирини йетиштүрүштә көчниң алдида болуп кәлди. Қериндашлириға болған көйүми билән ғәмхорлуғи чәксиз еди. Һәр қайсимизниң ишини асан қилишқа сәкпарә болуп, алайтәнла меһриванлиқ қилидиған. Шуңлашқиму йоруқ дуниядин мәңгүгә кәтсиму, жутдашлар уни иллиқ хатирилири илкидә дайим әсләп туриду. Адилҗан ҺӘМРАЕВ. Уйғур наһийәси.