• Йеңилиқлар
  • 20 Сәуір, 2017

У мениң устазим еди!

Мәлумки, 2003-жили «Қа­зақ­стан уйғурлириниң җум­һурийәтлик мәдәнийәт мәр­кизи» җәмийәтлик бир­ләшмиси рәсмий ройхәттин өтүп, униң шөбилирини қуруш қолға елинди. Шу жилдин башлап, җумһурийәтлик Уйғур этномәдәнийәт мәркизи рәи­синиң ярдәмчиси болуп ишқа қобул қилиндим. Мәркәз рәиси Әхмәтҗан ака Шардинов болса, униң биринчи орунбасари Турған ака Розахунов еди.Мән Турған ака билән 13 жил ишләптимән, бу вақит арилиғида униңдин көп нәрсиләрни үгәндим. Турған ака: «Келәчәк яшлариниң қолида», дәп ишинәтти вә билгинини зерикмәй үгитәтти. Бирәр ишни хата қилип қойған һаләттиму, териккинини сиртиға чиқарматти, еринмәй қайтидин чүшәндүрүп: «Әнди бу хаталиғиңиздин савақ елип, уни башқа қайтилимайдиғиниңизға үмүт қилимән», дәп ишәнчә билән қаратти. Турған ака әтрапиға яшларни жиғишни яқтуратти. «Силәр һечкимдин кам әмәс, һөкүмәт тәрипидин яритиливатқан имтиязлардин пайдилиниңлар, заман тәливигә лайиқ билим елиңлар» дәп қайта-қайта тәкрарлайдиған. Турған акиниң ғәмхорлуғида нәччилигән яш ғунчиләр чәт әлләргә берип, хәлиқара көрүкләргә қатнашти, қанчи­лигән яшлиримиз чәт әлләрдә билим алди, бирнәччә бемар балиларға яшаш үмүтини бәрди... Есимда, 2004-жили 17-январь күни барлиқ миллий мәдәнийәт мәркәзлири вәкиллириниң қатнишиши билән ҖУЭМниң һесават жиғини болуп өтти. Шу жиғинда сөзгә чиққан Чечен мәдәнийәт мәркизиниң рәиси ҖУЭМниң атқуруватқан ишлириға өзиниң иҗабий баһасини берип, ушбу мәдәнийәт мәркизимизни баш­қиларға үлгә қилип көрсәт­кән еди. Бир күни Турған акиниң кабинетиға Әмгәкчиқазақ на­һийәси Баяндай йезисиниң жут чоңлири билән мәктәп мудири кирип кәлди. Улар жуттики мәктәп бенасиниң еғир әһвалини ейтип кәлгән екән. Меһманларни зәң қоюп тиңшиған Турған ака, көп өтмәйла, Баяндай йезисиға бир топ башқарма әзалири билән барди. Мәзкүр жуттики мәктәпниң әһвали билән тонушқан у жут чоңлириға билим дәргаһини җиддий ремонттин чиқирип беришкә күч салидиғанлиғини вәдә қилди. Шу жили бир топ тиҗарәтчиләрни жиғип, уларға Баяндай мәктивиниң әһвалини чүшәндүрди. Шундақ қилип, мәктәпкә җәми 25 миллион тәңгә мәбләғ аҗритилип, толуқ җөндәштин өтти. Т.Розахуновниң тәшәббуси билән Уйғур театри бенасиниң һойлисиға композитор Қуддус Ғоҗамияровниң һәйкили орнитилди, җәмийәт әрбаби Исмайил Йүсүповниң қәбригә орнитилған һәйкәлму шу җүмлидиндур. Т.Розахунов ҖУЭМниң муа­вин рәиси хизмитидин кәт­кәндин кейин, 2009-жили Қ.Ғоҗамияров намидики җум­һурийәтлик дөләт академиялик Уйғур театриниң мудири Адилҗан Җанбақиевниң тәкливи билән мудирниң биринчи орунбасари хизмитигә тайинлиниду. Турған ака әнди хәлқиниң мәдәний әңгүштәри – миллий театримиз билән бир нәпәстә болушқа күч чиқириду. Т.Розахунов «сәккиз қирлиқ, бир сирлиқ» инсан еди, чүнки қайси саһада ишлимисун, чин вуҗуди билән хизмәт қилатти. Һелиму ядимда, Турған акиниң Астанада истиқамәт қиливатқан оғли Арманҗан дадисини пайтәхткә келип, өзи башлиған шәхсий тиҗаритигә рәһбәрлик қилип, йол-йоруқ көрситишини илтимас қилған еди. Амма өз пәрзәндиниң мәнпийитидин, хәлқиниң мән­пийитини үстүн көргән устазим оғлиниң тәкливини рәт қилди. Худди бир нәрсини сәзгәндәк, ишлирини тезлитип, йәнә бир йеңи лайиһини дунияға әкәлди. Турған акиниң тәшәббуси билән «Инайәт» ассоциацияси қурулди. Уни маддий җәһәттин Кинтал Исламов қоллап-қувәтлиди. «Инайәт» ассоциациясиниң мәхсити — миллий маарипни тәрәққий әткүзүш болди. Тәҗрибиси мол Турған ака мәзкүр тәшкилатниң ишини җанландурди, төрт жил мабайнида миллитимизгә аит мәсилиләрни алға сүрүп, уларниң иҗабий йешимини тапти. Уйғур балилирини чәт әлләргә оқушқа әвәтиш имканийитини яратти. Имканийити чәкләнгән балиларғиму алаһидә көңүл бөлүп, уларниң җәмийитимиздә өзлирини йеримҗан әмәс, бәлки толуқ һоқуқлуқ әзимәтләр сүпитидә сезинишигә зәмин яратти. Бу җәмийәтлик тәшкилат әмәлгә ашурған барлиқ ишларни тизип чиқишниң өзи хелә вақитни алған болар еди. Турған ака билән ишлигән һәрбир күн мениң үчүн қиммәт еди. Мән униңдин җәмийәтлик ишларни уюштурушниң қир-сирлирини үгәндим. Әгәр бүгүнки күндә хәлқимгә яриғидәк, тапшурулған ишниң айиғиға ғәлибә билән йәткидәк бир инсан болсам, бу пәқәт Турған акиниң әҗриниң нәтиҗиси дәп билимән. Бир күни Турған ака «Сиз көп ишларға арилаштиңиз, тәҗрибиңиз молийип, жүкләнгән вәзипиләрниң һөддисидин толуқ чиқип жүрисиз», дәп бешимни көккә йәткүзди. Тәләпчан устаздин мундақ сөзлирини аңлаш чоң бир бәхит еди. Мәнму, өз новитидә, устазимға чәксиз миннәтдар екәнлигимни ейттим. У бир дәқиқә ойға чөмдидә, кейин:  «Надира, бу һаятта һәммимиз меһман, һечким мәңгүлүк әмәс» деди. Шу чағда мән: «Турған ака немиләрни дәватисиз, сиз билән талай ишларни әмәлгә ашуримиз, сизгә охшаш адәмләр хәлқимизгә керәк», дәп көзүмдин тамча яшлар еқип чүшкинини өзәмму сәзмәй қалдим. Әпсус, миңларчә әпсус, Турған ака өзиниң бу һаяттин әтигән кетидиғини сәзгән екән... Һеликәм ишәнгүм кәлмәйду, вақит өткәнсири Турған акиниң йоқлуғи һәр қәдимимиздә билиниватиду. Дилкәш, милләтпәрвәр, ақ көңүл инсанниң аримиздин бевақит кетиши һәммимизниң бешини гаңгиритип қойди. Чүнки униңдәк уюштуруш қабилийити жуқури туғма талант егилири биздә камдин-кам. Надирәм ӨМӘРОВА, «Инайәт» ассоциацияси рәисиниң мәмурийәт вә малийә мәсилилири бойичә орунбасари.

562 рет

көрсетілді

0

пікір
Алдыңғы мақала Пәқәт яхши гепи қалди
Келесі мақала «Өчмәс йилтиз» әвлади яки Өзгиниму өз қилишни билидиған ана һәққидә

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

21 Қазан, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы