• Спорт
  • 30 Қаңтар, 2012

Дуния чемпионати Алмутида өтиду

29-январь вә 5-февраль арилиғида Алмутида 14 командиниң қатнишиши билән поңзәк хоккейи (бенди) бойичә дуния чемпионати өткүзүлиду. Бу қетимқи чемпионатқа Россия, Швеция, Финляндия, Норвегия, Голландия, Беларусь, Латвия, Эстония, АҚШ, Канада, Япония, Венгрия, Қирғизстан вә Қазақстан талланма командилири иштрак қилиш хаһишини билдүрүп, улар дәриҗисигә қарап, үч дивизионға — «А», «В» вә «С» дивизионлириға бөлүнди. «А» дивизионида — күчлүк «алтиликтә» — Россия, Швеция, Финляндия, Норвегия, АҚШ вә Қазақстан, иккинчи «бәшликтә»  — «В» дивизионида — Канада, Беларусь, Голландия, Венгрия, Латвия вә «С» дивизионида Қирғизстан, Эстония, Япония талланма командилири оюн көрситиду. Ейтмақчи, «В» топиниң дәсләптә алтә коллективтин ибарәт болидиғанлиғи көздә тутулған еди. Бирақ, ахирқи пәйттә, Моңғулстан талланма командиси дуния чемпионатиға қатнишиштин ваз кәчти.   Чемпионат Алмутиниң икки стадионида өткүзүлүп, «Медеу» муз мәйдани турнирниң асасий орниға айлиниду. Бу йәрдә «А» топиниң турнири, шундақла чемпионатниң йерим финал вә финаллиқ учришишлири, қалған икки топтики мусабиқилар болса, Мәркизий стадионниң қошумчә мәйданида өткүзүлиду. Поңзәк хоккейи ишқивазлириға яхши мәлумки, жутдашлиримиз дуния чемпионатлирида һәр дайим «А» топида ойнап, үчинчи, көпирәк төртинчи орунларни егиләп келиватиду. Бизниң жигитләрниң илгәрки дуния биринчиликлиридә икки қетим бронза медалиға сазавәр болғанлиғини поңзәк хоккейиниң мухлислири яхши билиду, дәп ойлаймиз. Мана мошу медаль дәриҗиси үчүн болған күрәшләрдә Финляндия талланма командиси бизниң хоккейчилиримизниң асасий рәқиви болуп кәлмәктә. Мәсилән, 2003-жилдики дуния биринчилигидә бизниң талланма командимиз финлар үстидин 4:1, 2005-жили болса, 5:3 һесави билән ғалип чиқип, үчинчи орунға сазавәр болған еди. Шундақ екән, биз бу қетим Алексей Никишов рәһбәрлигидики Қазақстан талланма командисиниң өз мәйданида мукапатлиқ орунларниң бирини егиләйдиғанлиғиға чоң үмүт қилимиз. Ейтмақчи, Россия, Швеция, Қазақстан вә Финляндия талланма командилири бу қетимқи дуния чемпионатида алдинқи үч орун үчүн күришидиған командилар қатарида тилға елиниватиду. Дуния чемпионати 29-январь күни «Медеу» муз мәйданида Швеция вә Финляндия командилириниң учришиши билән ечилиду. Бизниң команда чемпионатни 29-январь, йәкшәнбә күни Норвегия талланма командиси билән өткүзидиған учришиштин башлайду. Әтиси жигитлиримиз АҚШ, 31-январьда Швеция, 1-февральда Россия вә 2-февральда Финляндия талланма командилири билән күч синишиду. 4-февральда 2 — 5-орунлар үчүн оюнлар өткүзүлиду. Бу басқучта «В» вә «С» топлирида ғалип чиққан командилар «А» топида ахирқи орунни егилигән команда билән новәттики чемпионатта «А» топида ойнаш һоқуқини беридиған йолланма үчүн күришиду. Үчинчи вә биринчи орун үчүн матчлар 5-февральға бәлгүләнди. Ахирида шуни қошумчә қилимизки, дуния чемпионати тәшкилий комитети вәкиллириниң билдүрүшичә, Мәркизий стадионниң қошумчә мәйданидики учришишларни ишқивазлар һәқсиз тамашә қилалайду. «Медеу» муз мәйданидики барлиқ матчларға кириш билети 200 тәңгә, финаллиқ учришишниң билети болса, 500 тәңгә туриду. Шөһрәт МӘСИМОВ.

189 рет

көрсетілді

0

пікір
Алдыңғы мақала Турнир ғалиби — баһарлиқ волейболчилар
Келесі мақала Мәвсүм мартта башлиниду

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

25 Қараша, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы