- Замандаш
- 28 Сәуір, 2017
Дөңмәлиниң мөтивәри
Баһарниң иллиқ күнлиридә ағинәм Нодәр Сабиров һаятиниң шанлиқ сәксининчи даваниға көтирилди. Нодәр Яркәнттә, мән Пәнҗимдә яшисақму, балилиқ вә өсмүрлүк дәвримиздин башланған тонушлуғимиз бүгүнки күндә қериндашлиққа улашти. Шуңлашқа биз вақит тапсақла, бир-биримизниң һалидин хәвәр елип муңдашқили, сирдашқили алдираймиз.Сәргүзәштиләргә толуп-ташқан өтмүш сәһипилирини варақлап, яшлиғимиздики қизиқ вақиәләрни, биллә ишлигән чағларни әсләймиз. Һә, уруш жиллириниң балилири болған биздемәтликләрниң бир-биримизгила әмәс, бүгүнки әвлатқиму ейтаримиз көп.
Нодәр Сабиров 1937-жили Яркәнт шәһиридә дунияға кәлгән. Шәһәрдики С.Киров намидики мәктәпниң йәттинчи синипини тамамлапла МТСта механизаторларни тәйярлайдиған қисқа курста оқуп, атиси Тайир билән аниси Гүлсүмханлар һулини қурған «Октябрьниң 40 жиллиғи» колхозида тракторист болуп ишлиди. Бүгүнки әвлат йеза егилиги ишләп чиқиришида тракторист болуп ишлимәкниң қандақ екәнлигини тәсәввур қилалмаслиғи мүмкин. Амма бизқурамлиқлар яхши билимизки, бу жилниң түгәл төрт пәслидә тиним тапмайдиған оқәт егилири. Тәбиитидин ишләмчан Нодәр болса, наһийәдики маһир тәшкилатчи Николай Головацкий башқурған егиликтә қириқ жиллиқ һаятини мошундақ иш билән өткүзди. У өз ишиға наһайити җавапкәрлик билән әстаидил берилип ишлигәчкә, илғар механизатор аталди. Узун жиллар давамида трактористлар бригадисиниң бригадири болди.
Яшлиғимиз җапалиқ әмгәк билән өтти, — дәйду Нодәр өтмүшкә нәзәр ташлап. — Әмгигимизму мунасип баһаланди. «Қазақ ССРниң әмгәк сиңәргән механизатори» аталди. 1962-жили Пүткүлиттипақлиқ хәлиқ егилиги муваппәқийәтлири көргәзмисини, сабиқ Кеңәш елиниң һәм чәт әлләрниң көплигән көрнәклик җайлирини зиярәт қилдим. Санаторийлардиму болдум, амма туғулуп өскән Яркитимдәк гөзәл җай йоқ екән. Тәбиитини ейтсаңчу, адәмлири қандақ меһриван, әмгәкчан. Һазир нәқ шу деханниң қутлуқ кәтминини мүрисигә селип ишләйдиған пәйт кәлди әмәсму. Мән шу етизлиқларни, тракторниң гүрүлдигән үнини сеғинимән.
Нодәр 1995-жили һөрмәтлик дәм елишқа чиққандин кейин жутдарчилиқ ишларға қоюқ арилашти. Дөңмәлиниң дәсләпки жигитбеши Рустәм Мәмәттохтаев өзиниң илтимасиға бола бу иштин кәткәндә, дөңмәлиликләр Нодәр Сабировни бир еғиздин жигитбеши қилип сайлиди. У көпчиликни мәдәнийитимизни, сәнъитимизни, мәтбуатимизни тәрғип қилишқа, жуттики милләтләрара достлуқни мустәһкәмләшкә, сәпәрвәр қилишни билди. Һазир униң бу ишини яшлар давам қилмақта. Бирақ Дөңмәлидики чоң-кичик чарә-тәдбир Нодәр Сабировсиз өтмәйду. Яшларму униң мәслиһитигә муһтаҗ. Мөтивәрму һәрқандақ ишта дадил пикрини билдүрүп, жутниң ғеми билән яшимақта.
Ағинәм мошу жутлуқ Саадәт Баратова билән аилә қуруп, алтә пәрзәнт қучти. Улардин 14 нәврә вә 14 чәврә сөйди. Бирақ үч жил бурун рәпиқиси Саадәттин бевақит айрилди. Лекин пәрзәнтлири билән нәврилири күндә дегидәк атисиниң һалидин хәвәр елип туриду.
Мән қутлуқ өйниң мәзмут түврүги, қәдинас ағинәмниң туғулған күни билән тәбрикләп кәлгән әвлатлириға қарап зоқландим. Оғли Ғоҗәхмәт билән келини Розигүл қериндашлирини қучақ йейип қарши елип, анисиниң йоқлуғини билиндүрмиди.
Бу күни мән Дөңмәлиниң мөтивәри, миллий мәдәнийитимизниң җанкөйәри, қәдинас ағинәмни «хатирҗәм күнлириң бузулмиғай, узақ яша, дост», дәп тәбрикләп қолини қистим.
Лохманҗан ИСМАЙИЛҖАНОВ.
Яркәнт шәһири.
810 рет
көрсетілді0
пікір