• Әдәбият гүлзари
• 28 Сәуір, 2017

Шаир тәвәллудиға беғишланди

Бийил уйғур поэзиясидә алаһидә орни бар бүйүк шаир Илия Бәхтияниң 85 яшлиқ тәвәллудиға даир көплигән чарә-тәдбирләр өткүзүлүватиду. Әлвәттә, бу шаирниң қайтиланмас иҗадийитигә көрситилгән һөрмәттур. Мошундақ исми тарихта қалған намайәндилиримизни яд әйләшни әнъәнигә айландурған Талғир наһийәсиниң Қизил Ғәйрәт йезисидики 19-мәктәп-гимназиясидә «Илия Бәхтия оқушлири» мавзусида конкурс өткүзүлди. У шаирниң дости, Талғир наһийәсиниң Пәхрий граждини Һосман Һашимов тәрипидин уюштурулуп, конкурсқа наһийәдики уйғур синиплири бар барлиқ мәктәпләрдин оқуғучилар қатнашти. Әдәбий көрүк «Малика» уссулчилар топиниң әвришим уссуллири билән башланди. Андин Һосман Һашим оғли студентлиқ дәврини ядиға елип, Илия Бәхтия һәққидики әслимилири билән бөлүшти. Конкурс тәртиви бойичә Талғир наһийәлик Уйғур этномәдәнийәт мәркизиниң рәиси Иминҗан Тохтахунов, «Бейбітшілік әлемі» Хәлиқара қазақ иҗадий бирләшмисиниң вице-президенти Турсун Разиев, шаирниң җийәни Шаһам Молотов, пешқәдәм устаз Светлана Дәраева һәм уйғур тили вә әдәбияти пәниниң муәллими Мунирәм Низамудиновадин тәркип тапқан қазилар топи сайлинип, оқуғучилар ипадилик оқуш, рәсим сизиш вә нахша ейтиш бойичә өзара күч синашти. Конкурс ахирида ғалип чиққан оқуғучиларға вә ушбу әдәбий көрүккә уларни тәйярлиған устазларға җумһурийәтлик Уйғур этномәдәнийәт мәркизи намидин һәм «Бейбітшілік әләмі» қазақ иҗадий бирләшмисиниң дипломи, Пәхрий ярлиқлар тапшурулди. Зарина АБДУЛЛАЕВА, уйғур тили вә әдәбияти пәниниң муәллими. Талғир наһийәси.