• 1-Май — Қазақстан хәлқи бирлиги күни
  • 28 Сәуір, 2017

Асасий байлиғимиз — бирлигимиз

1-Май — улуқ мәйрәм. У мәмликитимиз хәлиқлириниң һәр жили  бир-биригә нисбәтән пикирдашлиқ, һисдашлиқ, қериндашлиқ, тиләкдашлиқ охшаш сәмимий, алийҗанап һис-туйғулар билән толуп-ташқан вә дағдуғилиқ нишанлинидиған гөзәл мәйрәмлиримизниң бири.Бу мәйрәм адәмләргә шатлиқ беғишлап, уларни әтики күнниң бәхитлик дәмлири билән һаят кәчүрүшкә, әмгәк қилишқа илһамландуриду, ениғирағи, дәвәт қилиду. Шуңлашқиму бу мәйрәмни барчә хәлиқ тәшналиқ билән күтиду, униңға чоң-кичикниң һәммиси үмүт-ишәнчилирини бағлайду. Шуниң билән бирқатарда, бу мәйрәм өзиниң мубарәк қәдими билән кишиләр қәлбидә қандақту-бир яхшилиқ-изгүлүк, иллиқ-йеңилиқ сезимлирини пәйда қилиду. Шундақ екән,  1-Майни — Қазақстан хәлқиниң бирлиги күнини –  чоң хошаллиқ илкидә дағдуғилиқ атап өтүшимиз лазим. Чүнки бу хәлиқләр достлуғи вә миллий бирлик мәйрими. Елимиздә қелиплашқан милләтләрара разимәнлик билән достлуқ барлиқ утуқлиримизға мустәһкәм асас болуватқанлиғини дуния җамаәтчилиги етирап қиливатиду. Тунҗа Президент — Милләт Лидери Нурсултан Әбиш оғли Назарбаевниң дана ички сәясити түпәйли вә униң тәшәббуси билән қурулған Қазақстан хәлқи Ассамблеяси әйнә шу мустәһкәм асасни техиму мустәһкәмләватқан дунияда тәңдиши йоқ надир институт сүпитидә қобул қилиниватиду. Ассамблея мундақ жуқури баһаға, сөз йоқ, Қазақстанда истиқамәт қилидиған 130дин ошуқ милләт билән еләтниң «еғирини — йеник, жириғини йеқин қилидиған» қандақту-бир тилсим тәшкилат сүпитидила әмәс, бәлки барчә қазақстанлиқларни достлуқ вә өзара разимәнлик шараитида бир мәхсәткә — мустәқил Қазақстанниң техиму мустәһкәм дөләт сүпитидә тәрәққий етишигә хизмәт қилишқа дәвәт қилидиған вә қанун асасида бәкитилгән қурулумдур. Бу шәкилни ҚХАниң конституциялик мәртивигә егә болуши техиму нәтиҗидарлиқ қилип туриду вә униң тәркивидики 820 этномәдәний бирләшминиң яритилған барлиқ шараиттин үнүмлүк пайдилинишиға зәмин болмақта. Шәхсән өзәм уйғурлар зич орунлашқан барлиқ наһийәләрдә, йеза-мәлиләрдә болуп, аһали билән учраштим. Астана, Чимкәнт, Орал, Талдиқорған шәһәрлирини зиярәт қилип, шу йәрләрдә истиқамәт қиливатқан қериндашлиримизниң нәпәси билән йеқиндин тонушуп қайттим. Қәйәрдә болмай вә ким билән сөһбәтләшмәй, һәммиси күч-қувитини мустәқил елимизниң тәрәққияти үчүн сәрип қиливатқанлиғини, миллитигә вә диний етиқатиға бола һечқандақ камситиш әһваллириға дуч кәлмәй яшаватқанлиғиниң гувачиси болдум. Демәк, елимиздә қелиплашқан гражданлиқ течлиқ, җәмийәтлик разимәнлик, милләтләрара достлуқ қанчилик чоңқур йилтиз тартқанлиғини өзимизниң мисалидин ениқ сезимиз вә күндилик турмушимизда көрүп жүримиз. Умумән, елимиздики мил­ләтләрара достлуқ тоғрилиқ ейтқанда, бу достлуқниң уютқиси  Дөләт рәһбири Нурсултан Назарбаев екәнлигини бир пәсму ядимиздин чиқармаслиғимиз керәк. Президентниң шәхсән рәһбәрлиги нәтиҗисидә бүгүн Қазақстан хәлқи йеңилиниш, инновациялик индустрияләштүрүш вә келәчәккә технологиялик сәкрәш идеясиниң әтрапиға топлашти.  Дөләт рәһбириниң  мошу йеқинда аммивий әхбарат васитилиридә елан қилинған «Келәчәккә нишан: мәнивий йеңилиниш»  намлиқ мақалисида тәкитләнгән  «йеңилинишқа дегән ички интилиш — бизниң тәрәққиятимизниң әң асасий қаидиси» дегән тезиси бүгүнки күндиму вә келәчәктиму наһайити муһим. Аң-сәвийәни йеңилаш бизниң мәхсәтлиримизниң бирлигини, қәдрийәтлиримизниң умумлиғини вә җәмийәтлик разимәнликниң күчини көр­ситиду.  Бу, сөз йоқ, елимиздики хәлиқләр достлуғи билән бирлик- иттипақлиқниң, течлиқ билән разимәнликниң ярқин ипадисидур. Бирнакүн Астанадики «Теч­лиқ вә разимәнлик» сарийида Қазақстан хәлқи Ассамблеясиниң XXV сессияси болуп өтти. Униңда Дөләт рәһбири Нурсултан Назарбаев 2017-жилни «Мустәқил Қазақстан тарихидики алаһидә бир жил» дәп тәкитләп, «Биз системилиқ йеңилинишни қолға алдуқ. Биринчиси, ихтисадий йеңилиниш, иккинчиси, сәясий йеңилиниш, үчинчиси, мәнивий йеңилиниш» деди Президент өз сөзидә. Президентниң «Туған жер» лайиһиси мениңда ала­һидә тәсират қалдурди. Бу лайиһиниң Ассамблея үчүн­му чоң имканийәтләргә йол ечип беридиғанлиғиға иши­нимән. Президент өз сөзидә тиҗарәтчиләр билән иҗадий вә илмий зиялилар мәзкүр лайиһигә қатнишишқа, өз жутдашлирини қоллап-қувәтләшкә чақирди. «Қазақстандики 100 йеңи исим» лайиһигиму ҚХА беваситә арилишидиған болиду. «Биз Мустәқил Қазақстанниң иҗтимаий-ихтисадий, мәдәний тәрәққиятиға салмақлиқ һәссә қошуватқан адәмләрниң мил­литигә, униң қәйәрдин қелип чиққанлиғиға, җинсиға  қари­мастин, уларни хәлиққә тонуштурушимиз керәк» деди Президент. Биздиму әйнә шундақ елимизниң гүллиниши үчүн һәрхил саһаларда әмгәк қиливатқан миллитимиз вәкиллири көп. Уларни кәң аммиға тонуштурушни қолға елишимиз керәк. Биз ҖУЭМ арқилиқ келәчәктә Президент алға сүргән лайиһиләрни әмәлгә ашуруш үчүн бир яқидин баш, бир йәңдин қол чиқирип һәрикәт қилишимиз лазим. Бизниң асасий байлиғимиз — бирлигимиз. Уни көзүмизниң қаричуғидәк сақлаш — һәрбир қазақстанлиқниң муқәддәс борчи. Шундақ екән, 1-Май—Қазақстан хәлқиниң бирлиги күни һәммимизгә ортақ болған муқәддәс өйүмиздики течлиқ билән хатирҗәмликниң, разимәнлик билән турақлиқниң рәмзи болуп қаливәргәй. Бир-биримизни достлуқ, инақлиқ, бирлик мәйрими  билән тәб­рикләйли. Бу қетимқи 1-Май елимизгә қувәт, дәстихинимизға  бәрикәт елип кәлсун. Илаһим, мустәқил Қазақстан асминида атқан һәрбир таң бизгә мәйрәмлик кәйпият беғишлап турғай! Шаһимәрдан  НУРУМОВ, Қазақстан Җумһурийити Парламенти Мәҗлисиниң депутати, Қазақстан хәлқи Ассамблеяси Кеңишиниң әзаси, «Қазақстан уйғурлириниң җумһурийәтлик этномәдәнийәт мәркизи» җәмийәтлик бирләшмисиниң рәиси.

272 рет

көрсетілді

0

пікір
Алдыңғы мақала Дөләт инспектори  йеңи лайиһиләр билән тонушти  
Келесі мақала Бирлик вә разимәнлик – йеңилиниш асаси

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

23 Қыркүйек, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы