• Әхбаратлар еқими
• 04 Мамыр, 2017

Дағдуғилиқ нишанланди

Рашидәм РӘҺМАНОВА, «Уйғур авази/ 1-Май – Қазақстан хәлқиниң бирлиги күни Әмгәкчиқазақ наһийәсидә бу қетимму дағдуғилиқ нишанланди. Техи йеқиндила ечилип, пайдилинишқа берилгән Ишиктә шәһиридики Жамбыл Жабаев намидики яшлар парки рәңлик шарлар, елимиздә қелиплашқан милләтләрара разимәнлик билән достлуқни намайиш қилидиған шиарлар билән безәндүрүлүп, наһийәдики этномәдәнийәт мәркәзлири тәрипидин уюш­турулған көргәзмиләр түпәйли алаһидә мәйрәмлик рәң алди.Мәрасимда регион һакими Бинәли Ысқақ наһийә турғунлири билән меһманлирини мәйрими билән тәбрикләп, Қазақстанниң ихтисадий, сәясий вә мәнивий йеңилинишларни қолға алғанлиғини атап өтти. Өз нутқида әл тарихи, униң тәрәққиятиға беғишланған узақ муддәтлик программиларниң маһийитигә әтраплиқ тохталған Бинәли Әбдиқапас оғли «Бирлик бар йәрдә, бәрикәт болиду» дегән хәлиқ даналиғини, умумий Вәтинимиз – Қазақстан хәлқиниң бәхитлик һаяти милләтләрара бирлик, достлуқ вә разимәнликтә екәнлигини әскә салғач, наһийәдә истиқамәт қиливатқан  барлиқ милләтләр  вәкиллирини инақ-иҗил һаят кәчүрүшкә вә адил әмгәк қилишқа чақирди.  Әмгәкчиқазақ наһийәсидики Қазақстан хәлқиниң бирлиги күни мәйрими наһийәлик сәнъәткарлар билән этномәдәнийәт бирләшмилириниң мәйрәмлик концертиға улишип, аммивий хәлиқ сәйлиси билән аяқлашти. Әмгәкчиқазақ наһийәси.