• Қәлб нидаси
• 12 Мамыр, 2017

Орни толмас җудалиқ болди

Ата меһри/ Бу һаятта һәммә нәрсә тәл-төккүз болувәрмәйдекән. Хошаллиқ билән рәнҗиш, шатлиқ билән қайғуси қатар жүридиған өмүрни шуңа «алдамчи» дәп конилар бекар ейтмиған охшайду.Бизниң чоң вә инақ аилимиз һәр жили Ғалибийәт күни мәйрими һарписида Чоң Ақсу йезисидики қутлуқ өйүмиздә җуғиҗәм болуп, меһриван атимиз Авут Мирза оғлиниң туғулған күнини хошал-хорам нишанлап өтәттуқ. Тоққуз пәрзәнди билән нәврилирини көргәндә атимизиниң беши көккә йетәтти. Әпсус, бийил бу бәхит бизгә несип болмиди. Бу жили «Атимизниң 90-яшлиғини тойлаймиз» дәп, тәйярлиқ тәрәддутини қилған едуқ. Лекин, январь ейида у биз билән мәңгүгә хошлашти. 1927-жили 10-май күни Уйғур наһийәсиниң Чоң Ақсу йезисида туғулған дадимиз узақ һәм җапалиқ һаят йолини бесип өтти. Анимиз Иззәтхан иккиси үч қиз, алтә оғулни әл қатари чоң қилиш үчүн аянмай меһнәт қилди. Дадам әмгәккә әтигән арилишип, Түргүн йезисидики механизаторларни тәйярлайдиған курста билим алған екән. Колхоздила әмәс, пүтүн наһийәдә камчил болған бу кәсип егилири арилашмиған иш қалмиди. Дадамни пат-патла хошна колхозларға ярдәмгә чақиридиғанлиғи  есимдә қапту. У һерип-ечип өйгә қайтсиму, биз, пәрзәнтлирини, көргәндә һәммини унтуп һәрбиримизниң оқушини тәкшүрәтти. Анам иккиси өзлири еғир әмгәк әткәчкә, бизниң оқуп әлгә ярамлиқ болушимизни тиләтти. Шуниңға шараит яритишқа тиришти. Анимизму өй кокунчилиғи билән биллә колхоз ишиға көп арилашқан меһнәткәш аял еди. Лекин саламәтлиги еғир ишқа бәрдашлиқ берәлмиди вә бари-йоқи 52-йешида вапат болди. Рәмити дадам әмгәктә таллинип өскәчкә хелә узун өмүр  сүрди. У һелиму тимән еди. Амма өткән жили аилимизгә кәлгән паҗиә — акам Бәрахунниң туюқсиз вапати униңға орни толмас жудалиқ болди. Һаятта мәсләкдаш болуп өтүватқан сөйүмлүк пәрзәндиниң дәрдигә чидимиди. Ариға төрт ай селип өзи һаяттин өтти. Бәһрим МИРЗАЕВ. Алмута шәһири.