• Йеңилиқлар
• 12 Мамыр, 2017

Хәлиқ вә әлгә хизмәт қилиш

Нурсултан Назарбаев һәрбий хизмәтчиләргә, һоқуқ қоғдаш органлири хадимлириға дөләт мукапатлирини тапшуруп, жуқури һәрбий һәм мәхсус унванларни, класслиқ дәриҗиләрни бәрди.Дөләт рәһбири мәрасимға қатнашқучиларни мәйрәмләр билән тәбрикләп, Вәтән Һимайичиси күни вә Ғалибийәт күни охшаш муһим сәнәләрдә һәрбийләрни тәбрикләшниң узундин қелиплашқан яхши әнъәнә екәнлигини тәкитлиди. – Бу мәйрәмләр биз үчүн алаһидә қиммәт. Иккинчи дуния урушида чоң әвлатниң улуқ қәһриманлиқ вә әрлик үлгиси көрситилди. Уларниң хатириси мәңгү сақлиниши керәк, – дәп тәкитлиди Нурсултан Назарбаев. Президент һоқуқ қоғдаш қурулумлири вә армияниң мәмликәт бехәтәрлиги һәм мустәқиллигини тәминләштә алаһидә роль ойнаватқанлиғини тәкитләп, уларниң җанпидалиғи вә кәспийлигиниң жуқури баһа һәм һөрмәткә сазавәр екәнлигини қәйт қилди. – Силәргә мукапатларни чоң қанаәтлиниш илкидә тапшуруватимән. Бу –силәрниң әмгигиңларни, хизмитиңларни баһалашниң нәтиҗиси. Һәрбий хизмәтчиләр, һоқуқ қоғдаш системиси – дөләтниң таянчиси, Мустәқилликниң таянчиси. Силәр мукапатқа шанлиқ вақитта – мәмликәт Қураллиқ күчлириниң 25 жиллиғида сазавәр болуватисиләр, – деди Дөләт рәһбири. Андин кейин Қазақстан Җумһурийити Қураллиқ күчлириниң  Алий Баш қомандани Шималий Қазақстан вилайитиниң прокурори Берик Асыловқа, Дөләт күзити хизмити башлиғиниң орунбасари – Объектлар мудапиәси хизмитиниң башлиғи Мухтар Аюбаевқа, Миллий гвардияниң баш қомандани Руслан Жақсылықовқа, Мудапиә министрлиги Баш инспекциясиниң башлиғи Қурбан Қаражановқа, мудапиә министриниң биринчи орунбасари – Қураллиқ күчләр Баш штабиниң башлиғи Мурат Майкеевқа І дәриҗилик «Даңқ» орденини тапшурди. ІІ дәриҗилик «Даңқ» ордениға Ички ишлар министрлиги Мәмурий полиция комитетиниң рәиси Игорь Лепеха вә Мудапиә министрлиги «Ғәрип» регионлуқ қоманданлиқ әскәрлириниң қомандани Дәулет Оспанов сазавәр болди. Шундақла биртоп һәрбий хизмәтчиләр вә Миллий бехәтәрлик комитетиниң хадимлири І, ІІ, ІІІ дәриҗилик «Айбын» ордениға сазавәр болди. Униңдин ташқири Дөләт рәһбири бирнәччә һәрбий хизмәтчигә «Ерлігі үшін», «Жауынгерлік ерлігі үшін», «Ерен еңбегі үшін» медальлирини тапшурди. Мәрасим ахирида Нурсултан Назарбаев қатнашқучиларниң һәммисигә нуқсансиз хизмити үчүн миннәтдарлиқ билдүрүп, саламәтлик, паравәнлик вә утуқ-муваппәқийәтләр тилиди. ... Шу күни Дөләт рәһбири биртоп һәрбий хизмәтчиләр вә полиция һәм юстиция хадимлириға жуқури һәрбий һәм мәхсус унванларни, класслиқ дәриҗиләрни тапшурди.