- Маарип
- 25 Мамыр, 2017
Жилниң илғар муәллимлири ениқланди
Байқаш/ Қазақстанда билим беришни риваҗландурушниң 2011 – 2020-жилларға беғишланған дөләт программисида маарип саһасини күчәйтишкә, көптиллиқ билим беришни, йеңилиқларни җарий қилишни мәхсәтлик һалда жүргүзүшкә алаһидә диққәт бөлүниду. Мошу мәхсәткә асаслинип, барлиқ мәктәпләрдә муәллимләрниң иш-тәҗрибисини үгиниш вә үгитиш нийитидә наһийәлик, җумһурийәтлик семинарлар, «дүгләк үстәл», әнҗуманлар кәң даиридә өткүзүлмәктә.
Йеқинда әйнә шундақ чарә-тәдбирләрниң бири — Әмгәкчиқазақ наһийәлик маарип бөлүминиң уюштуруши билән «Жил муәллими-2017» наһийәлик байқаш-көрүги Әмгәкчиқазақ наһийәсиниң Көктөбе оттура мәктивидә өтти. Униңға наһийә мәктәплириниң муәллимлири қатнашти.
Икки күн давам қилған мәзкүр көрүк җәриянида муәллимләр төрт басқуч бойичә күч синишип, дәсләп «Йеңилиқпәрвәр устаз» мавзусида он минут ичидә эссе язди вә өз иш-тәҗрибиси билән ортақлашти. Андин қисқичә дәрис үлгисини көрситип, униң усул-услублирини муһакимә қилди. Шундақла улар мәлум бир мавзуни елип, уни оқуғучиларға үч минут ичидә чүшәндүрүп бәрди.
Ахирида көрүк ғалиплири ениқлинип, баш мукапатқа Жандосов намидики оттура мәктәпниң муәллими Айгерим Бекжанова егә болса, биринчи орун Д.Қонаев намидики оттура мәктәпниң муәллими Светлана Морозованиң әнчисигә тәгди. Иккинчи орунни Кенжебаев намидики оттура мәктәпниң муәллими Төрған Досымбаев билән Алтынсарин намидики оттура мәктәпниң муәллими Назгүл Наурызбетова егилиди. Үчинчи орунға Қорам оттура мәктивиниң муәллими Гүлзоһра Иминова (сүрәттә) муйәссәр болди.
Биз, мәзкүр билим дәргаһиниң муәллимлири, мукапатлиқ орун егилигән кәсипдишимизни бу утуғи билән сәмимий тәбрикләп, ишиға утуқ тиләймиз.
Диләрәм ТОХТИЕВА, Қорам оттура мәктивиниң муәллими. Әмгәкчиқазақ наһийәси.
437 рет
көрсетілді0
пікір