• Маарип
• 25 Мамыр, 2017

Азатлиқларниң даңқи Астанаға кәтти

Рашидәм РӘҺМАНОВА, «Уйғур авази»/ Мәлумки, кейинки икки жил мабайнида Кембридж Университетиниң Билим бериш факультети билән Назарбаев Университетиниң Алий билим бериш мәктиви бирликтә җумһурийәттики 55 мәктәп арисида «Балилар билән өсмүрләрниң роһий әһвали һәм уларниң мәктәп һаятиға вә оқуш җәрияниға қатнишиши» мавзусида тәтқиқат ишлирини жүргүзди. Нәтиҗидә әң илғар дәп тепилған билим дәргаһлириниң рәһбәрлири Назарбаев Университетида уюштурулған «дүгләк үстәлгә» тәклип қилинди. Униңға Алмута вилайити бойичә Әмгәкчиқазақ наһийәсиниң Азат толуқсиз оттура мәктивиниң илмий мудири Иврайимҗан Исмәков қатнашти. – Тәтқиқат ишлири җәриянида Назарбаев Университетиниң профессори Кэрол Фоше вә униң ассистенти Камила Мухамеджанова мәктивимиздә болуп, муәллимләр билән оқуғучилар билиминиң сүпитини, мәктәп йешидики балиларниң мәктәпкә җәлип қилинишини тәтқиқ қилди. Балилиримиз тәтқиқатчиларниң үч тилда қойған соаллириға һәртәрәплимә җавап берип, улар билән  әркин муамилә қилди, – дәйду Иврайимҗан Исрайил оғли. Мошу йәрдә Равина Қурбанова, Сабина Надирова, Аида Қасимова, Гүлинур Һәмраева, Элнур Җаппарова қатарлиқ үлгилик оқуғучиларниң исимлирини тилға алғумиз келиду. Шундақла  меһманлар мәктәптә  өткән Достлуқ мәйриминиму жуқури баһалиди. Мәзкүр чарә-тәдбирләрдә устазлар билән оқуғучилар Азат йезисида иҗил-инақ яшаватқан милләтләрниң урпи-адәтлири билән әнъәнилирини намайиш қилди. — Назарбаев Университетида өткән учришиштин наһайити жуқури тәсират алдим. Профессорларниң тәклип-пикирлирини кәсипдашлиримға йәткүзүп, техиму жуқури пәллиләргә интилишимиз керәклигини ейттим. Ишиктә шәһири А.Мәлкеев намидики қазақ-түрк лицейида билим алған, исми дунияға мәлум яш алимимиз Ширәли  Қадиров Назарбаев Университетида дәрис бериветипту. Шундақла Маһирәм Қасимова исимлиқ қизимиз докторантурида, 10дин ошуқ қиз-жигитлиримиз тәһсил көрүветипту. Уйғур пәрзәнтлириниң утуқлиридин бәк хурсән болдум, – дәп өз тәсиратлири билән бөлүшти Иврайимҗан ака. СҮРӘТТӘ: И.Исмәков (солдин биринчи) вә профессор К.Фоше (оттурида), қариғандилиқ вәкил Е.Жапабаев. Әмгәкчиқазақ наһийәси.