• Йеңилиқлар
• 25 Мамыр, 2017

Уйғур шеирийитиниң сәрдари

Мушаирә/ Шахризада САБИТОВА, «Уйғур авази»/ Өткән һәптидә Уйғур наһийәсиниң Чонҗа йезисидики 3-уйғур оттура мәктивидә көрнәклик шаир Илия Бәхтияниң туғулғининиң 85 яшлиғиға беғишланған әдәбий кәч болуп өтти. Шаир намида атилидиған мәктәпниң мәҗлисләр зали худди чөчәкләр дуниясидәк, бөләкчә безәндүрүлүпту. Сәһнә төридин орун алған оқуғучилар билән ихчам мәркәз тәрбийиләнгүчилири мәйрәмлик кийингәчкә, кәчкә сөләт берип туриду. Риясәтчиләр кәчниң мәхсәт-муддиасиға тохталғандин кейин, Илия обризи гәвдиләндүрүлүп, тәрҗимиһали көпчиликкә тонуштурулди. Андин сөз алған Уйғур наһийәлик мәслиһәтниң кативи Нурәким Есжан тонулған шаирлар Илия билән Муқағалиниң достлуғиға тохтилип, икки хәлиқниң қериндашлиқ риштилири һәққидә иллиқ ләвзини билдүрсә, җәмийәтлик ишларниң активисти, жут мөтивәри Закир Мәмиров, «Бейбітшілік әлемі» хәлиқара қазақ иҗадий бирләшмисиниң вице-президенти Турсун Розиев Илия Бәхтияниң әдәбиятимизда тутқан орни һәққидә ейтип өтти. Шаирниң жутдиши Полат Хоҗаев Илия Бәхтияниң сөзигә йезилған икки нахшисини орунлап бәрди. Кәчтә тиҗарәтчи Мәхсәтҗан Қаһаров мәктәп мирасгаһиға миллий саз әсваплирини соға қилди. Пешқәдәм устаз Сағабай Қурмашев, шаирниң қериндиши Азат Палтушев, наһийәлик маарип бөлүминиң методисти Бахтияр Нурқасымбай мәзмунлуқ өмүр сүрүп, өчмәс из қалдурған шаирниң роһиға тазим қилип, мәктәп мудири Мунира Пәрһат қизиға вә мәзкүр мәрасимни уюштурушқа көп күч чиқарған муәллимләр коллективиға миннәтдарлиғини изһар қилишти. Ейтилған изгү-тиләк, хатириләрдин кейин меһманлар мәктәп һойлисидики шаирниң ядикарлиғиға гүлчәмбәр қойди. Кәч давами концертлиқ программиға улашти. Оқуғучилар шаирниң шеирлирини ипадилик оқуп, кәч меһманлирини һаяҗанға бөлисә, уссулчи қизларниң әвришим уссуллири билән милләтләр достлуғини күйлигән нахша-сазлар вә әдипниң сөзигә йезилған «Уйғурларни тонуштуруш» нахшиси көпчиликкә арамбәхш дәмләрни һәдийә қилди. Андин наһийә мәктәплиридин кәлгән оқуғучилар, муәллимләр һәм меһманлар Илия Бәхтия мирасгаһини зиярәт қилип, шаирниң һаяти вә иҗадийити билән әтраплиқ тонушти. Кәчниң иккинчи қисми мушаирә билән башланди. Наһийә мәктәплиридин 19 нәпәр һәвәскар шаир сәһнә төридин орун алди. Дәсләп оқуғучилар шаирниң бир шеирини ядқа оқуди. Андин улар үч топқа бөлүнүп, шаирниң «Бәхит қуши», «Или вадиси» «Тянь-Шань жигити» поэмилирини ядқа ейтип, мусабиқигә чүшти. Ахирида мушаирә ғалиплири ениқлинип, Баш мукапат Илия Бәхтия намидики 3-уйғур оттура мәктивиниң оқуғучиси Руфина Махмутованиң әнчисигә тәгди. Иккинчи орунни А.Розибақиев намидики Баһар оттура мәктивиниң оқуғучиси Назугум Мәсимова билән М.Тейипов намидики Кичик Дехан оттура мәктивиниң оқуғучиси Адиләм Мамутова өзара бөлүшти. Үчинчи орунға Һ.Искәндәров намидики Ават оттура мәктивиниң оқуғучиси Гүлчина Исмайилова билән 5-Чонҗа уйғур оттура мәктивиниң оқуғучиси Шахмина Ризайдинова вә М.Һәмраев намидики Чарин оттура мәктивиниң оқуғучиси Һәмрабүви Турдиева муйәссәр болди. Мушаирә ғалиплири маддий вә мәнивий соғилар билән мукапатланди.   Уйғур наһийәси.