• Дидар ғенимәт
• 01 Маусым, 2017

Көңүлләргә хошаллиқ һәдийә қилған дәмләр

Рашидәм РӘҺМАНОВА,«Уйғур авази»/ Буниңдин 60 жил муқәддәм Челәк наһийәсиниң (һазирқи Әмгәкчиқазақ наһийәси) Ғәйрәт йезисидики 8 жиллиқ мәктәп босуғисини атлиғанлар 8-синиптин кейин Челәк йезисиниң Абай намидики оттура мәктивидә оқуған еди. Улар 1967-жили шаһадәтнамилирини елип, һәр ким өз йоли билән һәр ян кетишти. Мана бийил шуниңдин 50 жил өтүпту. Йеқинда улар қайта учрашти. Синипдашлар әң алди билән дәсләпки устази Һетахун Мухпуловни йоқлиди. Андин Ғәйрәт йезисидики И.Саттаров намидики билим дәргаһида өткән «Ахирқи қоңғурақ» мәрасимиға қатнашти. Өткән әллик жил давамида қанчә сулар еқип, қандақ қизиқарлиқ вә қийин дәмләр йүз бәрди. Мәктәп һаятини, балилиқ-яшлиқ дәврини әслигән улар бевақит һаят билән хошлашқан достлири Һошурахун Исрайилов, Нурәхмәт Җаппаров, Мәсимҗан Турсунов, Ислам вә Керман Мәмәтовлар, Пәридәм Ахмоллаева вә Зорагүл Розахунованиң роһиға қуръан тилавәт қилишти. Түнүгүнки яш жигит-қизлар — һазир чечи ақирип, чиши сарғайған мөтивәрләр — учришиши Челәк йезисидики кафеларниң биридә давамлашти. Зияпәт давамида улар пуғани қанғичә муңдишип, һаятниң гөзәл чағлирини әслигәч, саз-нәғмиләрдин бәһримән болди. Учришиш иштракчилири, өз новитидә, ушбу баш қошушниң тәшәббускарлири болған Гүлминәм Турдиева билән Гүлҗәһрәм Ибдиминоваға сәмимий миннәтдарлиғини изһар қилди. Әмгәкчиқазақ наһийәси. СҮРӘТТӘ: сабиқ синипдашлар.