- Йеңилиқлар
- 03 Тамыз, 2012
Мукапатлар үчүн күрәш давамлишиду
Қазақстан Олимпиада командисиниң дәсләпки күнләрдин тартипла яхши нәтиҗиләргә еришиши бир қаримаққа, бизни у йәрдә йүз бериватқан башқа вақиәләрдин чәтләштүрүп қойғандәк. Айрим спортчилиримиз Олимпиада билән хошлашса, бәзилири мукапатлар үчүн күрәшни давамлаштуруватиду. Шундақ екән, әйнә шулар тоғрилиқ қисқа болсиму гезитханлиримизни хәвәрдар қилишни мувапиқ көрүватимиз.
Дзюдо. Спортниң бу түри билән шуғуллиниватқан палванлиримиз Олимпиада күришигә дәсләпкиләрдин болуп қатнашти. 60 килограммғичә болған салмақ категориясидә җумһурийитимизгә Еркебулан Қосаев вакаләтлик қилди. У биринчи учришишта канадилиқ Серхио Пессоа үстидин ғалип чиқсиму, иккинчи учришишта әрмәнстанлиқ Овсет Давтяндин йеңилип қалди.
66 килограммғичә болған салмақ категориясидә Сергей Лимниң йолиму шундақ болди: у дәсләптә Болғария вәкили Мартин Иванов үстидин ғалип чиққан болса, новәттики басқучта япониялик Масаси Эбинума алдида тиз пүкүшкә мәҗбур болди. Александра Подрядова (48 килограммғичә) биринчи учришиштила моңғулстанлиқ Уранцецер Мунхбатқа йол бәрди.
Ислам Бозбаев 1/8 финалда 2008-жилқи Олимпида чемпиони германиялик Оле Бишофтин йеңилип қелип, Лондон билән хошлашти.
Тимур Болат (90 килограммғичә) чарәк финалда Япония палвини Нишияма Масачидин йеңилип қалди.
Бокс. Олимпиада турнириниң башлинишида 54 килограммғичә болған салмақ категориясидики Қанат Әбуталипов хелә яхши оюн көрсәтти. У сириялик Усам Сламан билән учришип, 15:7 һесави билән ғалибийәт қазанди. Әпсус, 1/16 финалда ирландиялик Невин Джон Джодин йеңилип қалди.
Ғани Жайлауовму (60 килограммғичә) наһайити кәскин өткән дәсләпки учришишта таиландлиқ Сайлом Адини тиз пүктүрди. У түнүгүн һиндстанлиқ Джай Бгахван билән күч синашти. Әпсус, 75 килограммғичә болған салмақ категориясидә күрәшкә чүшкән Данабек Сужанов һиндстанлиқ Вижндер Сингхтин утулуп қалди.
49 килограммғичә болған салмақ категориясидә Биржан Жақыпов франциялик Жереми Беку билән өткүзгән кәскин учришишта 18:17 һесави билән ғалип чиқип, 1/16 финалға йолланма алди. У мошу басқучта Филиппин вәкили Марк Баррига билән күч синишиду.
Илияс Сүлейменов (52 килограммғичә) новәттики басқучқа йолланма алди. Иван Дычко (91 килограммдин ошуқ) 1/6 финалда Германия боксчиси Эрик Пфейфердин үстүн болди. Серик Сапиев (69 килограммғичә) билән Әдилбек Ниязымбетов (81 килограммғичә) 1/16 финалға учришиш өткүзмәйла йолланма алди.
Еғир атлетика. Аяллар арисида Анна Нурмухамбетова (69 килограммғичә) умумий һесапта 251 килограммни бойсундуруп, 5-орунни егилиди. Әнди әрләр арисида Кирилл Павлов (77 килограммғичә) умумий һесапта 10-орунда қалди.
Қиличвазлиқ. Эльмир Әлимжанов кореялик Джунг Жин-Сундин, Дмитрий Алексанин Венесуэла вәкили Фернандес Сильвиодин, Юлия Живица россиялик Юлия Гавриловадин йеңилип қалди.
Суда үзүш. Александр Тарабрин йерим финалниң квалификациясидин өтәлмиди.
Теннис. Дәсләпки икки күндә бизниң теннисчилар төрт матч өткүзүп, ялғуз разрядтики икки қатнашқучидин «айрилип қалди». Мәсилән, Михаил Кукушкин 4:6, 2:6 һесави билән француз Симон Жильдин, Галина Воскобоева болса, шундақ һесап билән венгриялик теннисчи Тимеа Бобоштин йеңилди.
Әнди Ярослава Шведова болса, 6:4, 6:2 һесави билән Румыния теннисчиси Симона Халеп үстидин ғалибийәт қазанди. Ярослава Олимпиада мукапатлири үчүн күрәшни давамлаштуруватиду. У шундақла Галина Воскобоева билән җүплүк разрядтиму мусабиқиға чүшүп, биринчи учришишта 6:2, 6:0 һесави билән канадилиқ Стефания Дюбуа вә Александра Возняк иккисини тиз пүктүрди.
Су поңзиги. Қазақстанлиқ ватерполчилар биринчи учришишта Испания талланма командисидин 6:14, кейинки матчта Австралия командисидинму 4:7 һесави билән йеңилип қалди.
Стендқа оқ етиш. Ангелина Мищук тоққузинчи орунни егилиди.
608 рет
көрсетілді0
пікір
