Яркәнт гуманитарлиқ-техникилиқ колледжида сабиқ савақдашлар баш қошти
Бийилқи яз Яркәнт гуманитарлиқ-техникилиқ колледжиниң уйғур бөлүми үчүн алаһидә хатирилик болди. Сәвәви, бөлүмни 1972-жили тамамлап, бала тәрбийиләштәк шәрәплик саһаға қәдәм ташлиған сабиқ курсдашлар қириқ жилдин кейин җуғиҗәм болуп, баш қошти.
У жиллири «училище» дәп атилидиған мәзкүр билим дәргаһини 32 жигит-қиз пүтирип, қоллириға диплом алған еди. Яркәнттин ташқири, Уйғур, Челәк наһийәлиридики вә Алмута шәһириниң әтрапидики уйғур жутлиридин кәлгән яшлар, үч жил тәлим елиш җәриянида иҗил-инақ яшап, худди бир аилиниң балилиридәк болуп кетиведи. Оқуштин кейин, тәрәп-тәрәпкә тарап, бир-биридин жирақлишип кәтсиму, көңүл йеқинлиғини суслаштурмай жүрәтти. Әпсуски, Дүрнәм Қадирова, Гүлистан Мәмәтәлиева, Мәрийәм Буралкиева қатарлиқ достлири һаяттин мәзгилсиз көз жумди. Қалғанлири таллавалған кәспигә садақәтлигини сақлап, үнүмлүк әмгәк қилди. Шуңлашқа бесим көпчилигиниң һөрмәтлик дәм елишқа чиққанлиғиға қаримастин, исми сабиқ шагиртлириниң қәлбидин орун елип, һөрмәт-еһтирамға бөлинип кәлмәктә.
Учришиш училищениң әшу жиллардики бенаси алдида дидарлишиштин башланди. У дәвирләрдә арзу-арманлири җош уруп, һаятқа дегән тәшналиғи қәлбидә орғуп турған яшлар, қириқ жил җәриянида бала өстүрүп, нәврә сөйгән бова һәм момилар болуп, яңливаштин үз көрүшти. Үзлиригә қоруқ чүшүп, чачлирини ақ арилиған болсиму, бир-бирини тонуп, бағриға бесип қучақлашти. Оқуған аудиторияләрни арилап, билим бәргән устазлирини әскә алди. Дуниядин өткәнләрни яд етип, роһиға тазим қилди.
У күни курсдашлар биллә оқуған Ярмәһәммәт Һосманов билән униң рәпиқиси Диләрәм Надированиң дәстихини әтрапида баш қошти. Ғенимәт дәмләр әтиси шәһәрдики «Асыл ғасыр» кафесида давамлашти. Һөрмәтлик меһманлар сүпитидә дәстиханниң төридин орун алған сабиқ устазлири Реһимәм Ибрагимова билән Һосманҗан Мөрдинов шагиртлирини хошаллиғи билән тәбрикләп, әң яхши тиләк-истәклирини изһар қилди. Өз новитидә курсдашлардин Саламәт Қасимова, Майя Ғәнибаева, Ярмәһәммәт Һосманов, Үсән Баратов, Ризвангүл Асимова, Һәмрабүви Бақиева, Мейизгүл Абитова, Абдулһәй Сопахунов, Хеличәм Садиқова вә башқилар меһир-шәпқитини төкүп, тәлим бәргән устазлирини миннәтдарлиқ билән тилға алди. Шуңдақла қериндаштәк болуп кәткән дост-қурбилириға сәмимий тиләклирини билдүрди. Мошундақ «Дәм ғенимәт, дидар ғенимәт» дәқиқиләргә йәткүзгән учришиш тәшәббускарлири Халидәм Һошурова, Ярмәһәммәт Һосманов, Турсунбүви Бәрзәмова вә Саламәт Қасимоваға рәхмитини ейтти.
Сабиқ савақдашлар буниңдин кейин пат-пат учришип турушқа вәдилишип, бир-бирини қиймастин хошлашти.
Нурәхмәт ӘХМӘТОВ.
Яркәнт шәһири.
СҮРӘТТӘ: қириқ жилдин кейин учрашқан курсдашлар.
Турсунмәһәммәт МӘШҮРОВ чүшәргән сүрәт.
