- Йеңилиқлар
- 30 Маусым, 2017
Саһаға мунасивәтлик қанун мукәммәлләштүрүлиду
Бурнакүн Мәҗлисниң Иҗтимаий-мәдәний тәрәққият комитетиниң кативи Бейбит Мамраевниң рәһбәрлиги билән «Қазақстан Җумһурийитиниң бәзибир қануний актлириға әхбарат вә коммуникацияләр мәсилилири бойичә өзгиришләр билән толуқтурушларни киргүзүш тоғрилиқ» қанун лайиһисиниң тәһлили болуп өтти. Аммивий әхбарат васитилирини вә телерадио хәвәрлирини таритиш, әхбаратландуруш вә алақә саһалиридики, шундақла әхбаратлиқ бехәтәрликни вә башқиму муһим мәсилиләрни рәтләшкә қаритилған һөҗҗәтни Әхбарат вә коммуникацияләр министри Дәурен Абаев тонуштурди.
Әхбарат вә коммуникацияләр министрлиги қурулғанда Дөләт рәһбири жүклигән бирқатар вәзипиләрниң наһайити муһимлиғини вә шуниңға мунасивәтлик бүгүнгә қәдәр нурғунлиған чарә-тәдбирләрниң әмәлгә ашурулғанлиғини тилға алған министр буларниң һәммиси дөләт мәнпийити йолидики новәт күткүзмәйдиған мәсилиләр екәнлигигә әтраплиқ тохталди.
«Өткән жилдин башлап елмиздики дөләтлик барлиқ телеканалларда, гезитлар билән интернет-ресурсларда толуқ йеңилаш ишлири әмәлгә ашурулди. Дөләтлик әхбарат сәяситини әмәлгә ашуруш бойичә түп-асаслиқ өзгиришләр йүз бәрди. Вәтәнлик медиамәһсулатлириниң көләми улғийип, сүпити ашти. Әлвәттә, бу чарә-тәдбирләрниң һәммиси әхбарат саһасидики иҗабий өзгиришләрниң сүръәт елишиға иҗабий тәсир қилди. Шундиму бүгүнки заман еқими йәнә бир муһим мәсилини қолға елишни тәләп қиливатиду. У – мошу саһадики қанунни мукәммәләштүрүш. Шуңлашқа министрлик «Әхбарат вә коммуникацияләр мәсилилири бойичә бәзибир қануний актларға өзгиришләр билән толуқтурушларни киргүзүш тоғрилиқ» қанун лайиһисини тәйярлиди. Биз бу лайиһини тәһлил қилишқа пүткүл җәмийәтниң қатнишиши үчүн мүмкинчилик яраттуқ. Мәхсус иш топи қурулуп, униңға мошу саһадики чоң-чоң тәшкилатларниң, бизнес-һәмдостлуғиниң вәкиллири, журналистлар билән эскпертлар кирди. Тәһлилгә Парламент Мәҗлисиниң депутатлириму паал қатнашти. Мошундақ очуқ тәһлил нәтиҗисидә қанун йеңи тәклипләр билән толуқтурулди. Умумән алғанда, мәзкүр қанун даирисидә 12 қанун вә 4 кодексқа 200дин ошуқ түзитиш киргүзүш планлиниватиду. Әгәр мошу қанунға 200гә йеқин тәклип чүшкән болса, униң 70 % инавәткә елинип, һөҗҗәткә киргүзүлди», деди Дәурен Абаев.
Қанун лайиһисидә вәтәнлик каналларни көрсәтмәйдиған, хәлиқ арисида «сур тәхсә» дәп атилип кәткән спутникилиқ қурулумларниң тарилишини қанун турғусидин рәтләш көздә тутулмақта. Министр «сур тәхсиләрни» орнатқан гражданлар вәтәнлик телеканалларни көрмәйду, йәни өз елиниң әхбаратидин сиртта қеливатқанлиғини ейтиватиду. «Сур тәхсиләргә» һеч йәрдә лицензия елинмиған һәм тиркәлмигән. Йәни уларға қарши туруш мүмкин әмәс, бирақ сот системисидики хәритиләр бойичә қарши турушқа болиду. Йеңи қанун лайиһисидә лицензия елинмиған мошу хәритиләрни тарқатқанлиғи яки реклама қилғанлиғи үчүн җавапкәрчилик қараштурулған. Интернет йеңи технологияләрниң тәрәққиятиға мунасивәтлик өзгиришләрму әскә елинған. Нәтиҗидә мошуларниң һәммиси – әхбаратлиқ бехәтәрлигимизни тәминләшкә қаритилған чариләр комплексидур. Шундақла вәтәнлик аммивий әхбарат васитилиридә вә телекоммуникацияниң башқиму ресурслирида қанунға қарши һәрикәттин зәрдап чәккән балилар тоғрилиқ әхбаратни елан қилишни чәкләш тәкливи бар. «Һазир бу мәсилә толуқ рәтләнмиди, әнди Интернетта пәйда болған мәлуматлар келәчәктә балиниң тәғдиригә сәлбий тәсирини тәккүзүши мүмкин» деди Д.Абаев.
Қанун лайиһисини тәһлил қилиш давамида Мәҗлис депутати Кәрибай Мусырман министрдин бәзи сайтларни чәкләш чарилири тоғрилиқ сориди. Министр дөләтниң қануниға қарши келидиған сайтларни ениқлашқа тәвлүк давамида мониторинг жүргүзүлүватқанлиғини ейтти. Мошу мәхсәттә дөләтниң қануниға қарши келидиған миңлиған сайтниң паалийити тохтитилған. Д.Абаевниң ейтишичә, аһали өзлирини һәләйкүмгә салған мәсилиләр бойичә тәлкиплирини әвәтсә, һаҗәтлик тәкшүрүшләр сөзсиз әмәлгә ашурулидиған болиду.
504 рет
көрсетілді0
пікір