• Концерт
• 03 Тамыз, 2017

Ана жутқа мәдһийә

Алмутида яшайдиған жутдишимиз, һәвәскар композитор вә сазәндә  Полат Авакри оғли Хоҗаев йеқинда Уйғур наһийәсиниң үч йезисида өзиниң музыкилиқ әсәрлиридин түзүлгән концерт программисини көпчилик диққитигә тәғдим қилди. Полат Хоҗаев әсли  инженер гидротехник, мелиоратор. У узун жиллар давамида йеза егилиги министрлигидә әмгәк қилип, аддий инженердин башқарма башлиғи дәриҗисигичә көтирилип, «Қазақстан Җумһурийитигә хизмәт көрсәткән инженер-гидротехник» атиғиға еришти. У көп жиллардин буян иҗаткарлиқ биләнму паал шуғуллинип кәлмәктә. Шундақла мәтбуат васитилирдә мақалә, очеркларни елан қилди. У балиларға беғишланған бирнәччә сүрәтлик китапларниң муәллипи. Һазир тохсәндин ошуқ нахшини нотиға чүширип, нәширгә бериш алдида туриду. П.Хоҗаевниң «Арзу» ансамбли билән бирликтә тәйярлиған концерт программиси дәсләп Ғалҗат йезисида көрситилди. Атақлиқ шаирлиримиз мәрһум Илия-Бәхтия, Җәмшит Розахунов вә Илахун Җәлиловниң шеирлириға йезилған нахшиларни «Арзу» ансамблиниң артистлири Шаһидәм Қурбанниязова, Шархат Қурбанов, Фазәм Мамутова, Нурахун Һасанов, Светлана Қурбанова жуқури маһарәт билән иҗра қилип, тамашибин көңлидин чиқти. Әнди Турсунай Һәмраева орунлиған «Қушлар» (сөзи И.Җәлиловниң), «Норуз кәлди өлкәмгә» (сөзи Илия-Бәхтияниң) нахшилар сәнъәт мухлислириниң дил тарлирини тәвритивәтти. Ахирида Ғалҗат йеза округиниң һакими Мәрүпҗан  Мәмиров, жут ақсақили Сламқожа Нақысбеков сәһнигә көтирилип, бәстикарға вә «Арзу» ансаблиниң коллективиға жут намидин миннәтдарлиқ билдүрүп, иҗадий утуқлар тилиди. Қәдирақын вә Адилақын Ибрагимовларниң аилиси жутдашлириға бир дәм болсиму көңүллүк дәмләрни һәдийә қилған Полат Хоҗаевқа һөрмәт билдүрүп, чапан япти. Әтиси дәл мошундақ концерт программиси Чоң Дехан билән Кичик Дехан йезилири турғунлириниң диққитигә һавалә қилинди. Бу йәрдә Полат Хоҗаевни жутдашлири қизғин қарши алди. Концерттин кейин йеза һакими Ербол Абдишаяқов бәстикарни концертиниң утуқлуқ өтүши билән тәбрикләп, жутдашлири намидин шаир Илахун Җәлилов иккисигә чапан кийгүзди. Ахирида сөзгә чиққан Полат Хоҗаев өзиниң ушбу концерт программисини өткүзүшкә қол учини созуп, униң һәр икки йезида тамашибинлар көңлидин чиққидәк дәриҗидә уюштурулушиға ярдәмләшкән барлиқ инсанларға чәксиз миннәтдарлиғини билдүрди. Қудрәт БИШӘРОВ. Уйғур наһийәси.